To ngin nang beh ban ithuh ïa U Trai

HOSIA 6:3

To ngin ithuh ruh, to ngin nang beh ban ithuh ïa U Trai; ka jingmih jong u ka skhem kum ka step: te un wan ha ngi kum u slap, kum u 'lap khatduh uba ai um ïa ka khyndew.

Intro: Ngi im ha ki sngi ha kaba ki briew ki ia beh ia kiei kiei ki jong ka jingim ha ka doh, don kiba beh ia ka spah, don kiba beh ia ka nam bad ka burom, don kiba beh ia ka jingnang jingstad, bad kumta ter ter. Hynrei ka ktien jong U Blei ka khot ia ngi ba ngi dei ban beh ban ithuh ia U Trai.

Phai biang sha katei ka dkhot ba u Hosia u ong:

Kaba nyngkong U Hosia hangne u ong, "To ngin ithuh ia U Trai", bad kaba ar u ong, "To ngin nang beh ban ithuh ïa U Trai"

1. To ngin ithuh ia U Trai: Ka long kaba donkam ba uwei pa uwei u briew un ithuh ia U Trai, un don kata ka jingiashem ba marmet (personal encounter) bad U Trai, ban kylla bamut bad pdiang ia U Jisu ha ka dohnud. 

Kam biang tang ba ngin shu iohsngew ne tip pateng, hynrei ngi donkam ban da ithuh bad iashem bad U. Ki nong Samaria kim shym la hun tangba ki shu iohsngew na ka kynthei nong Samaria shaphang U Trai Jisu, hynrei ki da wan ban ia shem ia U mar khmat. IOANNIS 4:39-42

Ban ithuh ia U Trai ka long shisha kaei kaei kaba kordor haduh katta katta. Ka long kaba ngi dei ban sngewsarong. 

JEREMIAH 9:23-24

Kumne u ong U Trai, “Wat ai ba u riewstad un sarong ha la ka jingstad, lymne u bakhrawbor un ym sarong ha la ka bor, u riewspah to un ym sarong ha ki spah jong u: hynrei, uta uba sngewsarong to un sngewsarong ha kane, ba u shemphang, bad ba u ithuh ïa nga, ba nga long U Trai uba leh ïa ka jingleh ieit, ïa ka jingbishar, bad ïa ka hok, ha ka khyndew: naba ha kine kiei kiei nga sngewbha keiñ,” ong U Trai.

Lada ngi sarong na ka bynta ka jingstad, ka spah ka phew, U Blei um sngewtynnad, U isih ong ka ktien U Blei. Hynrei haba ngi sarong namar ba ngi ithuh ia U Trai, ka long kaei kaei kaba U Blei u sngewtynnad.

2. To ngin nang beh ban ithuh ïa U Trai: Haba ngi la ithuh ia U Trai, ngim dei ban sah kut noh tang hangta, ngi donkam ban nang beh ban ithuh shuh shuh ia U.

Nuksa: Haba ngi ia kynduh ia ki briew shisien, bad lada ngim ia kynduh shuh kham slem, da ngin ia kynduh biang ngi lah klet, u long kumno? Kumta ba ngin ithuh bha ia uta u briew, ngi hap ban iai kynduh ia u man ka por.

Ka long ruh ha kajuh ka rukom bad U Trai. Tang shisien kynduh kam pat biang, ngi donkam ban beh ban iai kynduh ia U man ka por. Kata kan iarap ia ngi ba ngin ithuh bha ia U kumba U long.

Bun bah ki briew kiba lah long Khristan, hynrei kim pat ithuh ia U Trai kumba dei ban ithuh. Hooid ki don ia ka jinglong babha, hynrei kim pat ithuh ia U Trai. Dei namar kata ka daw haba ia kynduh jingeh ki artatien noh ia U Blei, tip u don nym don, tip u lah ne em ban pynkhiah, tip u lah ne em ban leh ia kane, etc ? My experience

Ngi iohi ia kane na ka jingim ki synran U Jisu, kine ki lah ia iaid ryngkat bad U Jisu katto katne por, hynrei kim pat ithuh bha ia U, haduh katno U long, haduh katno U donbor. Ia kane ngi iohi haba la khie ka eriong ha duriaw, bad haba U Jisu Ula pynjai jai ki la kylli paralok uba kumno une u briew. MATHAIOS 8:23-27

Nangta ngi iohi ia U Job, u don ka jingsheptieng Blei, u ai jingknia man ka sngi, hynrei um shym pat la ithuh tikna shaphang U Trai.

JOB 42:5

"Nga la ïohsngew shaphang jong me da kaba shu ïohsngew ka shkor; hynrei mynta, ka khmat jong nga ka ïohi ïa me"

U Job u la ju iohsngew shaphang U Trai, hynrei um pat ithuh tikna ia U, ha kaba kut u phla ba mynta nga la ithuh ia U.

U Apostol Paul ruh hadien ba u la iashem bad U Trai, u ong mynta nga ithuh ia uta uba nga la ngeit. 

2 TIMOTHI 1:12

Namar kane ka daw, nga shah ruh ïa kine kiei kiei: pynban, ngam sngewlehrain; namar nga la ithuh ïa uta ha uba nga la ngeit, bad nga ngeit skhem ba u long uba lah ban da ïa kata kaba nga la aiti ha u hamar kata ka sngi.

Balei ngi donkam ban ithuh bha ia U Trai?

1. Ka iarap ia ngi ba ngi lah ban ngeit bad shaniah lut ha U.

Phim lah ban shaniah ia uno uno u briew u ba phim da ithuh bha, hynrei ia uno uno u briew uba phi da ithuh bha, kumno u long kumno u im, da kaba suk ngi lah ban shaniah. Ka long ruh kumta bad U Blei.

2. Ka jingithuh ia U Trai kum uta U Bakhuid ka iarap ia ngi ruh ba ngin ri khuid ia lade. 

U Isaiah haba u la iohi ia U Trai ba U long u Bakhuid, kumta u la hap ban dem ha khmat jong U Trai bad ban duwai ba U Trai un pynkhuid ia u ruh. (Pule ISAIAH 6:1-8)

Cf. 1 PETROS 1:16

3. Ka don ka jingkyrkhu haba ngi ithuh ia U Trai.

Ha kine ki sngi ngi ju iohsngew ia ki samla wad kam ba ki ju ong, oh lada ym ithuh briew (khamtam ia ki longheh longhaiñ) te mynta jynjar ban ioh kam ioh jam, dei tang kita kiba ithuh briew ki ioh kam. Katno tam lei haba ngi ithuh ia U Trai. U Trai u kular ban kyrkhu ia kita baroh kiba ithuh ia U (kita kiba don ka jingiadei bajan bad U).  

SALM 91:14-15

Namar ba u la buh ïa la ka jingieit ha nga, namar kata, ngan pynim ïa u: ngan kyntiew sha jrong ïa u, namar ba u la ithuh ïa ka kyrteng jong nga. Un khot kyrpad ïa nga, nga ruh ngan phai ktien ïa u; ha ka jynjar ngan long lem bad u: ngan pyllait ïa u, bad ngan pyndonburom ïa u.

Kumno ngin ithuh bha ia U Trai?

U Hosia u ong, "Beh"

1. Beh da kaba ia syllok bad U ha ki jingduwai. 

Kawei na ka lad ba ngin ithuh bha iano iano ka dei ka communication, ka jingiakren kaba na ka por sha ka por. Haba ngi don ka jingiakren (contact) bad ki paralok kaba man ka por kata ka pynlong ba ngin ithuh bad tip bha shaphang jong ki kaei ki long. Kumjuh ruh bad U Trai.

2. Beh da kaba pule ia ka ktien U Blei barobar.

Ha ka ktien jong U la pynpaw lut shaphang kaei ba U Trai u long. Katba ngi nang pule bad puson ha ka ktien U Blei katta ngin nang tip shuh shuh shaphang jong U. My experience

3. Lyngba U Mynsiem Bakhuid.

Ngi donkam ban don ka jingiadei ba jan bad U Mynsiem Bakhuid namar U Mynsiem Bakhuid ruh u ju pynpaw shaphang kaei ba U Trai u long.

1 KORINTH 2:10-11; EPHESOS 1:17-20

Jingkyntu: To ngin beh ban ithuh ïa U Trai, ngin nym hun tang ha kata ka jingiakynduh shisien, hynrei ngin nang beh ban ithuh bha ia U haduh ba ngin da iohi ia U mar khmat kumba U long hi.

To U Blei un kyrkhu. Amen

Copyright © Jester Mawlong | May 14, 20

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.