Kumno ngin leh ban ioh ïa ka jingim bymjukut?

Kumno ngin leh ban ioh ïa ka jingim bymjukut?

Intro: Kaei ka jingim bymjukut? Ka jingim bymjukut ka dei ka jingim kaba ngin nym iap shuh, ha kaba ngin im junom la junom ha bneng bad U Trai. Ha kaba yn nym don jingpang jingshitom, jingsngewsih jingkhuslai, ha kaba yn nym don jingthngan bad jingsliang shuh, etc. kata ka dei ka jingim bymjukut.

Ka jingim ha pyrthei ka long tang shipor. Ka Bible ka ong ba ka jingim u briew ha pyrthei ka long kaba lyngkot haduh katta katta, la ong ba ka rta u briew ka long 70 lane 80 snem, bad lada slem eh ruh 120 snem. Kumba long mynta lei don ki briew kiba tang 30, 40 snem ruh ki lah iap. Kata ka long kaba ngi iohi.

To ngin ïa pule na ka gospel u LOUKAS 18:18, Te uwei u nongsynshar u la kylli ïa U, u da ong, “Ko Nonghikai babha, ngan leh kumno ba ngan ïoh ka jingim bymjukut?” cf. Mat.19:16; Mar.1017

Une u nongsynshar u sngewthuh ïa ka jingdonkam ïa ka jingim bymjukut. Kumta u la leit ban kylli na U Jisu, hynrei sngewsih ba ynda U Jisu u batai ïa u, um treh ban kohnguh ïa kaei ba U Jisu u ong.

Ngi ruh ngi donkam ban sngewthuh ïa ka jingdonkam ïa ka jingim bymjukut bad ban kylli - Kumno ngan leh ba ngan ioh jingim bymjukut?

Ka jubab ka long:

1. Kylla kaba mut

Kylla bamut = Kylla ka jingmut, kylla ka dohnud bad kylla ka jingleh. 

U briew haba u kylla bamut, ka mut u kylla noh ka rukom pyrkhat jong u, mynshuwa u pyrkhat ia kiei kiei ki bymkhuid, kiei kiei ki ba bymman, mynta pat u pyrkhat noh da kumwei pat. Ynda haba u la kylla ka rukom pyrkhat, ka sdang sa ka jingkylla ka dohnud, mynshuwa u don ka dohnud kaba eh, kaba sarong, kaba meng, kaba sngewhok, sngewbiang, kaba pun ia kiei kiei kiba sniew, etc, hynrei mynta ka dohnud kaba jem, kaba pyrkhat ia kiei kiei kiba bha, kiba kynja Blei, etc. Nangta ka sdang sa ka jingkylla jong ka rukom leh ne ka rukom im. Mynshuwa nga leh kumto, nga im kumto, nga bam kumto, nga dih kumto, hynrei mynta ngam leh shuh kumto, ngam bam ngam dih shuh kumto. Ki jingmlien basniew, ki jingleh basniew barom la iehnoh. Kata ka dei ka jingkylla bamut.

KI KAM 2:37-39 KHB

³⁷Te haba ki la ïohsngew ïa kane, la dung ngak ïa ki ha la ka dohnud, bad ki la ong ha u Petros, bad ha kita kiwei ki apostol, “A para, kumno ngin leh?” ³⁸Te u Petros u la ïathuh ha ki, “To phin kylla-ka-bamut, bad yn pynbaptis ïa phi uwei pa uwei ha ka kyrteng U Jisu Khrist, ïa ka ban ïohmap ki pop; bad phin ïoh diang ïa ka jingai U Mynsiem Bakhuid. ³⁹Namar ka jingkular ka long ïa phi, bad ïa ki khun jong phi, bad ïa baroh kiba sha jngai, kat kiba U Trai uba U Blei jong ngi un khot ha u.” 

Hangne ruh ngi iohi kine haba ki la iohsngew ïa ka Ktien U Blei, ki la sngewthuh ba ki donkam ïa ka jingim bymjukut, kumta ki la ïa kylla ïa U Petros ban ong, Ah para kumno ngin leh, ba ngin ioh jingpynim? Ka jubab jong U Petros ka long, To phin kylla kaba mut.

Ban ioh ïa ka jingpynim, nyngkong donkam ban kylla bamut na ki pop baroh.

KI KAM 3:19 KHB

Namar kata, to kylla-ka-bamut, to wan phai khmat ruh, ban ïoh pyndam noh ïa ki pop jong phi, ba kumta kin ïoh wan ki aïom shong pyngngad na khmat U Trai.

Haba u briew u kylla bamut, ïa ki pop jong u yn nym kynmaw shuh, ong U Blei. Kampher kaba kumno ka pop ba u briew u la leh, U Blei un nym kynmaw shuh.

HEBRU 8:12 KHB

Naba ngan isynei ïa ki jingleh bymman jong ki, bad ïa ki pop jong ki ngan ym kynmaw shuh.” cf. Isaïah 1:18-20

2. Ngeit bad pdiang ïa U Jisu ha ka dohnud

MARKOS 16:15-16 KHB

¹⁵U la ong ruh ha ki, “To leit sha ka pyrthei baroh, bad to ïalap ïa ka gospel ha ki bynriew baroh; ¹⁶te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem. 

Cf. Ïoannis 3:16-17; 

ÏOANNIS 1:12-13 KHB

¹²Hynrei, kat kiba la pdiang ïa u, ha kito, u la ai bor ban long ki khun U Blei, kata, ha kita kiba ngeit ha ka kyrteng jong u: ¹³kiba la kha, ym na ka snam, lymne na ka mon ka doh, lymne na ka mon u briew, hynrei, na U Blei.

Ngin nym lah ban ioh jingim bymjukut tang da kaba shu leh hok hi, khlem da ngeit bad pdiang ïa U Jisu. ISAÏAH 64:6. Hynrei dei tang lyngba U Jisu ngi lah ban leit sha bneng lane sha U Blei uba U Kpa. ÏOANNIS 14:6, Nga uba long kata ka lynti, ka jingshisha bad ka jingim de...

ROM 10:9-10 KHB

⁹Ba lada men phla shynna da la ka shyntur ïa U Jisu, ba u long U Trai; bad men ngeit ha la ka dohnud, ba U Blei u la pynmih pat ïa u na ki baïap, yn pynim ïa me. ¹⁰Namar da ka dohnud keiñ, u briew u ngeit ïa ka ban ïoh ïa ka hok; bad da ka shyntur keiñ, ba phla shynna ïa ka ban ïoh ka jingpynim. 

KI KAM 16:30-31 KHB

³⁰bad u la ïalam noh ïa ki shabar, bad u la ong, “A kynrad, aïu ka dei ïa nga ban leh ba yn pynim ïa nga?” ³¹Ki te ki la ïathuh, “To men ngeit ha U Jisu uba U Trai, bad yn sa pynim ïa me bad ïa ka ïing jong me.” 

3. Ioh jingpynbaptis

Hadien ba u briew u lah kylla bamut, la iehnoh ïa ka pop, donkam ruh ban pynbaptis ïa u. 

Pynbaptis ka wan na ka ktien Greek 'Baptizo' kaba mut ban wieh lane pynngam.

N.B: Ka jingpynbaptis kam dei ka jingleh briew, lane ka jingleh jong kano kano ka niam, hynrei ka dei ba la buh bad hukum da U Blei.

MARKOS 16:16 KHB

…te uta uba ngeit bad ïoh pynbaptis, yn pynim; hynrei, ïa uta u bymngeit, yn pynrem.

U Jisu u ong, ka dei ka jingpyndep ïa ka hok U Blei.

MATHAÏOS 3:13-15 KHB

¹³Ynda kumta, U Jisu u la wan na Galilaïa sha wah Jordan ha u Ïoannis, ba yn ïoh pynbaptis da u. ¹⁴Hynrei, u Ïoannis u la khang ïa U, u da ong, “Nga donkam ba yn pynbaptis ïa nga da me, te me wan pynban ha nga?” ¹⁵U Jisu te u la ïathuh bad U la ong ha u, “To shah mynta: naba kumne keiñ ka long kaba dei ïa ngi ban pyndep ïa ka hok baroh.” Ynda kumta, u la shah ïa u. 

U Petros ruh u ialap ha ka sngi Pentecost ba ki dei ban kylla bamut bad ba ym pynbaptis ïa ki uwei pa uwei baroh.

KI KAM 2:38-39 KHB

³⁸Te u Petros u la ïathuh ha ki, “To phin kylla-ka-bamut, bad yn pynbaptis ïa phi uwei pa uwei ha ka kyrteng U Jisu Khrist, ïa ka ban ïohmap ki pop; bad phin ïoh diang ïa ka jingai U Mynsiem Bakhuid. ³⁹Namar ka jingkular ka long ïa phi, bad ïa ki khun jong phi, bad ïa baroh kiba sha jngai, kat kiba U Trai uba U Blei jong ngi un khot ha u.” 

Bad ïa kita kiba la ngeit la pynbaptis shisha.

KI KAM 2:41-42 KHB

⁴¹Namar kata, ïa kita kiba la pdiang ïa ka ktien jong u, la pynbaptis; kumta la pynïasoh ha kata ka sngi sha ka balang kumba lai hajar ki mynsiem. ⁴²Bad ki la ïaineh skhem ha ka jinghikai jong ki apostol, bad ha ka jingïasyllok, bad ha kaba kdiah kpu, bad ha ki jingduwai de.

U Paul ruh mynba u la iashem bad U Trai ha kata ka lynti sha Damaskos, hynrei u la pyntud (pynslem) ban pynbaptis, U Blei u ong ïa u, Balei me pyntud?

KI KAM 22:16 KHB

Mynta te, balei me pyntud? To ïeng, to shah ba yn pynbaptis ïa me bad sait noh ïa ki pop jong me, da kaba khot kyrpad ïa ka kyrteng jong u.’

Kaba mut, haba ngi la kylla bamut, ngi la ngeit ïa U Jisu ngi dei ban pyndep ïa ka jingpynbaptis, ngim dei ban pyntud lane pynslem.

4. Pdiang ïa U Mynsiem Bakhuid 

Kaba khadduh, donkam ruh ban pdiang ïa U Mynsiem Bakhuid, namar U Mynsiem Bakhuid un ialam, un hikai, un ai bor ba ngin jop ïa ki jingpynshoi bad ka pop, bad ba ngi lah ban ïaid shaphang ban shakri ïa U.

© Jester L Mawlong | August 4, 2025