Ki Nongtong dohkha bad ki jar jong ki

Haba ngi pule ha ki Gospel la iathuh khana ia ngi shaphang ki nongtong dohkha, kumno ki im bad ki leh ha ka jingim jong ki.

To ngin pule bad ngin ia peit:

Kaba nyngkong ki shna ia ki jar: 

MATHAIOS 4:21. Te haba u la leit noh nangta u la iohi  arngut kiwei pat kiba shi para, U Jakob u khun U Sebedi, bad U loannis u para jong u, ha ka lieng bad U Sebedi u kpa jong ki, ba ki dang ia shna ia ki jar jong ki, bad u la khot ia ki.

Hangne ngi shem ba ki nongtong dohkha ki dang ia shna ia ki jar jong ki. 

(Ha ka NIV ka ong, Preparing their nets; ha ka NKJV ka ong, Mending their nets) 

Ki dang iashna, iasuh, iathaiñ ia ki jar jong ki. Ki da peit bha ia ki jar jong ki ioh don kano kano ka thliew bapei ba kin ioh ban suh ban shna bha ne ioh don kano kano ka jingsohkyrdot ha ki, ba kin ioh ban law ban loit, ban pynbeit ryntih bha, khnang ba ynda ka por ka la ailad ia ki ban leit tong dohkha biang kin ym jynjar ban pynbeit pynbiang ia ki jar jong ki, kin shu leit ban tong da ka jingsuk. 

Lada kim shna bha ia ki jar jong ki, haba kin leit tong khlem artatien ki dohkha ba lah tong shitom kin lait lut, bad kata ka jingleh shitom baroh kan shu long kaba lehnohei.

Kane ka long ka jinghikai na ka bynta jong ngi ruh kum ki nongtong dohkha jong U Trai, ba kumno ma ngi ruh ngi dei ban leh ha kaba iadei bad ki jar jong ngi, (ki jar hangne nga kren shaphang ka jingim jong ngi). Ngi hap ban peit bha ioh ba don kano² ka jingduna, ka jingpei thliew ne jingsohkyrdoh ha ka jingim, bad ngi hap ban pynbeit ia ka.

Bunsien lehse ngi pyrkhat balei ki dohkha ba lah ngat ki lait lut... Balei ka jingleit tong dohkha kam iaid kumba dei? Namar bun ki jingpei ha ka jar, bun ki sohkyrdoh ha ka jingim ba ngi donkam ban suh, ban thain, ban pynbeit ryntih bha. Ngi donkam ban ïit man la ka por.

Kaba ar ki sait ia ki jar:

LOUKAS 5:2. Bad u la iohi  artylli ki lieng kiba ieng harud kata ka  pung; hynrei ki nongtong dohkha ki  la lah mih noh na ki, bad ki dang iasait  ia la ki jar. 

Shuh shuh ngi iohi hangne ba ki nongtong dohkha ki dang ia sait ia ki jar jong ki (washing their nets).

Haba kim tong dohkha shuh kim ju ieh kumto ia ki jar jong ki, ki da sait bha ia ki. 

Balei ki hap ban da sait kumta? 

Namar kato ka jaboh jabaiñ kan bam bad pynlong ba ka jar kan sniew ne pyut noh. Bad lada ka jar ka sniew ne pyut noh kan ktah ia ka rukom tong dohkha hi... Kumta man ba dep ka kam ki pynkhuid noh kloi kloi ia ka.

Kane ruh ka long ka jinghikai bad kaba dei eh ba ngi ruh ngin bud nuksa, ym dei ban shu bunkam tang ha kaba tong dohkha, khlem da ït shuh ia la ka jingim, kumno ka long? 

Ngi hap ban ït, ioh don kano kano ka jingbymkhuid bymman, ioh don kano kano ka jingsarong jingkwah burom... Hap ban pynbeit, hap ban kylla bamut.

Kaba lai ki ap ha U Trai:

LOUKAS 5:3. Te u la kiew ha kawei na kita ki lieng, kaba long ka jong U Simon,  bad u la ong ia u ban ñiat noh khyndiat  na ryngkew. Haba u la shong te u la  hikai ia kita ki paitbah nalor kata ka  lieng. 

Haba ki lah dep ban pynbit pynbiang ia ki jar jong ki, ki ap ha U Trai, ki shahshkor ia u kaei kaba u ong ne hikai. 

Bad ia kaei kaba U Jisu u ong, ki kohnguh bad leh ia ka, kumta ka kambah jong ka jingngat dohkha ka jia. 

LOUKAS 5:5-6. U Simon u la iathuh  bad u la ong, Ko Kynrad, ngi la ialeh  shitom baroh shimiet, te ei ei ruh em  ngat; hynrei namar ka  ktien jong me, ngan pynhiar ia ki jar. Kumta ynda ki la lah leh ia kane,  ki la ngat bun bah eh ki dohkha : ki jar  jong ki te ki la sdang kad. 

Ngi ruh ngi donkam ban nang ban ap ha U Trai, bad ban kohnguh ia kaei ba U Trai u ong. Teng teng ngi lah ialeh shitom shisha hynrei duna ka jingngat... Balei ka long kumne?

Lehse ioh ba ngim shym la ap ha U Trai, ngi leh ha la ka jong ka jingstad ne ka jingsngewdei jong ngi hi. Lada ka long kumta, to ngin kylla bamut bad to ngin nang ban ap ha U Trai bad ban kohnguh ia kaei ba U ong.

PROBERB 3:5. To ngeit ha U Trai da la ka dohnud baroh, bad wat shaniah ha la ka jong ka jingshemphang.

Kine ki long ki nongrim (principles) ba kumno ma ngi ruh kum ki nongtong dohkha jong U Trai ngi dei ban bud bad ban leh:

#-1. Ngi donkam ban peit bha ba ka jar jong ngi kan ym don kano kano ka jingpei thliew ne jingsohkyrdoh ha ka.

#-2. Ban ym ailad ba kano kano ka jingtngit, jingbymkhuid kan shongsah, lada don hap ban pynkhuid noh kloi kloi.

#-3. Ngi donkam ban nang ban ap ha U Trai, bad ban kohnguh bad ban leh ia kaei ba U ong. 

Khlem artatien ki kambah jong ka jingngat dohkha kan jia.

U Blei un kyrkhu.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

©Jester Mawlong | 16-11-2020

j.l.mawlong@gmail.com