Ka jingsuk hapdeng jong ka eriong

Katba ngi dang don ha kane ka pyrthei ngin nym lah lait na ki eriong, ngin iakynduh beit. Ha ka Bible ruh ngi shem kiba bun ki briew jong U Blei ki ia kynduh ia ki eriong ha ka jingim jong ki, wat ki synran jong U Trai Jisu kiba iohi bad don markhmat bad U Jisu ruh ki iashem kumjuh. Bad haba ka eriong ka wan, kiba bun hi ki briew kin sheptieng, hynrei ngi shem ba don ruh ki briew ki bym sheptieng, kiba suk kynjai wat hapdeng jong kata ka eriong. Kaei kaba pynlong ia ki briew ban ym sheptieng bad ban suk kynjai wat hapdeng jong ka eriong? 

Ngin ia peit katto katne na ka Ktien U Blei, kumno ki briew ki shem ia ka jingsuk wat hapdeng jong ka eriong.

1. Ngeit ia ka Ktien jong U Trai.

Haba ngi pule ha ka Gospel u Markos 4:35-41, ngi iohi shaphang U Jisu bad ki synran kumno ba ki ia iaid lynti lyngba ka duriaw bad ynda ki la iaid katto katne la khie ka eriong ba jur eh, bad ha kata ka por ki synran ki la sheptieng shikatdei eh, hynrei U Jisu u iohthiah lyngngai. v.37-38. Ki synran ki la mareh sha U Jisu bad ki la ong, "Mem suidniew ia ngi, ngin sa iap...". Ki synran ki la sheptieng, U Jisu u iohthiah lyngngai. Balei? U Jisu u ngeit ba uta uba la phah ia u, U Blei uba U Kpa u donryngkat bad u kumta um shym la sheptieng. U tip ba ym don ba lah ban shim noh ia ka jingim jong u, lymda la ai noh U Kpa - Ioan 10:17-18. Kata ka la pynlong ia U ba un suk bad iohthiah aram wat haba ka eriong ka wan pyrshah ia u. Ki synran ki la sheptieng, ka daw ka long namar ba ki klet bad kim ngeit ia kaei kaba U Trai u ong ia ki ha kaba sdang jong ka jingiaid lynti. Markos 4:35 ter ter, U Jisu u ong ia ki, "Ïa ngin ia leit sha shiliang...". 

Lada ngin peit shaphang U Noah ngin shem kumno U Noah u shem ka jingsuk, um khuslai wat haba ka jingshlei bakhraw kaba la pynshlei ia ka pyrthei baroh, ka eriong ba jur eh, haduh ba ki umpohliew ki la bthei, mut dur haduh katno ka jingkhih phaloh jong kata ka um - Gen 7:1 ter ter, v. 11-12, ka daw ka long namar u ngeit ba uta uba ong ia u "thaw ka ïinglieng" u lah ban pyllait bad ri pynim ia u haduh ba kut. Gen 6:14. 

2. Pyrkhat ia kiei kiei kiba iadei bad ka Hima U Blei.

Nga ngeit kaba ar kaba la pynlong ia U Trai Jisu ba un iohthiah lyngngai wat hapdeng jong ka eriong kadei namar ba ka jingmut jingpyrkhat jong U ka bunkam ban pyrkhat ia kiei kiei kiba iadei bad ka Mission jong U Kpa, kumno ban pyndep ia ka. Ngi ruh ban lait na ka jingsheptieng ngi dankam ban puson ia kiei kiei kiba kynja bneng, pyrkhat shaphang ka kam U Trai, bunkam ha ka - Kol 3:2, "mut brai ia kiei kiei kiba haneng...". Teng teng ka jingpeit bad pyrkhat than ia ki jingeh, ki jingjia ba ngi iohi ne ki eriong kiba wan, ka pynlong ia ngi ban klet noh wat ia ka jingkukar U Blei. U Blei u kular na ka por sha ka por ban long ryngkat bad ngi, bad ban ym iehnoh ia ngi, hynrei bunsien ngi klet ia kata. Dei namar kata kadaw ngi sheptieng.

3. Tip uei U long.

U Jisu u tip ia U Kpa jong u, Uei U long - Ioan 10:15a. Na kata ka daw um sheptieng, u iohthiah suk kynjai hapdeng ka eriong. Ki synran jong U kim pat da tip bha shaphrang jong U. Kumta haba ka eriong ka khie pyrshah ia ki, ki la sheptieng. Lehse phi lah ban pyrkhat kumno kat ki synran U Jisu kim tip bha ia u? Kadaw ka long ba ha kane ka por ki dang sdang ban bud ia U Jisu. U dang shu khot shen ia ki. Namar lada ki lah tip bha shaphrang jong U kin nym jin dal kylli paralok hi shaphang U Jisu ba u long uei. Ha ka Gospel u Markos 4:41, hadien ba U Jisu u la pynjai jai ia ka eriong, ki synran jong U ki la ia kylli paralok hi, "Une u long uei shisha, ba ka lyer bad ka duriaw de ki ia kohnguh ia u? Haduh ka lynnong ba 16:13-15 Gospel u Mathaios, U Jisu u dang kylli ia ki, "Phi te phi ong uei ia nga? U Petros u jubab "Me long U Khrist, U Khun U Blei baim" 

Ba ngin lait na ka jingsheptieng bad ban shem ka jingsuk, ngi donkam ban tip ia U Jisu uei u long? U long U Nongpynim, U Nongpyllait, U Nongpynkhiah, U Nongsumar, U Nongiada bad kumta ter ter. 

U Paul u phla ba u ithuh ia uta uba u la ngeit, 2 Tim 1:12. Na kata ka daw wat haba la set byndi um sheptieng, wat haba la byrngem ia u, um sheptieng. U David u tip shaphang jong U Trai, uei u long. Ha ka Salm 23:1..., U ong ba U Trai u long u Nongap langbrot jong nga...kumta la nga iaid ia ka them ka syrngiew ka jingiap ngan ym sheptieng...". Salm 91:1-16, U Trai u long u Nongiada, ka jaka rieh, ka kut baskhem... Sa pule ia ka Salm 91 baroh kawei. Salm 46:1-3, U Nongrwai Salm u ong, ngan ym sheptieng la ka kylla ka khyndew, namar u tip ba U Trai u long ka jaka rieh jong u.

Ngi donkam ban tip bad ithuh ia U Jisu ha ka jingim jong ngi, ngi donkam ban da mad bad shem ia u shimet (personally), ym tang ka jingtip pateng.

4. Ngeit bad shaniah lut ha U.

Haba ngi lah tip bad ithuh ia u personally, uei u long, ngi donkam ban ngeit bad shaniah lut ha u ia ka jingim baroh phar.  

U SHADRAK, MESHAK & ABEDNEGO, ki la ngeit bad shaniah lut ha U Blei uba ki shakri. Kim sheptieng wat haba ki iohi ia ka ding baklang hynñiew shah ha pyrshah ki khmat jong ki, namar ki ngeit ba uta U Blei uba ki shakri U lah ban pyllait ia ki wat na ka lawar ding ba rhem. Kumta wat haba la bret ia ki ha kata ka lawar ding, ki iaid kai pyngngad pynban. Hallelujah! Daniel 3:1-30

Kine ki long ki buit barieh, kumno ban shem ia ka jingsuk wat hapdeng jong ka eriong.

Ka jingkyntu bad ka jinghikai ka long:

1) To ngin ngeit ia ka Ktien U Trai kaba ngi la iohsngew.

2) To ngin pyrkhat bad puson barobor ia kiei kiei kiba iadei bad ka Hima U Blei, kiba kynja bneng.

3 To ngin tip bad ithuh ia U Jisu personally, Uei U long.

4) To ngin buh ia ka jingngeit bad jingshaniah jong ngi baroh ha U Trai.

U Blei un kyrkhu iaphi. Amen

* SHARE LEM SHA KIWEI PAT RUH.

© Jester Mawlong | 19-9-2020