Ka jingmyntoi jong ka jingngeit

Ka jingmyntoi jong ka jingngeit

Jinglamphrang: Ka don ka jingmyntoi bakhraw haba ngi don ka jingngeit ha U Jisu. Haba ngi pule ha ka Bible ngi iohi kiba bun ki briew ki la mad ia ka jingkyrkhu tang da kaba shu ngeit ha U Jisu. Bad lada ngi ruh ngi don ka jingngeit ngin dang iohi bad ioh mad ia ki jingkyrkhu lyngba ka jingngeit jong ngi ha U Jisu Khrist, namar ka Bible ka iathuh ia ngi ba U Jisu Khrist u long u juh,l mynnin, mynta bad sha bymjukut. (Heb 13:8). Kaba mut kumba u leh ki kambah mynshuwa, mynta ruh un dang iai leh. Amen 

1. Ka jingngeit ka wanrah ia ka jingpynim

Ha ka shithi sha ki nong Ephesos 2:8-9 ka ong ba da ka jingaiei la pynim ia phi, kata da ka jingngeit keiñ ha U Jisu Khrist. Haba ngi ngeit ha U Jisu Khrist ngin ioh ia ka jingpynim.

* Ioan 3:16 uno uno uba ngeit...

* Ioan 5:24 un nym hap ha ka jingbishar ba khatduh

* ROM 1:17…ka long ka bor ban pynim ia uba ngeit

* Loukas 7:50 ka jingngeit jong pha ka la pynim ia pha

U Noah u la lait im na ka jingshlei um dei namar ka jingngeit - Hebru 11:7

2. Ka wanrah ia ka jubab ia ka jingduwai

MATHAÏOS 21:22

Bad ïa kiei kiei baroh kat kiba phin pan ha ka jingduwai da kaba ngeit, phin pdiang.”

MARKOS 11:24

Namar kata, nga ong ha phi, ba kiei kiei baroh kat kiba phi pan, haba phi kyrpad, to ngeit ba phi pdiang ïa kita, te phin sa ïoh.

 Ha kine ki ar tylli ki dkhot ngi iohi ia kaei ba U Jisu u ong, ba lada ngi pan eiei na U ngi donkam ban pan ha ka jingngeit, bad haba ngi don ka jingngeit ngin iohpdiang, hynrei lada ngim don jingngeit, ngi artatien da lei lei ngin ym iohpdiang satia.

U Jakob u ong ba lada ngi pan eiei na U Blei ngi hap ban pan da ka jingngeit, khlem artatien eiei ruh em (Jakob 1:5) 

e g: Ka Hannah ka briew ba lyngki, ka la pan da ka jingngeit ban ioh khun shynrang, kumta ka la ioh ia kaei ba ka la pan. U Blei U la ai khun shynrang ha ka.

3. Ka pynioh ha ngi ia ki jingkular baroh jong ka Ktien U Blei

Ha ka shithi ba nyngkong sha ki nong Korinth 1:20 la thoh ba baroh ki jingkular jong U Blei, ha U ki long kiba hooid bad amen. Kane ka kren ia ka jinglong thikna jong ka jingkular U Blei, bad ban ioh ia katei ka jingkular baroh, ngi donkam ka jingngeit ha U Jisu Khrist.

U Blei u la kular ia U Abraham & Ka Sara ban ai khun shynrang ia ki. Kumta U Abraham ban ioh ia katei kaba la ngeit bad iai ngeit kampher katno ka shim por. (Rom 4:13-21). Ka Bible ka iathuh ia ngi ba U Abraham u la iai ngeit haduh 25 snem ban ioh ia kaba la kular U Blei.

U Blei u la kular ban ai khun shynrang ia ki, ki donkam ban ngeit, bad haba ki la ngeit, ki la ioh ia kata kaba la kular. Hallelujah

Baroh ki jingkular jong U Blei kynthup: jingpynim, jingpynkhiah, jingioh jingkot, jingsuk jingkmen, etc kine baroh ngin ioh da ka jingngeit

4. Ka pynsngewbha ia U Blei

Ym don kaba U Blei u kham sngewbha, ban ia kaba ngi ngeit bad shaniah lut ha U.

 

HEBRU 11:6 

"... hynrei, khlem ka jingngeit, ym lah ban pynsngewbha ïa u: namar ka dei ïa uta uba wan hajan U Blei ban ngeit ba u don, bad ba u long uba ai nong ïa kita kiba wad ïa u.

Ka jingbymngeit ka dei kawei kaba U Blei u sngewsih eh. U Blei u la sngewsih ia ki khun Israel ha ri khlaw namar ka jingbymngeit jong ki. Ki la iap lut ha ri khlaw, kim shym la poi sha ri jingkular.

Heb 3:7-19 Cf. Jingkheiñ 14:

Note: Ka jingbymngeit ka dei kata ka jingartatien shaphang U Blei.

Ki khun Israel ki artatien shaphang U Blei, tip U lah ne em ban ialam bad pynpoi ia ki sha kata ka ri jingkular. Kata ka jingartatien jong ki shaphang U Blei ka la pynsngewsih eh ia U Blei bad da shisha kim shym la poi sha ka ri jingkular, baroh ki la iap ha ri khlaw.

Ka dei ia ngi ban ngeit ba U Blei u long uba lah ban leh ia kiei kiei baroh. Heb 11:6b

5. Ka jingngeit ka long ka bor ba kynja mynsiem na ka bynta ka jingshakri.

U Jisu ia ki synran, u khot ia ki bangeit sha ka jingshakri (ministry), kumta ba ngi lah ban shakri (function) kumba dei bad kumba U Jisu U khmih lynti, ngi donkam ia ka jingngeit, bad haba ngi don ka jingngeit ka jingshakri jong ngi kan long kaba seisoh (affective).

Pule:

* Mar 16:15-18

* Mat 17:14-20

* Mar 11:23 wat ki lumbah ki kynriah haba ngi shakri da ka jingngeit.

6. Ka jingngeit ka wanrah ia ka jingpynkhiah

Ka jingkular ia ka jingpynkhiah la kular da U Blei, kumta ba ngin ioh jingpynkhiah ngi donkam ka jingngeit.

* Ia uba pang ñiangthohlieh ka pynkhuid. Louk 17:11-19 

* Ka kynthei ba pang mihsnam ka la khiah. Louk 8:43-48

* U Bartimaios ba matlah u la ioh imat pat. Mar 10:46-52 

Kiba bun ki nuksa ha ka Bible, kumno da ka jingngeit ki briew ki la ioh jingpynkhiah wat na ki jingpang ba shyrkhei. Ngi ruh ngin ioh pdiang lada ngi ngeit. Hallelujah!

7. Ka jingngeit ka pynlong ban iohi ia ka burom jong U Blei 

Ka Mari bad Martha ki la duh jingkyrmen na ka bynta u para jong ki, hynrei U Jisu u ong, lada phan ngeit phan iohi ia ka burom jong U Blei. Ioan 11:38-44

Shibun kiwei pat ki nuksa kiba ngi iohi ha ka Bible, kumno haba ki briew ki ngeit, ki iohi shisha ia ka burom jong U Blei, ha ki bynta bapher bapher jong ka jingiashem jong ki.

Ngi ruh ngin iohi, bad iai iohi lada ngi iai im bad iai iaid da ka jingngeit. Amen

Para bangeit baieit, U Blei u kwah ia ngi ba ngin ngeit lut ha U, ba ngin im bad iaid da ka jingngeit ha la ka sngi.

Pule:

- Habakuk 2:4 

- Rom 1:17

- Gal 3:11

- Heb 10:38

Jingduwai: "Ah Trai to pynroi ïa ka jingngeit jong ngi!” LOUKAS 17:5

 

To U Blei un kyrkhu ia phi baroh. Amen 

© Jester Mawlong | Oct 31, 2023