Wad ia ka khmat jong U ha la ka sngi

Psalms 105:4 “To wad phi ia U Trai bad ia ka bor jong U; wad ia ka khmat jong U ha la ka sngi.”

U Nongrwai Salm hangne u kyntu ia ki bangeit kumno ba ki dei ban wad ia ka khmat U Trai ha la ka sngi. Balei hap ban wad ia ka khmat U Trai ha la ka sngi? Balei bym wad tang ha ka sngi U Blei ne Sngi Saitjain, etc? Hynrei hap ban wad ha la ka sngi?

Kadaw ka long namar ngim tip kaei kaba U Trai un leh mynta ka sngi. Shano un ialam? Kaei kaba ngi dei ban leh ha kane ka sngi? 

Kitab Jingrwai Sngewsynei 3:22-23, ka ong, “… naba ki jingisynei jong U kim duh, ki long kiba thymmai man ka step…” U Blei jong ngi u long U Blei uba leh ia kiei kiei kiba thymmai man ka sngi. Ki jingkyrkhu jong U ki thymmai man ka sngi. Dei na kata ka daw ngi ruh ka dei ia ngi ban wad ia ka khmat jong U ha la ka sngi. Ym dei satia tang shisien shi taiew. Ym dei ruh ban ong ba mynnin nga leh kumto, U Trai ruh U leh kumto, mynta ruh ngan leh kumto bad U Trai ruh un leh kumto kumba ba leh mynnin, hynrei em kam long satia kumta.

U Jehoshaphat u long u syiem uba ju sngewtynnad ban wad ia ka khmat jong U Trai ha man la ki jingiashem jingiakynduh ha ka jingim jong u, la ha ka synshar khaddar bad kiwei kiwei. Ngi kynmaw ha ka por ba la jia ka thma ha kaba ki Moab bad Ammon ki la wan ban hiar thma pyrshah ia u. Ha kata ka por u la wad ia ka khmat U Trai. Bad U Trai u la pyni ha u kaei ba u dei ban leh. U Blei u la ong ha u ba un shu thung ia ki nongrwai ki ban iaroh ia ka jingkhraw bad ka jingiaineh jong U Trai. Bad kumta u Jehoshaphat u la leh, bad u la ioh shisha ia ka jingjop kaba khraw bad kaba phylla, ha kaba kine ki nongshun jong u ki la ia pyniap paralok hi, haduh ban da lut khoit (Pule 2 Khro 20:1-30). 

Kane kam mut pat ba u Jehoshaphat man ba khie ka thma un leh beit da kane ka rukom, hynrei don ka por ba u hap ban ialeh da kiwei pat ki rukom, da u sum ka waitlam ka stieh, etc. Dei namar kata ka daw ka donkam eh ia ki nongsynshar ba kin wad ia ka khmat U Trai ha la ka sngi, ngi ruh iwei pa iwei ngi donkam ban wad ia ka khmat jong U Trai ha la ka sngi. Bad ia kata kaba U Trai u kwah ia ngi ban leh, ia kata ngin leh.

U Jisu ruh u hikai ia ngi kumno ba ngin duwai, Mat.6:9-10, “Namar kata phin duwai kumne: Ko Kpa jong ngi uba ha bneng, long bakhuid ka kyrteng jong me. Wan ka hima jong me. Long ka mon jong me ha ka khyndew, kumba ha bneng.” Kane ka mut ba ha la ka sngi ngi hap ban wad ia ka khmat U Trai bad ia ka mon jong u, aiu u kwah ia ngi ban leh ha kane ka sngi. 

U David ruh u long u syiem uba ju sngewtynnad ban wad ia u Trai, ha ka Salm 63:1 u ong, "Ah U Blei, me long U Blei jong nga; dang step ngan wad ia me..." 

Para bangeit bad ki paralok baroh, to ngin pynlut por ban wad ia ka khmat jong U Trai ha la ka sngi. Bad haba ngi pynlut por ban wad ia ka khmat U Trai ngin ym duhnong satia, hynrei kan don ka jingiohnong kaba khraw, ka jingjop, ka jingsuk bad ka jingkyrkhu. Amen.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

©Jester Mawlong | 3rd Nov.2020