ESEKIEL 47:1-12
Ha kane ka lynnong bad ki dkhot ngi iohi ia ka jingithuhpaw jong U Esekiel shaphang ki um kiba mih na ka temple bad ia u briew uba rah ryngkat bad u sai thew.
Ha ka dkhot banyngkong bad baar, ngi iohi kumno ba uta u briew u la ialam ia u Esekiel sawdong kata ka temple ban pyni ha u nangno kata ka um ka mih bad kumno ka tuid.
Shuwa ba un thew, u ialam shuwa bad hadien kata u sa sdang ban thew.
Jinghikai: Shuwa ba ngin iohi ia kiei kiei kiba khraw, ngi hap ban long shuwa kiba shah ialam ha U Mynsiem jong U Trai. Hallelujah!
Kynmaw U Blei um ju rah ia u briew kumto kumto, hynrei step by step.
Don ki briew mar sien sdang ki kwah ba U Blei un rah noh joit ia ki shajrong, ki kwah ba ki briew ruh kin iohi noh bad kin burom bad kyntiew ia ki, bad haba ki iohi ba kam long kumta, ki noh mynsiem noh bad don ruh kiba phaidien noh. Kane kam long satia ka lynti kaba dei.
Phai biang sha u Ezekiel
Ynda u la ialam sawdong, u sdang ban thew shuwa shihajar pruh, nangta u la pyniaid, (ong lang, u la pyniaid). U thew ma u, u pyniaid ruh ma u. Ngim lah ban leh stad, ngim lah ban iaid hi, leh hi… donkam ba ngin shah ialam step by step.
Ka jingthew ka pyni ia ka jinglong systematic, discipline jong U Blei. Um shu leh lymmuh thurmur, u da thew thik pa thik. Wat ia ki jingai u ai katkum ka jingthew jong ka jingngeit.
Haba u la pyniaid, U Ezekiel ruh u la iaid bad kita ki um ki poi ha matsohlah (v.3). Bad nangta ngi iohi uta u briew u la thew pat sa shihajar pruh, bad u la pyniaid ia U Ezekiel, kita ki um ki la poi ha khohsiew (v.4).
Ngan ong biang, U Blei um ju kyntiew ia u briew shisien kyntiew, hynrei suki pa suk. Tangba um kwah pat ba ngin sah hajuh. Amen
Kynmaw U Blei um lah shah ia ka jingsah hajuh. Ia kane ngi iohi na ka Balang ha Laodikaia. Ka Balang ha Laodikaia ka la neh hajuh, shit ruh em - khriat ruh em. Hajuh. U Blei ong ia kane ka Balang Laodikaia namar ba pha sah hajuh, ngan sa prie noh ia pha. Jingpynpaw 3:14-22.
Um lah shah ia ka jingsah hajuh
U Trai um kwah ba ngin kyrthlap sah ha ita i um ba kot tang ha matsohlah, um kwah ba ngi jngi sah ha ita i um ba kot tang ha mat khohsiew, hynrei u kwah ban thew shuh shuh sa shihajar pruh. Hallelujah!
Thew, iaid, thew, iaid, thew, iaid… Hallelujah!
Para bangeit baieit, U Trai u kwah ban thew sa shihajar pruh na ka bynta jong phi/ngi, hato phi/ngi kloi ne em ban iaid?
U Ezekiel haba uta u nongthew u la thew, u ruh u la iaid.
Nangta ngi iohi une u nongthew u la thew pat sa shihajar pruh, bad u la pyniaid ia u Ezekiel, u ruh u la iaid, bad kita ki um ki la kot ha syngkai. (v.4).
Kaba sngewtynnad ka long wat haduh hangne ruh u Ezekiel u dang shah ba uta u briew un pyniaid ia u. Kaba sngewsih ka long bun bah ki briew ynda haba ki lah sngew ioh jingpynsleh, ki iaid hi noh, kim sngap shuh ia U Mynsiem Bakhuid ba un ialam ia ki, kim sngap shuh wat ia ki Nongialam ruh, ki leh hi iaid hi noh. Bad phin shem kiba kum kita ki briew kim lah ban poi sha kaba kut. Tang shiteng por ki lah ban kyllon noh.
Ngi donkam ban long kiba shah ialam ha U Mynsiem Bakhuid ha ki por baroh.
Nangta u la thew pat sa shihajar pruh, bad u Ezekiel um lah shuh ban iaid lyngba. (v.5)
Kumta une u briew u la kylli ia u Ezekiel u ong, Ko khun me la iohi ia kane? (v.6)
Ka jingmut ka long, mynta me la iohi em ia ka jingkiew jong kata ka um, me lah experience em ia ka bor jong kane ka um, mynta lah biang, ïa, leit phai noh, bad sdang mynta ban iohi ia kiei kiei kiba khraw ha ka jingim. Eg. Ki synran U Jisu ynda la poi ka sngi Pentecost. U Trai u ong lah biang mynta, sdang noh.
Kaei ba U Ezekiel u la iohi:
Ynda lah lah thew ia kata ka shihajar pruh kaba khatduh, u la pynphai pat ia U Ezekiel (vs.5-6). Bad ynda U Ezekiel u la wanphai nangta, u la iohi ia ka bor bad ka jingkyrkhu jong kata ka wah.
1. Ia ki um baroh yn pynbha (v.7-8)
Haba ka wah bah ka tuid, ka kit noh ia ki jaboh jabaiñ baroh ba don ha ka wah, ka pynkhuid phar. Haba ka wahbah U Blei ka tuid, ka pynkhuid ka sait phar ia baroh ka ka jingtngit jong ngi baroh. Ai ba kane ka wah jong U Blei kan pynbhapat ia kano kano kaba la sniew ha ka jingim jong phi.
2. Kan don ka jingim (v.9)
Haba kane ka wah ka tuid, ka don ka jingim, baroh kaba iap ka im. Hallelujah! Lehse ha ka jingim jong phi, kat shaba phai phi iohi tang kaba iap suda, phai sha ka kam ka kam, kaba iap, phai kane ruh iap, katai ruh iap, kaba iap suda. Nga ong ia phi, ai ba yn thew pat sa shihajar pruh, bad hangta phi iohi ba kiei kiei baroh kin im pat. Hallelujah!
3. Kan don ka jingroi byllien (v.9)
Nalor ka jingim, kan roi ruh. Ngi kren eh ia kiei kiei kiba kynja mynsiem. Ka Balang ba nyngkong namar ba ka ngam ha ka wahbah jong U Mynsiem kumta ka im bad ka roi. Kum ka Balang ha kine ki sngi ruh ngi donkam ban ngam ha ka wahum jong U Blei khnang ba ngin iohi ia ka jingim bad jingroi.
Bunsien ngi ialeh shitom da ka bor bad jinglah jong ngi ban pynim bad pynroi ia ka kam, hynrei ngim da iohi eh ia ka breakthrough. La donkam kum ka Balang baroh kawei ban ong, Trai thew ia ngi sa shihajar pruh, bad ialam ia ngi shaba kham jylliew shuh shuh. Hangta ngin sa iohi ia ka jingroi.
Ki synran U Jisu ki la ialeh shitom baroh shi miet, hynrei eiei ruh em kim shym la ngat, dei tad haba U Jisu u la ong ia ki, ñiat sha ba kham jylliew, hangta ki la ngat bun bah eh ki dohkha kiba khraw. LOUKAS 5:4-7
4. Ia ki um ka duriaw yn pynbha (v.9)
Mynne hangtei ngi iohi ia ki um yn pynbha, mynta pat ngi iohi ia ka duriaw. (Lah nang kham khraw ka bor bad ka jingtrei jong U Mynsiem Bakhuid).
Kane ka duriaw ka dei kata ka duriaw baiap, ka bym ju im eiei ruh ha kane ka duriaw, ka bym long jingmyntoi eiei ruh em. Hynrei haba kane ka wah ka la tuid shata, la pynbha pat ia ka, ka don pat ka jingim ha ka. Ka kylla long pat ka jaka jingmyntoi ia ki ba bun. (v.10)
Kata kaba iap, ka bym myntoi, kan kylla long ka jingmyntoi!
Lehse ha ka jingim jong phi, kaba iap suda. Lah long kum ka dohkha kaba iap ha pdeng kata ka duriaw. Nga ong ia phi lada phi kloi ban iaid ia kata ka shi hajar pruh kaba khatduh, phin iohi ba kata kaba iap kan im pat. Kata kaba phi i ka bym myntoi shuh kan kylla long ka jingmyntoi pat. Hallelujah!
5. Ia ka jaka ktieh bad ka jaka ba sah umjiat yn pynbha (v.11)
Paralok baieit, lehse ka ïing ka sem, ki khun ki kti, u lok, ka lok jong phi ki lah kylla long kum kata ka um ktieh, kum kata ka um ba sah umjiat, phi shem ba kam long shuh, ka lah sma iwtung. Hynrei lada ngi la ngam ha kata ka wah, ngi iohi ba U Trai un pynbha pat.
Lehse ngi lah kren, ngi lah pyni da ka buit ka stad jong ngi, hynrei ym iohi dak eiei, nga ong ia phi, ngam ha ka wah jong U Trai, U Blei un saindur hi ia ka longïing longsem jong phi, ia u lok, ka lok, ki khun ki kti jong phi. Hallelujah!
6. Kan don ka jingroi bad ka jingkyrkhu ba khraw (v12)
Jingroi ha ka rep ka riang, ka trei ka ktah, ka koit ka khiah etc.
Jingpynkut: Para bangeit baieit, to ngin nym shu hun tang ha ita i um ba tang ha matsohlah, to ngin nym pat hun tang ha ita i um ba kot tang ha khohsiew lane ha syngkai, hynrei ai ba U Trai un nang thew shuh shuh sa shihajar pruh bad ngin nang ngam kham jylliew shuh shuh.
Ngan pynkut noh hangne, To U Blei un kyrkhu ia phi baroh, Amen.
Copyright © Jester Mawlong | October 2, 2022
Comments
Post a Comment