Nga ai khublei snem thymmai basuk bad ba la kyrkhu ïa phi baroh ha ka kyrteng U Jisu Khrist uba U Trai bad U Nongpynim jong ngi. Ka bynta ba ngin ïa peit ha kane ka por ka long ‘ Ainguh bad Aiti ’. Sngap ia kane ka khubor ha YouTube da kaba click ha kane ka link 1. Ainguh Shuwa ba ngin jam shaphrang ia une u snem bathymmai 2025, to ngin shim ïa ka por khyndiat ban ainguh ïa U Trai, nga ngeit ngi la mad shibun ki jingkyrkhu ha u snem 2024 uba la leit noh. U Apostol Paul u kyntu ïa ki bangeit ha Thessaloni u ong, Ha kaei kaei baroh to phin ai ka jingnguh: namar kane keiñ, ka long ka mon U Blei ha U Khrist Jisu sha phi. 1 THESSALONI 5:18 KHB Ban ainguh ïa U Blei ka long ka mon ka jong U Blei. U Blei u sngewtynnad haba ngi nang ban ainguh bad sngewnguh ïa U namar kiei kiei baroh kiba U la leh. U nongrwai Salm u David ruh u kyntu ïa la ka jong ka mynsiem ba kam dei ban klet ïa ki jinglehbha jong U Trai baroh, u kyntu ba ka dei ban ainguh bad ban kyrkhu ïa U Trai. To ...