Lada U Khun u briew un wan, Un shem ne em ia ka jingngeit ha ka pyrthei?
LOUKAS 18:8 “.... Hynrei, ynda wan U Khun u briew, un shem ne em ïa ka jingngeit ha ka pyrthei?”
Kane ka long ka jingkylli ba ngi hap ban puson jylliew bha. Lada U Khun u briew un wan, Un shem ne em ia ka jingngeit ha nga bad ha phi? Un shem ne em ba ngi dang skhem ka jingngeit ha U?
Jia aiu lada U Trai um shem ka jingngeit ha ka pyrthei?
Ka jubab kaba suk ka long un pynjot noh ia ka!
Ngi iohi haba U Blei um shem ia ka jingngeit ha ka pateng bynriew U Noah U Blei u la pynjot noh ïa ka da ka jingshlei um, ha kaba baroh ki la iap lut, lait sa tang U Noah bad ka ïing jong u (kata 8 ngut ki mynsiem) kiba la lait im. Pule Jenesis 6 & 7 lynnong.
Haba um shem ia ka jingngeit ha ka shnong Sodom bad Gomorah u la hap ban thang noh ia ka da ka ding, ha kaba baroh ki la iap lut, lait sa tang U Lot bad ar ngut ki khun kynthei jong u kiba la lait im, ha kaba ka lok jong u ruh ka la iap noh namar ba kam shym la ngeit ia kaei ba ki angel ki bthah ia ka ban ym kyrtiang dien. Pule Jenesis 19 lynnong.
Paralok baieit, lada U Blei um shym la riej ia ka pateng bynriew U Noah bad ia ka Sodom - Gomorah, un nym riej ruh ia ngi lada um shem ka jingngeit ha ngi (kaba mut lada ngi kynriah noh na ka jingngeit ha U Trai Jisu).
Ka Bible ka ong U Blei un nym riej ia kita kiba um shem ka jingngeit ha ki.
ROM 11:20-21 ²⁰Ñiuma; hynrei, la pynkheiñ noh ïa ki, da ka jingbymngeit, bad me ruh me ïai-ïeng da ka jingngeit. Me wat sngewmeng, hynrei, to sheptieng; ²¹namar lada U Blei um shym la riej shuh ïa kita ki tnat trai, un ym riej ïa me ruh.
Kane ka kren ia ki jaidbynriew Israel, kum kita ki tnat trai, ki bym don jingngeit, U Blei um shym la riej ia ki, u la pynjot plar ha rikhlaw.
Shuh shuh ha ka thithi 2 PETROS 2:4-6 ka ong, ⁴Namar lada U Blei um shym la riej ïa ki angel mynba ki la leh pop, hynrei, haba la shop arsut ïa ki sha dujok, u la aiti noh ïa ki ha ki krem ka jingdum tliw tliw, ba la ri noh ïa ki, ïa ka jingbishar; ⁵bad lada um shym la riej ïa ka pyrthei ba-mynbarim, hynrei, ïa u Noah, u nongïalap ïa ka hok, lem bad hynñiew ngut kiwei pat u la ri kyndong, mynba u la pynwan ïa ka jingshlei ha kata ka pyrthei ki bymriewblei; ⁶bad haba la pynlong dpei ïa ki nongbah ka Sodom bad Gomorra, u la pynrem ïa ki da ka jingpynkyllon khram, u da buh ïa ki ban long ka rukom maham ïa kita ki ban im bymriewblei;
U Blei un nym riej ia kita baroh kiba um shem ka jingngeit. Dei namar kata ka daw ka Ktien jong U Blei ka kyntu barobor ba ngi dei ban ieng skhem ha ka jingngeit, ban ym hap noh na ka jingngeit, namar lada ngi kynriah lane ngi hap noh na ka jingngeit U Blei un nym sngewbha shuh ia ngi.
HEBRU 10:38 Hynrei, uta u bahok jong nga un ïai-im da ka jingngeit; hynrei, lada un kynran da dien, ka mynsiem jong nga kam sngewbha shuh ïa u.”
ROM 1:17 Namar ha ka, la pynpaw ïa ka hok U Blei da ka jingngeit sha ka jingngeit: kat kumba la thoh, “Hynrei, uta u bahok da ka jingngeit un ïoh im.”
U Apostol Paul u kyntu ïa ki bangeit ha Korinth ba kin ieng skhem ha ka jingngeit
1 KORINTH 16:13 To da sharai phi, to da ïeng skhem phi ha ka jingngeit, to da leh shlur ïa lade phi kum ki rangbah, to da pynkhlaiñ ïa lade phi.
La ïathuh lypa ha ka Bible ba ha ki sngi ba khadduh don ki ban hap noh na ka jingngeit. 1 TIMOTHI 4:1 Hynrei, U Mynsiem u ong shai, ba ha ki Ïa ki bakhatduh, don ki ban hap noh na ka jingngeit; da kaba pynshahshkor ha ki mynsiem bashukor, bad ha ki jinghikai ki ksuid.
Kumta ka jingkyntu ka long, to ngin ieng skhem ha ka jingngeit haduh kaba kut, to ngin nym leh bymsuidñiew ha kaba iadei bad ka jingngeit jong ngi ha U Blei. To ngin nym pynshah shkor ïa ki jingpynshoi u Soitan, to ngin nym shah ialam bakla noh, hynrei to ngin ieng skhem ha ka jingngeit khnang ba lada U Trai un wan un shem ia ngi ba ngi dang skhem ka jingngeit, ngi dang pluh, ngi dang rhem ka jingshakri ia U Trai.
U Blei un kyrkhu, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester L Mawlong | April 3, 2025
Comments
Post a Comment