U Daniel, ka rukom im bad ka jingngeit jong u

U DANIEL

Uei u Daniel? 

U Daniel u dei u samla Israel na ki khun Judah. U long ruh u samla uba bha briew, bastad ba shemphang bad ruh u ba sheptieng ia U Blei Jehovah. Ha ka Aramaic bad Hebrew, Daniel ka mut 'U Blei u long u Nongbishar jong nga'

Ha ka snem kaba lai ka jingsynshar jong u Jehoiakim u syiem Judah, u Nebuchadnezzar u la wan hiar thma ia ki Israel bad u la jop ia ki, bad u la ring mraw ruh ia kiba bun. U la jied ruh ia ki samla kiba stad bad ba bha briew bym don kano kano ka jingthohdak ha ki ba kin ioh ban ieng ha khmat u syiem. Bad na kine la don u Daniel bad ki lai ngut ki paralok jong u. Daniel 1:1-7

KA RUKOM IM JONG U

U Daniel u im ka jingim ka bym pyniasyriem bad ka rukom im ka pyrthei. Haba u la shah jied ban ieng ha khmat u syiem, bad u syiem u la hukum ba dei ban bsa bha ia ki, ban ai ha ki ban bam na ka jingbam ba u syiem u ju bam, bad ban ai dih na ka waiñ kaba u syiem u ju dih khnang ba kin kham bha briew kham sngaid kham plung shuh shuh. Hynrei u Daniel u la kyntait ban pynsyriem (compromise) ia ka rukom bam bad ka rukom im jong u bad ka rukom jong ka pyrthei. 

DANIEL 1:8-9, "Hynrei U Daniel u la thmu ha la ka dohnud ba un ym pyntngit ia lade da ka jingbam syiem, lymne da ka wain ba u dih: namarkata u la kyrpad ia u rangbah ki iunok ba um dei ban pyntngit ia lade. Te U Blei u la pynshem ia U Daniel ka jingsngewbha bad ka jingieit ha khmat uta u rangbah ki iunok."

Ka jingim bym pyniasyriem jong u ka la pynlong ba un phuh un phieng, kham bha briew palat ban ia kiwei kiba la bam bad dih na kita ki jingbam syiem, watla u bam tang u kynja ri. DANIEL 1:15

Balei ka jingim Khristan ka tyrkhong, ka sti? Leit jingiaseng katno katno ruh ka don beit ka jingsti, jingtyrkhong ba kynja mynsiem, wat shabar ruh. Ka daw ka long namar ba bun ki jingpyniasyriem (compromises) bad ka rukom jong ka pyrthei. Hangne khyndiat, hangtai khyndiat. Lada ngi kwah ban iohi ia ka jingbha briew U Khrist ha ngi, to ngin nym pyniasyriem (compromise) bad kiei kiei ki jong ka pyrthei.

ROM 12: 2, "Bad to wat pynsyriem ryngkat ia lade bad kane ka pyrthei; hynrei to pynkylla dur noh ia lade kein da ka jingpynthymmai ia ka jingmut jong phi, khnang ba phin ioh tip kaba kumno ka long ka mon ka jong U Blei, kaba bha, bad kaba pynsngewbha eh, bad kaba janai de."

KA JINGNGEIT BAD KA RUKOM MANE BLEI JONG U 

Kaei ka jingngeit kaba U Daniel u ngeit? U Daniel u ngeit ha U Blei uba im. Um ju pynsynjor ia ka jingngeit kaba u don ha U Blei. Um treh ban compromise ia ka jingngeit wat tang khyndiat ruh, watla ka long sa ha kano kano ka rukom ruh. Ngi kynmaw ha ka por ba U Daraios u syiem jong ka ri Babylon u la pynmih ia ka hukum ba ym bit iano iano ban pynlong jingkyrpad ne ban duwai ha uno uno uwei pat u blei, hapoh 30 sngi lait na ka kyrteng jong u syiem Daraios, bad la sign ia kata ka aiñ kaba ym lah shuh ban pynkylla katkum ka aiñ jong ki Mid bad ki Persha, bad lada shem iano iano ba kyrpad ha uwei pat u blei yn bret ia uta sha krem ki sing. Hynrei U Daniel um shym la sheptieng, haba u la tip ia kata ka hukum u la leit sha ïing, bad ynda u la poi ha ïing, u lah duwai ha U Blei ba im kumba u ju leh, lai sien shi sngi u la duwai. Haba ki nongshun jong u kiba la buddien ia u ki la lap ia u ba u duwai ha U Blei ba im, ki la report sha u syiem bad la hukum ban bret ia u ha krem ki sing. Pynban kaba sngewphylla bad sngewtynnad ka long ba ki sing kim shem la treh ban pynmynsaw ia u Daniel, bad u syiem u la hukum ban sei noh ia U Daniel na kata ka krem ki sing, bad hangta hi la kyntiew kyrdan pynban ia U Daniel, bad u syiem u la ai ka hukum ba baroh ki dei ban mane bad dem ha U Blei jong U Daniel. Lyngba kata ka jingngeit baskhem jong U Daniel, ki briew ki la tip ia U Blei ba im. Lada U Daniel u pyndem ha kata ka adong, un nym ioh satia ia ka jingpynkyntiew kyrdan, ki briew kin nym tip satia shaphang U Blei ba im. Ainguh ia ka jingshlur jong U Daniel. (Pule DANIEL 6:1-28)

Kane ka long ka jinghikai bakhraw na ka bynta jong ngi ruh, kumno ba ngi dei ban ieng skhem ha kata ka jingngeit kaba ngi don ha U Blei. Wat ai ba kita ki jingeh ba ngi ia kynduh, ki jingshah adong kin pynsynjor noh ia ka jingngeit jong ngi ne kin pynkylla noh ia ka rukom mane Blei jong ngi. Ngi im ha kine ki sngi ha kaba ki mih ki adong (protocol) ba bun jaid ha kaba iadei bad ka jingshakri Blei. Ka jingkylli ka long kumno shaphang ka jingngeit bad ka rukom shakri Blei jong ngi ha kaba kum kane ka por? 

Ka jingkyntu ka long, To ngin im ka jingim ka bym pyniasyriem bad kiei kiei ki jong ka pyrthei, la ka long ha ka rukom bam bad ka rukom im. To ngin ieng skhem ha ka jingngeit bad ban ym shah ba kiei kiei kiba na bar kin pynkhih, pynsynjor noh ia ka jingngeit jong ngi. To ngin shakri ia U Blei kumba dei ban shakri. U Blei un kyrkhu iaphi. Amen

©JesterMawlong | 5/11/2020