Ka jingsngewrit

Kaei ka jingsngewrit?

Ka jingsngewrit ka dei kata kaba ym don ka jingsarong ne jingmeng. Ha ka Bible la batai ruh kum ka jingjemnud, jingluilui, lane ka jingpynrit ha kaba ka malade ka jah noh. - Jinglong jong u khynnah 

Ka dei ruh kata ka jingiohi ba kiwei ki kham donkam ia ka jingshakri jong nga, ym ba nga nga donkam ba kiwei kin shakri ia nga.

Ka jingsngewrit ka dei ka jinglong jong ka dohnud, kam dei satia tang kata kaba ngi pynpaw shabar. Ngim lah ban shu leh na jrong kum uba sngewrit eh, hynrei hapoh pat ka dohnud ba sarong ba meng.

Ngin ia peit ia ki jingmih na ka jingsngewrit:

1. Ngin ioh ia ka bneng: 

Kaba nyngkong ka jingkyrkhu jong ka jingsngewrit ka long ba ngin ioh ia ka bneng.

Lehse phi lah ban sngewphylla ba nga ong kumta, hynrei ka long kaba shisha. Phin shem barobor ki briew ba sarong ba sngewmeng kim ju lah ban wan sha U Jisu. Kiba sngewsarong ha ka spah, ha ka kyrdan, ka niam ka rukom kim ju lah ban pdiang ia ka jinghikai U Jisu. 

Nuksa: U samla ba riewspah, ki Pharisi, etc. 

Dei namar kata U Jisu u ong, “Suk ki baduk ha ka mynsiem: naba jong ki, long ka hima ki bneng." MATHAÏOS 5:3

Ka jingduk hangne ka kren ia ka jinglong ba sngewrit, ba la pynthylli ia ka malade baroh. 

U Blei um sngewtynnad ban don lang ha bneng bad kiba sarong, ba sngewmeng, dei namar kata ka daw wat ia u angel lucifer bad kita kiba bud ia u, u shop noh sha khyndew namar ba ki don ka jingsarong ka jingmeng. (Pule ISAIAH 14:12 ter ter)

Shuh shuh ka jingsngewrit ym dei tang ban ioh rung ha bneng, hynrei kan pynlong ruh ia ngi kiba khraw ha ka hima ki bneng. Hallelujah (MATHAIOS 20:26-27)

Kumta haba ngi wan sha U Khrist kum ki nongpop, ngi dei ban wan da ka dohnud ba sngewrit. (Kynmaw ka jingduwai jong u Pharisi bad u nongkhrong - LOUKAS 18:9-14)

2. Ka jingsngewrit ka wanrah ia ka jingpynkyntiew:

U Jisu u ong, Naba ïa uno uno baroh uba pynkhraw ïa lade, yn pynpoh; te ïa uba pynpoh ïa lade, yn pynkhraw. LOUKAS 14:11. Kata ka dei ka principle jong U Blei. Haba ngi don ka dohnud ba sngewrit, U Blei un kyntiew, hynrei ka dohnud ba sngewkhraw yn pynhiar. 

Kane ka ktien ka long kaba shisha. Peit ia ki nuksa kiba bun ha ka Bible phin shem ba kumno U Blei u kyntiew ia kiba nang ban pynrit bad kiba don ka dohnud ba sngewrit, hynrei ia kiba pynkhraw u da pynhiar shaduh trai eh. Kam pher u dei u ba duk ne u ba riewspah.

• U David u long tang u khynnah ap langbrot, hynrei la kyntiew ia u sha ka khet syiem. 

• U Nebukhadnessar u long u syiem u ba khraw, la pynhiar ia u sha ka kyrdan mrad. DANIEL 4:28-35

Baroh ka shong tang ha ka jingsngewrit bad ka jingsngewkhraw.

Dei namar kata u Paul u ju kyntu ia ki bangeit ba ki dei ban kup barobor ia ka jingsngewrit, da kaba u ai ka nuksa na ka jingim U Jisu Khrist. (Pule PHILIPI 2:5-11) Namar ka dohnud ba pynrit jong U Jisu, la kyntiew eh ia u bad la ai ruh ha U kata ka kyrteng kaba halor ki kyrteng baroh.

U Blei un leh ruh kumjuh ia uno uno u ba don ka dohnud ba sngewrit, namar U Blei um long satia U Blei ba ñiew shiliang khmat.

3. Ka jingsngewrit ka pynioh shuh shuh ia ka jingaiei jong U Blei:

U apostol Jakob u thoh kumne, "Hynrei, u ai ïa ka jingaiei ba kham bun: naba kumta la ong: “U Blei u ïaleh pyrshah ïa kiba sngewkhraw, hynrei, ha kiba sngewrit u ai ka jingaiei.” JAKOB 4:6

Kaei ka jingaiei ba U Blei u ai ha phi, la ka long ha ka ban rwai, tem, ialap, hikai ia ka ktien U Blei ne kano kano, to ngin shakri ryngkat ka jingsngewrit, bad haba ngi leh kumta, U Blei un nang ai shuh shuh ia ka jingaiei jong u ba ngin nang lah ban leh bad shakri kham bha.

U apostol Petros ruh u ban ia kane, u ong, Hynrei, baroh to phin ïakup ïa ka jingsngewrit ïa ka ban shakri paralok hi: naba “U Blei u ïaleh pyrshah ïa kiba sngewkhraw, hynrei, ha kiba sngewrit u ai ka jingaiei.” To phin pynrit ïa lade namar kata hapoh ka kti bakhrawbor ka jong U Blei, ba un ïoh pynkhraw ïa phi ha ka Ïa ba bit. 1 PETROS 5:5‭-‬6

Kaba sngewsih ka long bun bah ki briew haba ki la sngew long eiei, ki sngew khraw sngewsarong noh, bad phin iohi kiba kum kita ki briew tang katto katne ki kyllon noh, namar U Blei um lah shah ia kiba sarong kumba ngi la ia peit shakhmat.

Kumta ka jingkyntu ka long, to ngin ioh ia ka dohnud ba sngewrit namar ka don ka nong bad ka jingkyrkhu bakhraw.

To U Blei un kyrkhu ia phi baroh. Amen

© Copyright Jester Mawlong | 21-10-2021