Ka jingpynlut por ban don bad U Jisu ka long kaba donkam palat ha ka jingim jong ngi ki bangeit bad ki briew jong U Blei. (Nga kren ialade nyngkong, bad ia kiwei ruh kumjuh). Ka jingpynlut por ban don bad U Jisu ka don ka jingkyrkhu bakhraw, kham tam ha ka jingshakri ia U Trai.
Ngi iohi shaphang U Petros bad U Ïoannis wat la mynshuwa ki long ki briew kiba ka pyrthei kam ju ithuh ia ki, ka pyrthei kam patiaw eiei shaphang jong ki, ki long ki bym long eiei, (tang ki nongtong dohkha) hynrei hadien ba ki la iashem bad U Jisu bad ki la pynlut por ruh ban don bad U ha ki por baroh bad kata ka jingdon jong ki bad U Jisu ka la pynkylla bak-lybak ia ka jingim bad ka jingshakri jong ki.
Pule na ka kitab Ki Kam ki Apostol 4:1-22, phin shem ia kane ka bynta.
To ngin ia peit mynta ia ka jingmih lane ka jingkyrkhu na kaba don bad U Jisu:
1. Ka pynioh ia ka jingshlur
4:13a, Te haba ki la khmih thuh ïa kata ka jingshlur jong u Petros bad u Ïoannis…
Haba nga kren shaphang kane ka jingshlur, nga kham kren eh ïa kata ka jingshlur na ka bynta kiei kiei kiba kynja mynsiem, ka jingshlur na ka bynta U Trai.
Balei ki briew, ki samla kim don jingshlur ban ialap, ban phla ia U Trai sha kiwei pat wat ha ka por basuk pyrthei, ka dei namar ka jingduna ka jingpynlut por bad U Jisu.
U Petros bad U Ïoannis wat haba la rah ia ki ha khmat ka dorbar, bad la mana ia ki ba ym bit shuh ban ialap shaphang U Jisu, hynrei ki dang ialap. Ki da ong ruh ba ngi dei ban kohnguh ia U Blei ban ia u briew.
KI KAM 4:19
Hynrei, u Petros bad u Ïoannis ki la ïathuh bad ki la ong ha ki, “La ka shong hok ha khmat U Blei ban sngap ïa phi kham tam ban ïa U Blei, to khan ma phi:
# - Ka jingdon bad U Jisu ka pynioh ia kata ka jingshlur wat ban iap na ka bynta U Khrist ruh kim salia.
2. Ka pynioh ia ka jingstad bad ka jingshemphang
La record ha ka Bible ba U Petros bad U Ïoannis ki long ki briew kiba bieit, ki bym nang bym stad (illiterate), hynrei namar ba ki dei ki briew kiba ju don bad U Jisu, U Trai u la ai ha ki ka jingstad ha kaba wat ki riewstad pyrthei ki ktha khlieh ha khmat jong ki.
KI KAM 4:13
Te haba ki la khmih thuh ïa kata ka jingshlur jong u Petros bad u Ïoannis, bad ki la sngewthuh ruh ba ki long ki briew kiba khlem jinghikai bad kiba bieit, ki la ïasngewphylla; hynrei, ki la ithuh ïa ki, ba ki la ju don lem bad U Jisu.
Kaei kaba pynlong ia kine kiba bieit (illiterate) ba kin stad katne katne? Ka dei ka jingdon jong ki bad U Jisu. (4:13b hynrei, ki la ithuh ïa ki, ba ki la ju don lem bad U Jisu.)
Ngi im ha ka pyrthei ha kaba ngi kham pynlut por ban wad jingstad na ka pyrthei, na ka internet, ngi la duna shibun ka jingpynlut por ban don bad U Jisu, dei namar kata ka daw wat la ngi ioh jingstad ruh ngim lah ban pynkylla khongpong ia ka pyrthei (nga kren ia kaba kynja mynsiem). Wat haba ngi hikai 'tien Blei ngi la shu hikai kum u nongthoh te ym kum uba donbor. Ngi don ka jingtip ngi don ka jingstad, hynrei ka bor ngim don. U Jisu namar ba u ju pynlut por ban don bad U Kpa, kumta haba u hikai ki briew ki lyngngoh lut.
MATHAÏOS 7:28-29
²⁸Ka la jia ruh, haba U Jisu u la wai noh ïa kine ki ktien, ba kita ki paidbah ki la ïasngewkyndit thred na ka jinghikai jong u: ²⁹naba u la hikai ïa ki kum uba don bor, bym kum ki nongthoh te.
# - Ka jingstad ba ngi ioh na ka jingpynlut por bad U Trai ka pynkyndit ia kiba iohsngew!
Note: Lada phi kwah ban ioh jingstad, pynlut por ban don bad U Jisu.
3. Ka pynioh ia ka bor
U Petros bad U Ïoannis ki dei tang ki riew madan (an ordinary men), hynrei kumno ki lah ban leh ia ki kambah bad ki dak khyllah? Ka dei namar ba ki dei ki briew kiba ju don bad U Jisu.
Lada ngi kwah ban iohi ia ka bor U Trai ha ka jingshakri jong ngi, ngi donkam ban pynlut por ban don bad U Jisu, ha ki jingduwai bad jingiasyllok bad U ha ki por baroh. Ngim lah ban shu kam kynti ia ka jingthoh 'ba la ai ha ngi ia ka bor bad ka iktiar' khlem da pynlut shuh ban don bad U Jisu, kata kam long ban long ne trei kam. Ngi donkam ka jingpynlut por bad U barobor.
Nga ngeit haba ngi leh kumta, ngin iohi ia ka jingtrei bad ka bor U Blei ha ka jingshakri jong ngi. Hallelujah!
U Blei un kyrkhu ia ngi lang baroh. Amen
© Jester Mawlong | Sept 4, 2023
Comments
Post a Comment