U Khristan kum u Dieng

Ha ka Bible la pynsyriem ia ki briew jong U Blei ne u Khristan bad u dieng. U dieng hangne kam mut satia uto u dieng lyngkhot ne u dieng iap, hynrei ka kren ia u dieng uba im ne u jingthung.

Haba ngi pule ha ka Psalms 1:3 bad Jeremiah 17:8 ka iathuh shaphang u briew jong U Blei (bangeit) ba u long kum u dieng ba la thung harud ki wah um...

Balei la pynsyriem ia u bangeit bad u dieng?

Haba ngi peit bniah, ngi shem ba u bangeit bad u dieng ne jingthung ki don ia ka juh ka jingiashem, jingmad bad ka jingtreikam, etc. Kumba u dieng u hap ban mad ia ki saw aiom, ka tlang, ka lyiur, ka pyrem, ka synrai, kumta ruh u Khristan. U hap ban iaid lyngba ia shibun ki jingiashem iakynduh ha ka jingim, don ka por ba u mad ia ka jingtyrkhong (tlang) ha ka jingim, don ka por ba u hap mad ia ka por ba shit kyrang (lyiur), don ka por ba u mad ia ka por basuk bakmen, ka por ba pyngngad (synrai) bad kumta ter ter. Um lah ban mad tang ka por bakmen basuk baroh shirta, u hap ban iaid lyngba ia ki aiom baroh, katba ka wan.

To ngin ia peit shuh shuh balei la pynsyriem ia u bangeit ne Khristan bad u dieng (jingthung)?

Don ar tylli kiei kiei kiba donkam eh ha u dieng ne jingthung.

* Ki thied bad ki soh

Um lah ban san tang ki thied khlem soh, bad um lah ban sei tang ki soh khlem thied, donkam baroh ar.

Kaba nyngkong - U dieng u donkam ban suhthied.

Balei donkam ba un suhthied?

U thied u pynlong ia u dieng ba un skhem. U dieng uba lah ban ksam jylliew ki thied shapoh, u long u dieng uba skhem bha. Kham ñiar ba uta u dieng un shah rat ha ka eriong ne erlangthari, um ju kham iap stai ne iap tyrkhong wat haba ka shit kyrang ka sngi.

Hynrei u dieng bym suh thied jylliew um long kumta, tang shu wan ka eriong u lah shah rat dyngkhong. Tang shu shit kyrang ka sngi, u lah iap stai iap tyrkhong noh.

Kumta ruh u Khristan - u donkam ban suhthied jylliew bha ha u Mawsiang ba long U Khrist. Colossians 2:6-7

U Khristan bym suh thied, u kloi ban shah rat haba ki eriong jong ki jinghikai bakla ki wan. Ephesians 4:14 

U Khristan bym suh thied u kloi ban iap stai ne tyrkhong haba u ia kynduh ia ki jingeh jingjynjar ha ka jingim. Matthew 13:18-23

Kumta donkam ban suh thied jylliew ha U Khrist.

Kaba ar - U dieng u donkam ban seisoh.

Ki briew kim ju sngewtynnad ban ieh ha kper ia u dieng bym seisoh. La ju khet noh ia u.

e.g. Dieng dymbur bym seisoh - Luke 13:6-9. Matthew 7:19. 

Kumta u Khristan ruh u hap ban sei soh. Ka jingbym seisoh ka buh ha tmier ka jingtim. Matthew 21:18-20

Ka ktien U Blei ka dawa na u Khristan ba un sei ia kine ki soh:

1) U Soh jong ka jingkylla ba mut ba shisha (kaba kren ia kata ka jinglong jingim Khristan kaba iadei dur bad ka Gospel U Khrist) - Matthew 3:8

2) Soh jong U Mynsiem - Galatians 5:22-23

3) Soh jong ka jingjop Mynsiem - John 15:16

Kumno ngi lah ban suhthied bad seisoh?

1) Jan sha ka Ktien U Blei

e.g. Kumba u jingthung u donkam ia ka um, kumta ruh u Khristan. Donkam ban ioh ia ka jingbsa kaba biang na ka Ktien U Blei. 

Eph 5:26 - Ka ktien U Blei kum ka um...

Mat 7:24 - sngew bad leh (kohnguh) ia ka...

Salm 1:3 - pule & puson ia ka synia sngi...

2) Shah ia U Blei ba un khyllad ia ngi. Ioannis 15:

3) Buh ia ka jingngeit & jingshaniah baroh ha U, U long ka nongrim kaba skhem. Jer 17:8

# Wat buh ia ka jingshaniah ha u briew, ka spah ka phew, jingnang jingstad...hynrei buh ia ka jingshaniah baroh ha U Trai - kjit na u kum u dieng ba thung hajan ka wah.

# Haba ngi jan sha ka Ktien U Blei, shaniah lut ha u - ngin ym sheptieng ia ka jingshit ne jingrang-ryngkhiang - kaba kren ia ki jingeh jingjynjar kiba lah ban wan ha ka jingim.

Salm 125:1 - Kita kiba shaniah ha U Trai kin long kum u Lum Zion bym lah ban pynkhih.

Jingkyntu: To ngin nym sngewhun ban sah hajuh, hynrei to ngin nang suhthied jylliew ha U Trai. Ngin nang seisoh ha u.

U Blei un kyrkhu iaphi baroh. Amen