Ka kynhun kaba ialam ïa ka jingmane
(Worship Leading Team)
Ka jingialam ïa ka jingmane (worship leading) ka dei ka kam kaba khia haduh katta katta. Ngi hap ban sngewthuh ba ka jingshakri jong ngi kam dei tang ban ialam ïa ki jingrwai, pynbiang ïa u key, tone, timing, tempo, etc, hynrei ngi hap ban sngewthuh ba ka kam bakongsan jong ngi ka long ban ialam ïa ka jingiaseng baroh kawei sha ka jingdon ryngkat jong U Blei. Kata ka dei ka thong ba hakhmat eh jong ka worship team.
Kumta ki jingrwai, jingtem jong ngi ki dei ban long kum ki shaka kali (tyre) ki ban pynsuk ia u nongialam bad ïa ka jingiaseng ban pynpoi ïa ki sha ka jaka ba ki thmu (destination).
Ha ka team, ki don ki member ha la ki jong ki jong ki bynta, hynrei u nongialam (worship leader), u long ma u uba ha khmat eh jong ka worship team.
Ngan ai ia phi ka nuksa: U nongialam jingmane (worship leader) u long thik kum u briew uba tan ia ka kali (cart) ryngkat ka jingkit kaba khia bha, kumta u donkam ba kine ki para team members jong u kin iarap lang, ban ïa tan lang ïa kata ka jingkit. Kumta haba baroh ki musicians ki sngewthuh ia kane, da kaba suk u lah ban ialam bad ban pynpoi ïa ka jingmane sha ka jaka ba u thmu.
Hynrei lada ki team members kim sngewthuh, ka long pynban ka jingban khia ïa u. Nalor ba u ialam ïa ki jingrwai, pynbiang ïa u key, tone, timing, tempo, bad ban pynkhih ïa ka jingiaseng ban ïaroh bad mane ïa U Blei, etc, u hap ban kit ruh sa ia ki nongtem (musicians) ha kata ka kali jong u, kane ka long ka burden kaba khraw ïa u.
Harum ngan pyni ïa phi ïa ar tylli ki dur kiba pyni ïa ar jaid ki team members.
Dur 1
Kane ka dei ka dur kaba pyni ha kaba baroh ki team members (i e. Drums, Bass, Guitar, Keyboard, Singers, etc) ki ialeh shitom ban ia ñiat lang ïa ka kali tan, (kaba don ryngkat ka jingkit kaba khia), bad ban iarap ia u nongialam ba u lah ban tan ïa kata ka kali da kaba suk bad aram bha haduh ban da poi sha ka jaka ba u thmu. Kane ka dei ka nuksa babha ïa ka team.
Kumno ngi lah ban pynurlong ïa kane?
Dei haba baroh ki musicians ki shim khia ban practice bha (personal) ïa la ki jong ki jong ki bynta (parts). Ban lah lyndet ia baroh ki bynta, i.e. starting, ending, repetition (what comes next), hangno ban hit/lift, hangno ban suki (slow down), etc.
Dur 2.
Kane ka dur ba 2 pat ka pyni ïa ka dur jong ka team ha kaba ki members (musicians), kim da sngewthuh ïa ka thong, kumta ha ka jaka ba kan long ka jingïarap ban pynsting ïa ka jingkit u nongialam (worship leader), ban ia tan lang ïa kata ka kali, ki long pynban ka jingban khia ïa u nongialam, (ka long pynban kumba ki ia kiew lang bad shong halor ka kali). Nalor ba u hap ban kit ïa ka jingkit ba khia ban ialam ïa ka jingiaseng baroh kawei sha ka khet jong U Blei, u hap ban kit sa ïa ki musicians, kumta teng teng namar ba lah khia eh kata ka jingkit um lah shuh ban tan kumba dei ban tan, bad teng teng la hap ban shu pynkut noh khlem da lah ban pynpoi sha ka thong (khet jong U Blei) ïa ki bangeit. Kane ka long kaei kaei kaba sngewsih.
Balei ka long kumne?
Namar ba ki musicians ki shim sting, kim sngap bha ïa la ki bynta bynta. Kim tip kaei ka ban wan ha khmat (what comes next), kumno ban sdang, kumno ban kut, haei ban hit/lift, haei ban suki, bad kumno ban flow. Na kata ka daw ka worship time kam long kaba sngewtynnad. Ka shu kut ha suiñ.
Nga ngeit kane ka jinghikai kan iarap ïa ka worship team ban ka lah ban pyntyllun ïa ki shaka (tyre) jong ka jingmane ha kata ka rukom kaba suk bad ba sngewtynnad.
U Blei un kyrkhu ïa phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester L Mawlong | June 30, 2025
Comments
Post a Comment