Hato phi lah don ne em ia U Jisu ha ka dohnud jong phi?

Hato phi lah don ne em ia U Jisu ha ka dohnud jong phi?

Kane ka long ka jingkylli ba ngi hap ban kylli ialade shimet shimet. Ngin nym kylli satia, Hato ngi lah long Khristan ne em? Namar bun bah kita kiba lah kam ialade ba ki lah long Khristan hynrei ki bym pat don ia U Jisu ha ka dohnud jong ki.

U apostle Paul u ong, Ïa lade hi to ïit phi la phi long ne em ha ka jingngeit; ïa lade hi to phrang phi. Hato phim ithuh ïa lade, ba U Jisu Khrist u don ha phi? lymda phi long kiba la kyntait noh. 2 KORINTH 13:5

Ngi donkam ban ïit ia lade, Hato nga lah ngeit ne em ia U Jisu? Hato U Jisu u lah don ne em ha ka dohnud jong nga? Ne nga long tang U Khristan kyrteng.

Lada em, phi donkam kylla bamut noh na ki pop jong phi baroh, ngeit bad pdiang noh ia U ha ka dohnud jong phi mynta.

Balei ngi donkam ban pdiang ia U Jisu ha ka dohnud jong ngi?

1. BA NGIN IOH LEIT HAPOH KA HIMA U BLEI.

Lada ngan kylli ia phi, katno ngut kiba kwah ban leit sha bneng, nga ngeit baroh phin ong nga kwah. Yn nym don satia u ban ong, em ngam kwah, nga te nga kwah ban leit sha dujok. Lada don uba ong kumta ruh sa tang u briew uba u soitan u lah ioh ban synshar tylli ia u. Hynrei baroh hi ngi kwah ban leit sha bneng. 

Kumta ba ngin ioh leit shapoh ka hima U Blei ngi donkam ban don ia U Jisu ha ka dohnud jong ngi, khlem U Jisu ngin nym lah ban rung ha bneng.

Ha ka pyrthei ngi donkam ia ki ID bapher bapher:

* Khlem ka EPIC Card ngin nym lah ban leit thep vote.

* Khlem ka Rashon card ngin lah ban ioh Rashon (khaw,etc)

* La jan baroh la donkam ID.

BAN LEIT SHA BNENG DONKAM IA U JISU.

U long ma U ka identity card jong ngi ban leit sha bneng. Ngin nym lah satia ban pyni da ki certificate ba ngi ioh na Balang, ngin nym lah ban pyni da kino kino ki certificate jong ki achievement jong ngi, jong ki jinglehbha jong ngi, hynrei dei tang da U Jisu.

IOANNIS 14:6, U Jisu u ong, “Nga uba long kata ka lynti, bad ka jingshisha, bad ka jingim de: ym don uba wan ha U Kpa, hynrei, tang da nga."

U Jisu u ong shuh shuh ha ka gospel MATHAÏOS 7:21‭-‬23, “Ym u briew baroh uba ong ha nga, ‘A Trai, A Trai’, u ban ïoh leit hapoh ka hima ki bneng; hynrei, uta keiñ uba leh ïa ka mon U Kpa jong nga uba ha bneng. Shibun kin ïa-ong ha nga ha kata ka sngi, ‘A Trai, A Trai, ngi ngim shym la ïalap ha ka kyrteng jong me? Ngi ngim shym la beh noh ïa ki ksuid ha ka kyrteng jong me? Ngi ngim shym la leh shibun ki kambah ruh ha ka kyrteng jong me?’ Ynda kumta te, nga ruh ngan ong pyrshah ha ki: Ngam ju la ithuh ïa phi; khie leit noh na nga, phi kiba ju trei bymman. 

Hangne U Jisu u kren shai, ba ym tang ba ngi ong, Ah Trai, Ah Trai...ngin ioh leit noh hapoh ka hima Blei... hynrei tang uta kein uba leh ia ka mon jong U kpa ba ha bneng.

Lehse phi lah ban kylli, Kaei kata ka mon jong U kpa ba ha bneng?

Ka mon jong U kpa ba ha bneng ka long ba ngin ngeit bad pdiang ia U Jisu ha ka dohnud jong ngi.

ÏOANNIS 6:40

Namar kane ka long ka mon U Kpa jong nga, ba u briew baroh uba ïohi ïa U Khun bad uba ngeit ha U, un ïoh ka jingim bymjukut, bad ba ngan pynmih pat ïa u ha ka sngi ka bakhatduh.”

Ngim lah ban shu sngewshngain tang ba ngi lah nang ban ong, Ah Trai, Ah Trai. Hynrei ngi donkam ban pyntikna ba U Jisu u lah don ha ka dohnud jong ngi. Lym kumta ngin nym ioh ban leit hapoh ka hima U Blei.

Dei tang kita kiba don ia U Jisu ha ka dohnud jong ki, ki ban ioh leit shapoh ka hima bneng, namar U long ma U kata ka lynti sha U kpa sha bneng.

ÏOANNIS 14:6

“Nga uba long kata ka lynti, bad ka jingshisha, bad ka jingim de: ym don uba wan ha U Kpa, hynrei, tang da nga. 

2. BA NGIN YM JOT SHUH HYNREI BA NGIN IOH KA JINGIM BYMJUKUT 

ÏOANNIS 3:16

“Naba U Blei u la ieit katta katta ïa ka pyrthei katba u la aiti noh ïa la U Khun ba la kha marwei, ba uei uei ruh uba ngeit ha u, un ym jot shuh, hynrei, un ïoh ka jingim bymjukut.

Kaba nyngkong ngi hap ban sngewthuh, U Blei ha kawei ka sngi un sa pynjot ia ka pyrthei ba pop, ia kita baroh ki bym pdiang ia U Jisu yn sa pynjot ia ki da kaba yn thang da ka ding bymjukut (ka dujok). Hynrei kita kiba don ia U Jisu yn nym pynjot satia.

Paralok baieit, to ngin nym khein sting ia la ka jong ka jingim, to ngin nym khein sting ia kane ka jingialap. 

Kynmaw ia ki briew jong ka Sodom haba U Lot u ialap ba U Blei un sa thang ia ka da ka ding, ki briew jong ka Sodom ki kren shutia pynban ia u, hynrei ynda U Blei U la pynhap slap da ka ding, ki sa ngeit pleng ka long kaba shisha ba u Lot u ialap, hynrei kata ka lah dier palat ia ki, baroh ki la shah pynjot ha kata ka ding.

Kawei pat ka nuksa ngi iohi ia ki briew ha ka por U Noah, katba U Noah u ialap ba U Blei un sa pynshlei ia ka pyrthei da ka um, ki kren beiñ ki rkhie beiñ ia u, hynrei ynda ka jingshlei ka wan, ki la lynniar bad babe.

Paralok baieit, to ngin nym long kum kine ki briew ha ka por jong U Lot bad U Noah, hynrei to ngin ngeit bad pdiang ia U Jisu ha ka dohnud jong ngi ba ngi lait na kata ka jingpynjot ba shyrkhei. 

Lehse mynta phi sngew ba kam lei lei ia nga lada ngam pdiang ia U Jisu ruh, hynrei nga ong ia phi kan sa poi ka por lada phim ngeit phin sa babe junom.

Hynrei lada phi ngeit bad pdiang ia U Jisu, phin ioh ia ka jingim bymjukut.

 1 ÏOANNIS 5:11-12

Te kane ka long kata ka jingphla, ba U Blei u la ai ha ngi ïa ka jingim bymjukut, bad kane ka jingim ka long ha U Khun jong u. Uta uba don uta U Khun, u don kata ka jingim; te uta u bymdon U Khun U Blei, um don kata ka jingim. 

Ka jingim bymjukut ka don tang ha U Jisu, dei tang kita kiba don ia U Jisu kin ioh ia ka jingim bymjukut.

U Jisu u ïathuh ha u, “Nga uba long kata ka lynti, bad ka jingshisha, bad ka jingim de: ym don uba wan ha U Kpa, hynrei, tang da nga. ÏOANNIS 14:6

Kumta ngeit bad pdiang noh ia U Jisu mynta ba phin ym jot shuh bad ba phin ioh ia ka jingim bymjukut.

3. BA NGIN LAIT NA KA JINGBITAR JONG U BLEI.

ROM 1:18

Namar ïa ka jingbitar U Blei la pynpaw na bneng pyrshah ïa ka jingbymriewblei bad ïa ka jingbymhok baroh phar ki jong ki briew, kiba pynpep keiñ ïa ka jingshisha da ka jingbymhok jong ki. (Pule ter ter)

 

Ka ktien jong U Blei ka iathuh ia ngi ba U Blei un sa pynpaw ia la ka jingbitar pyrshah ia ka jingbymriewblei. Kynmaw ka jingim bymriewblei, ka jingim pop bym treh ban kylla bamut jong ngi ka pynbitar ia U Blei.

Hooid U Blei U long uba jemnud, uba suki ban bitar, (um ju bitar klumar) ong ka Ktien jong U Blei, hynrei lada ngi iai pyneh ia la ka dohnud bad ngi iai kyntait ia ka jingkhot ieit jong U, un sa bitar pyrshah ia ngi bad haba U Blei u bitar, uei lah ban shah?

HEB. 10:31 KHASICLBSI

Ka long kaei kaei kaba shyrkhei ban hap ha ki kti jong U Blei uba im!

NAHUM 1:6

Uei uba lah ban ïeng ha khmat ka jingotshla jong u? Bad uei uba lah ban shah ïa ka jingmeh ka jingbitar jong u? Ïa ka jingotshla jong u la theh noh kum ka ding, bad ïa ki mawsiang la pynpait ar liang da u.

Paralok baieit, ngin nym lah satia ban shah lada U Blei U bitar. Kumta ban lait na kata ka jingbitar jong U, donkam ban kylla bamut, pdiang ia U Jisu ha ka dohnud jong phi. Dei tang kita kiba don ia U Jisu kin lait na kata ka jingbitar U Blei, lym kumta ngin nym lait satia.

IOANNIS 3:36

Uta uba ngeit ha U Khun, u don ka jingim bymjukut; uta te u bymkohnguh ïa U Khun, un ym ïohi ïa ka jingim: hynrei, ka jingbitar jong U Blei ka ïaisah halor jong u.

ROM 5:9

Te kham tam shibun, haba mynta la pynksan ïa ngi da ka snam jong u, yn pynim ïa ngi da u na kata ka jingbitar U Blei.

U Blei un kyrkhu. Amen

© Jester Mawlong | Dec 28, 2022

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.