Ka bynta ba ngin ïa peit ha kane ka por ka long ‘Ainguh bad Aiti’.
1. Ainguh
Shuwa ba ngin jam shaphrang ia une u snem bathymmai 2025, to ngin shim ïa ka por khyndiat ban ainguh ïa U Trai, nga ngeit ngi la mad shibun ki jingkyrkhu ha u snem 2024 uba la leit noh.
U Apostol Paul u kyntu ïa ki bangeit ha Thessaloni u ong, Ha kaei kaei baroh to phin ai ka jingnguh: namar kane keiñ, ka long ka mon U Blei ha U Khrist Jisu sha phi. 1 THESSALONI 5:18 KHB
Ban ainguh ïa U Blei ka long ka mon ka jong U Blei. U Blei u sngewtynnad haba ngi nang ban ainguh bad sngewnguh ïa U namar kiei kiei baroh kiba U la leh.
U nongrwai Salm u David ruh u kyntu ïa la ka jong ka mynsiem ba kam dei ban klet ïa ki jinglehbha jong U Trai baroh, u kyntu ba ka dei ban ainguh bad ban kyrkhu ïa U Trai.
To ngin pule na ka kitab Salm 103:1-5, hangne ngin iohi ia ki daw ba kongsan ba ngi dei ban ainguh ïa U Trai.
SALM 103:1-5
[1] Ko mynsiem jong nga, to kyrkhu ïa U Trai; bad baroh kaba ha nga, ïa ka kyrteng bakhuid jong u. [2] Ko mynsiem jong nga, to kyrkhu ïa U Trai, bad wat klet ïa ki jinglehbha jong u baroh: [3] uba map ïa ki jingleh bymman jong pha baroh, uba shna ïa ki jingpang jong pha baroh; [4] uba pynim ïa ka jingim jong pha na ka jingjot; uba pynphong pansngiat ïa pha da ki jingleh isynei bad ki jingisynei bajem: [5] uba pynkdang ïa ka shyntur jong pha da kiei kiei ki babha; kat ban pynthymmai ïa ka jinglong samla jong pha kum ka pukni.
Hangne i David u pyni ia ki 6 tylli ki daw ba ngi dei ban ainguh ïa U Trai:
1) Namar ka jingmap ei:
Hooid ha ka jingiaid lynti ha u snem ba la leit, lehse don shibun ki jingbakla, ki jingduna ha ka jingim, hynrei U Trai u map ia ngi.
Ha ka dkhot ba 10 u David u ong ba U Blei um shym la thew ha ngi katba kum ki pop jong ngi, lymne um shym ai nong ïa ngi katba kum ki jingleh bymman jong ngi. SALM 103:10
Kata ka dei kaei kaei kaba ngi dei ban ainguh ïa U
2) Namar ka jingpynkhiah:
Kum ki briew ha ka doh, ngi lah ban mad ïa ki jingpang jingshitom, hynrei ainguh ïa U Blei ba u pynkhiah ïa kita ki jingpang jingkhrew jong ngi baroh.
Ha ka kitab Eksodos U Blei u ong, Nga long U Trai uba pynkhiah ïa me. EKSODOS 15:26
3) Ka jingpynim ïa ngi na ka jingjot:
Ka Bible ka iathuh ba baroh ngi la leh pop, bad ngi la duh lehnohei ïa ka burom U Blei. Ngi la jot ngi la rem, ngi la dei hok ban ioh ïa ka jingpynshitom ka dujok, hynrei U Trai da ka jingieit bah jong U, u la pynim ïa ngi na kata ka jingjot. Hallelujah!
U la pyllait ïa ngi na ka shangkhawiah u nongriam ba long u Soitan.
4) Namar ba U la pynphong pansngiat da ki jingleh isynei bad ki jingisynei bajem jong U:
Ka jingleh isynei bad ki jingisynei bajem jong U ki long kum ka pansngiat ba la pynphong ha ngi. Kawei pa kawei ka sngi ba ngi iaid, ka jingisynei U Trai ka don halor jong ngi kum ka pansngiat.
U Jeremiah u ong ba ka jingisynei U Trai ka thymmai man ka step.
SNGEWSYNEI 3:22-23
[22] Ka long na ki jingisynei U Trai ba ym shym la bam duh ïa ngi, naba ki jingsngewsynei jong u kim duh. [23] Ki long ki bathymmai man ka step; kaba khraw ka jingïaineh jong me.
5) Ka jingpyndap ba kynjablei:
Kaba san kaba ngi dei ban ainguh ka dei namar ka jingkyrkhu bad ka jingpyndap ba kynjablei, kaba kynthup ïa ka bam ka dih, ka kup ka sem kumjuh. Nga ngeit ngi dang im haduh mynta, bad ngi long kumne kumba ngi long ka dei namar ka jingbsa ka jingpyndap jong U, ngim shym la shah thngan, ngim shym la thiah jingit, kata ka dei kaei kaei kaba ngi dei ban ainguh ïa U Blei.
6) Ka jingpynthymmai:
Kaba khadduh, ka dei ka jingpynthymmai ïa ka mynsiem. Ha ka jingiaid lynti, teng teng ngi sngewtlot, ngi sngewswai, ngim sngew don bor shuh, hynrei ha kaba kum kata ka por U Trai u pynthymmai bor ia ngi ba ngi lah ban bteng ia ka jingiaid lynti jong ngi.
U Isaiah u ong, Hynrei, kita kiba ap khmih ïa U Trai kin pynthymmai bor; kin her sha jrong da ki thapniang kum ki pukni; kin mareh, bad kin ym sngewthait; kin ïaid, bad kin ym sngewlwait. ISAÏAH 40:31
Kine ki long ki daw ba ngi dei ban ainguh bad ban kyrkhu ïa U Trai.
Kaba ar pat ka long:
2. Aiti
Hadien ba ngi la ainguh ia U Trai, ngin sdang pat ban aiti thymmai ia lade ha U Trai. Aiti ki plan bad ki jingthmu baroh ha U, aiti ia la ki lynti iaid baroh ha U. Ngim lah ban tip lypa ki lynti kiba kumno ngin hap ban iaid ha une u snem thymmai, hynrei ngin shu aiti ha U Trai, U Trai un ialam beit ia ka jingim jong ngi ha une u snem baroh uwei.
U nongrwai Salm u ong ha ka SALM 37:5-6, ⁵To aiti ïa la ka lynti ha U Trai; to shaniah ruh ha u, te un pynlong ïa ka. ⁶Bad un pynmih noh ïa ka hok jong me kum ka jingshai, bad ïa ka jingbishar jong me kum ka shiteng sngi.
Haba ngi aiti ïa la ki lynti ha U Trai, U Trai un pynlong ia ka, wat ia kita ki lynti khohruh khohram U Trai un pynbeit, U Trai un pynjlih ha kaba ngi lah ban iaid lyngba ia une u snem thymmai baroh uwei.
Ngin nym shaniah ha la ka jong ka jingstad jingshemphang jong ngi, hynrei ngin shaniah ha U Trai.
Ka Ktien jong U Blei ba ka kitab PROBERB 3:5-6 ka ong, [5] To ngeit ha U Trai da la ka dohnud baroh, bad wat shaniah ha la ka jong ka jingshemphang. [6] Ha la ki lynti baroh to phla ïa u, te un pynbeit ïa ki lynti ïaid jong me.
Haba ngi aiti ïa la ki lynti iaid jong ngi bad ngi shaniah lut ha U, ma U un ialam, ma U un pynbeit pynryntih ïa kiei kiei baroh.
Nga ngeit U Blei u la kyrkhu ïa ngi lyngba kane ka Ktien jong U Blei. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Lyngdoh Mawlong | Jan 2, 2025
Comments
Post a Comment