EKKLESIASTIS 3:1
Don ka aïom ïa kiei kiei baroh, bad ka por ïa ka jingthmu baroh hapoh ka bneng:
U Ekklesiastis u ong, Don ka por ia kiei kiei baroh. Ka long kaba shisha ba kiei kiei baroh kim long sah kumjuh, ki kylla, mynnin da kumwei mynta da kumwei pat.
Ka long ruh ha ka juh ka rukom ha kaba iadei ka jingim jong ngi bad U Blei.
Ka por jong ngi bad U Blei kan nym sah kumjuh, ka kabu jong ngi bad U Blei kan nym sah kumjuh. Don ka por ia kiei kiei baroh.
To ngin ia peit ia ki katto katne ki por ha kaba iadei hapdeng jong ngi bad U Blei.
1. Ka por ba U Blei u dang ieit bad ka por ba U Blei un sa bitar.
Ngi ju iohsngew barabor ia ka jingialap shaphang ka jingieit jong U Blei. Hooid ka long kaba shisha ba U Blei u ieit haduh katta katta ia ngi. IOANNIS 3:16
Hynrei lada ngi leh bym suidñiew ia kata ka jingieit jong U, un sa bitar pyrshah ia ngi. HEBRU 12:29 - U long ka ding kaba bam duh.
2 THESSALONI 1:8-9
"...⁸ha ka ding ba-meh, u da pynhiar kput ha kita ki bymithuh ïa U Blei, bad ha kita ki bymkohnguh ïa ka gospel ka jong U Trai Jisu jong ngi; ⁹ki ban shah ka jingpynshitom, ka jingpynjot bymjukut keiñ na khmat U Trai bad na kata ka burom ka bor jong u."
Bad haba U Blei u bitar, mano ba lah ban pynsangeh? Ym don, bad uta ia uba U Blei u bitar un long u briew ba kordit tam.
NAHUM 1:6
Uei uba lah ban ïeng ha khmat ka jingotshla jong u? Bad uei uba lah ban shah ïa ka jingmeh ka jingbitar jong u? Ïa ka jingotshla jong u la theh noh kum ka ding, bad ïa ki mawsiang la pynpait ar liang da u.
Paralok baieit, katba U Blei u dang tyrwa ia ka jingieit jong U, to pdiang kloi kloi noh mynta, namar ynda ka por jong ka jingkhot ieit ka la kut, phin mad ia ka jingbitar jong U Blei.
IOANNIS 3:36
Uta uba ngeit ha U Khun, u don ka jingim bymjukut; uta te u bymkohnguh ïa U Khun, un ym ïohi ïa ka jingim: hynrei, ka jingbitar jong U Blei ka ïaisah halor jong u.
Lada u briew u bitar, tang katto katne ka lah ban kut, u lah ban klet noh, hynrei haba U Blei u bitar, kata ka jingbitar ka iaisah bymjukut.
Kumta paralok baieit, to ngin pdiang noh kloi ia ka jingieit jong U, shuwa ba ka sngi jingbitar jong U kan poi, ioh ngi babe bymjukut.
2. Ka por ba U Blei u dang khot ieit bad ka por ba un sa beh noh.
Paralok baieit, kane ka dei ka por kaba U Blei u dang khot ia ngi. Ngi pule ha ka Bible ngi shem ba U Blei u khot bad iai khot ia ngi. Kampher uei kaei ngi long, hynrei u khot ia ngi da ka jingieit, u ong, Ale, wan sha nga, Ale, phai noh na ki lynti bymman jong phi, Ale seh khun, Ale.
Ha ka gospel U MATHAIOS 11:28, u ong, To wan ha nga, phi baroh ki bathait bad bakhia ka jingkit, te ngan pynjem ïa phi.
La iai pyrta bad iai pyrta, la khot bad iai khot ia ngi ba ngin wan sha U. Kampher ka pop aiu ngi la leh, hynrei u khot ia ngi bad u ong ba un map bad pynkhuid phar ia ki pop jong ngi.
ISAÏAH 1:18-20
“Ale te, to ngin ïasaid nia lem,” ong U Trai: “la ki pop jong phi ki long ki basaw hain hain, kin lieh kat ka ïor; la ki la saw bthuh, kin long kum u 'ñiuh langbrot. Lada phi long kiba kloi bad ba kohnguh, phin bam ïa ka jingbha jong ka ri: hynrei, lada phi kyrngah bad ïaleh kiat, ka waitlam kan bam duh ïa phi: namar ka shyntur U Trai ka la kren ïa ka.”
Paralok baieit, wan kloi sha U Jisu katba u dang khot ieit ia phi, namar kan sa poi ka por ba un sa beh noh ia ngi lada ngim treh ban shah shkor ia ka jingkhot ieit jong U.
MATHAÏOS 7:21-23
“Ym u briew baroh uba ong ha nga, ‘A Trai, A Trai’, u ban ïoh leit hapoh ka hima ki bneng; hynrei, uta keiñ uba leh ïa ka mon U Kpa jong nga uba ha bneng. Shibun kin ïa-ong ha nga ha kata ka sngi, ‘A Trai, A Trai, ngi ngim shym la ïalap ha ka kyrteng jong me? Ngi ngim shym la beh noh ïa ki ksuid ha ka kyrteng jong me? Ngi ngim shym la leh shibun ki kambah ruh ha ka kyrteng jong me?’ Ynda kumta te, nga ruh ngan ong pyrshah ha ki: Ngam ju la ithuh ïa phi; khie leit noh na nga, phi kiba ju trei bymman.
Ynda U Trai un beh noh bad un ong "Khie leit noh na nga - Ngam ithuh ia phi" kan long ka por ba sangsot tam ia uta u briew. Ka long kaba sngewtriem haduh katta katta ban pyrkhat.
Shaei U Trai un beh ia kita kiba kyntait ia ka jingkhot ieit jong U?
Haba U Trai un beh, un nym beh tang hajan, hynrei shajngai bah, sha DUJOK DING BYMJUKUT, kaba hangta kan long kaba lynniar bad kum dait bniat. Kaba sngewshyrkhei!!!
Paralok baieit, hato phi kwah ba U Blei un beh ia phi ne phi kwah ban iohsngew ia ka ktien kaba un ong, ale rung sha ka jingkmen u kynrad.
3. Ka por ba U Blei u dang wad ia ngi bad ka por ba U Blei un buhrieh ia la ka khmat na ngi.
U Blei mynta u dang wad ia ki briew, wat ia kita kiba la jot la rem.
U Jisu u ong ha ka gospel U MATHAÏOS 18:11, Naba U Khun u briew u la wan ban pynim ïa kaba la jot.
Paralok baieit, kampher katno phi jot ka jingim, kampher katno u soitan u la leh sat bad pynjot ia phi, kane ka dei ka por ba U Jisu u dang wad ia phi, wat pynlehnohei ia kane ka por, wan noh sha U Jisu, wat buhrieh sah ialade ha ka pop, wat buhrieh sah ialade ha ki jingbymman, wan noh sha U Jisu.
Wat ap haduh ba U Blei un da buhrieh ia la ka khmat jong U na phi. Haba U Blei un buhrieh ia lalade na ngi, wat lada ngin wad katno katno ruh ngin nym lah ban shem shuh ia U.
PROBERB 1:28
Hangta kin khot kyrpad ha nga, hynrei, ngan ym phai ktien; kin wad biang biang ïa nga, hynrei, kin ym shem ïa nga:
Ynda haba phin wad ia U, hynrei phin ym shem ia U, kan long ka por ba dum tam ha ka jingim jong phi.
U Isaïah ruh u pynshisha ba kan poi ka por ba lada ngi kwah eh ban wad ia U, hynrei ngin nym shem shuh ia U, kumta u ong, “Wad phi ïa U Trai katba dang lah ban shem ïa u, to kyrpad ïa u katba u dang hajan: ISAÏAH 55:6
Katba U Trai u dang don hajan, katba U Trai um pat shym la burieh ia la ka khmat na ngi, to ngin wad kloi ia U.
U Jeremiah u ong ba lada ngi wad ia U ngin shem ia U, haba ngi wad ia U da ka dohnud baroh. JEREMIAH 29:13
U Jisu u ong, baroh uba wad u shem. Lada ngi wad ha ka por ba dei ngin shem, lada ngi wad ha ka bymdei shuh ka por ban wad, ngin nym shem.
Kumta to ngin wad ia U Trai mynta. Amen
N.B: Ia kane ka khubor la ialap nyngkong ha Jaroit ha ka 9th, April 2022.
Copyright © Jester Mawlong | April 12, 2022
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Comments
Post a Comment