Ngi iohi hangne ia kaei kaba U Jisu u ong,
1) Len ia lade
2) Rah ia la ka diengphna
3) Bud ia nga
1) Len ialade: Lehse ngi lah ban pyrkhat balei U Jisu u buh shuwa ia ka kyntien 'Len ia lade' na khmat, bad ka kyntien 'Bud ia nga' hadien duh, bad ka kyntien 'Rah ia la ka diengphna' hapdeng. Hangne ka don ka jingmut kaba khraw. Kata ka long ba u briew shuwa ba un rah ia la ka diengphna u hap ban len shuwa ia lade. Katba um pat lah ban len ia lade, katba ka malade jong u ka dang ieng hakhmat, un nym lah satia ban rah ia la ka diengphna. U donkam ban iap lut ia ka malade baroh, ka hanga manga baroh, dei hangta u sa lah ban rah ne bah ia la ka diengphna.
Ngi iohi ia ka nuksa na U Jisu, shuwa ba un bah ia ka diengphna, u la iap lut ia ka malade baroh ha Kper Gethsemane. Hadien kata ngi iohi ka wan ka jingbah ia la ka diengphna, haduh ka jingiap ha u Lum Kalbari. (Shuwa ba un iap ha Kalbari, u lah iap shuwa ia ka malade ha Gethsemane!).
Ha ka gospel u Mat 26:36-46, U Jisu u la duwai ha U Kpa haduh lai sien, ba un pynkynriah noh ia kata ka khuri, kaba kren ia ki jingeh jingjynjar ba u hap ban kit (ka diengphna), ka malade jong u hi kam mon, hynrei u hap ban pyniap lut ia kata ka malade baroh. Lada ka malade jong u ka dang im, kan long kaba eh ia u (kum u briew) ban bah ia ka diengphna, hynrei namar ba ka malade jong u ka lah iap lut, da kaba suk u la lah ban bah ia la ka diengphna. Ngi ruh ngi donkam ban iap lut ia ka malade baroh khnang ba ngi lah ban bah ia la ka diengphna. Lada ka malade hi ka dang ieng hakhmat, ngin nym lah. Donkam ban iap ia ka malade baroh. Kata ka jingsngewbit sngewbiang, kata ka jingsngew nang sngewstad, kata ka jingkwah burom kwah nam bad kumta ter ter.
2) Rah ia la ka diengphna: Ka diengphna ka dei ka dak jong ka jingshah shitom, jingshah kren beiñ na ka bynta U Khrist. Ka lynti Khristan kam dei satia kaba suk suda, hynrei ngi hap ban iaid lyngba ia ki jingeh, jingialeh, jingshah kreñ bad kiwei kiwei.
* Ki Kam 14:22, Kadei ia ngi ban bsut lyngba shibun ki jingjynjar.
* 2 Tim 3:12, Kiba mon ban im riewblei kin shah lehbeiñ.
1 PETROS 4:1
Namar kata, haba U Khrist u la shah shitom ha ka doh, te ma phi ruh, to phin kieng atiar ïa lade da kata kajuh ka jingmut; naba jar uba la shah shitom ha ka doh u la wai noh na ka pop;
* Shibun kiwei ruh ki dkhot ha ka ktien U Blei kiba kren ia kane ka bynta.
Hynrei haba ngi lah iap ia ka malade baroh, kata kan pynlah ia ngi ban bah ia la ka diengphna. Wadla ki briew ki kren bein, ngim sngeweiei, wat la ki jingeh ki wan ngi iaineh skhem ha U Trai, bad khlem artatien, haba ngi iaineh ban bah ia la ka diengphna, ha kaba kut ngin iohi ba U Blei un pyndonburom. Ngi iohi ka nuksa na U Jisu, namar kata ka jingim ba len lade jong u, ka jingim kaba kloi ban bah ia la ka diengphna da kaba pyndem lut ha U Kpa, U Blei u la kyntiew eh ia u, bad la ai ha u ka kyrteng halor ki kyrteng baroh. Philipi 2:5-11. U Trai un leh kumta ruh ia ngi.
3) Bud ia nga: Haba ngi lah iap ia ka malade, ngi la bah ia la ka diengphna, ngi la long kiba bit ban bud ia U Jisu bad ban ioh bynta lem ruh bad U Jisu. 2 Timothy 2:11-12
* Mat 5:10-12, U Jisu u ong, Suk ma phi haba kin ia krenbeiñ, bad pynshitom ia phi....hynrei to kmen namar kaba khraw ka bainong jong phi ha ki bneng.
* 1 Pet 4:14-16, Wat ai ba ngin shah shitom kum ki nongkam sniew, hynrei shah shitom kum U Khristan.
Ki synran U Jisu ruh ki la iaid lyngba kane ka lynti, ki la iap ia ka malade, ki la bah ia la ka diengphna bad ki la bud ia U Trai haduh ka jingiap.
Nga duwai ba U Blei un ai ha ngi (haphi iwei pa iwei kiba pule ia kane ka jingthoh) ka jingaiei ba ngi lah shisha ban len ia lade, ba ngi lah ban rah ia la ka jong ka diengphna bad ba ngin bud ia U Trai haduh bakut. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
©JesterMawlong | 11/4/2020
Comments
Post a Comment