Nud ban rung lyngba ki lynti ba U Blei u mut ban pyndonkam ia phi

Nud ban rung lyngba ki lynti ba U Blei u mut ban pyndonkam ia phi

U Blei u don la ki jong ki jong ki lynti (process) ban pyniaid ia u briew ha shuwa ba un pyndonkam ia u, bad lada uta u briew u lah ban iaid lyngba kita ki lynti (process), ngi ju iohi kumno ba U Blei u da pyndonkam radbah ia uta u briew, hynrei lada u briew um nud ban iaid lyngba, un shu kut noh kumto bad un nym lah ban poi shano shano ruh.

Ngin ia peit mynta na ki katto katne ki briew kiba U Blei shuwa ba un pyndonkam ia ki, u la shah ba kin iaid lyngba ia ki lynti bapher bapher ha ka jingim jong ki. Bad haba kine ki briew ki la nud ban iaid lyngba ia kita ki lynti, ngi iohi kumno ba U Blei u la pyndonkam borbah eh ia ki.

1. U Moses

U Blei shuwa ba un pyndonkam ia u Moses u la pyniaid ia u lyngba ki lynti tang kum u nongap jingri jong u kthaw kurim jong u. 

Hato phi la ju pyrkhat ia kane ka lynti ba u Moses u la iaid? Mut dur, u pyrsa kurim un long tang kum u nongap blang! Ha ka jingpyrkhat jong ngi, ngi sngew kata ka lah dei ka jingleh ñiewbeiñ (insult) ia la u pyrsa kurim. Lada dei ma ngi lehse ngin jin da la ong, u kthaw aiu kum une, kat ia u pyrsa kurim ruh u dang nud ban phah ap blang. Hynrei U Moses u la nud ban iaid lyngba ia kata ka lynti, da kaba u la bret sharud ia ki jingsngew briew baroh bad u la ap bad sharai hok ia kita ki jingri jong u kthaw kurim bad dei lyngba kane ka lynti, ba u la iashem bad U Blei halor u lum Horeb (Sinai) bad u la ïohsngew ruh ia ka jingkhot bashai jong U Blei. Hallelujah 

EKSODOS 3:1‭-‬4

¹Te u Moses u la dang ap ïa ka kynhun u Jethro u kthaw kurim jong u, uba u lyngdoh ka ri Midian: bad u la ïalam ïa kata ka kynhun sha lyndet ka ri khlaw, bad u la wan sha u lum U Blei, sha Horeb keiñ. ²Bad u angel U Trai u la mihpaw ha u ha ka thylliej ding napdeng ka 'law lynnong: te u la khmih, bad ha khmih, kata ka 'law lynnong ka la ing da ka ding, hynrei, kata ka 'law lynnong kam ing duh noh. ³Te u Moses u la ong, “Ngan phai kyrpang mynta ban khmih ïa kane ka jingipaw bakhraw, na ka balei ba ka 'law lynnong kam ing duh noh.” ⁴Te mynba U Trai u la ïohi ba u la phai kyrpang ban jngoh, U Blei u la khot ïa u napdeng kata ka 'law lynnong, bad u da ong, “Ko Moses, Ko Moses.” U te u la ïathuh, “Ha khmih ma nga.”

Lada U Moses un phet noh na ïing u kthaw kurim namar ba u sngewpoh ba u kthaw u phah ap blang ia u, un jin nym da la ia kynduh bad U Blei ha Horeb. Ainguh ia U Blei, u Moses um shym la don ia kata ka mynsiem, kumta u la ia shem bad U Blei. Hallelujah 

Bunsien ki briew haba ki sngew ba U Blei u khot ia ki, ki nang mut ba kiei kiei kin iaid beit bad sngewtynnad. Ki pyrkhat ba ki briew kin treat bha ia ki, ki briew kin burom ia ki, bad haba ki iohi ba kam long kumta, ki duh mynsiem bad ki sangeh noh. Nga kwah ban ong ia phi lada phi nud ban iaid lyngba ia kita ki lynti phin shem ba U Blei un pyndonkam borbah ia phi.

Note: Nud ban rung lyngba ki lynti ba U Blei u mut ban pyndonkam ia phi.

2. U Joseph

U Joseph u dei u briew uba don ka jingiohipaw (vision) na U Blei, ba un sa long uta u Nongialam uba khraw (JENESIS 37:5‭-‬11). Pynban namar kane ka jingiohipaw (vision) u la shah isih ha la ki jong ki hynmen, ha kaba ki la mut ruh ban pyniap noh ia u bad ki la bret ia u ha ka thliew um (JENESIS 37:19-20), hynrei ainguh ia U Blei ba kam shym la don um ha kata ka thliew bad U Joseph um shym la iap noh hangta. Pynban ka jingtynjuh kam pat kut. 

Hadien ba ki hynmen jong u ki iohi ba um shym la iap, ki la sei noh ia u nangta bad die noh ia u kum u mraw ha ki kynja Ishmael tang 20 ki sbai rupa (JENESIS 37:25-28). Bad kine ki kynja Ishmael pat ki la ialam noh ia u sha Ijipt bad ki la die mraw pateng ia u ha u Potiphar (JENESIS 37:36). Hangne ruh ka jingtynjuh ia u Joseph kam pat kut. U la ia kynduh sa ka jingtynjuh kaba kham eh, ha kaba ka tnga uta u kynrad jong u (U Potiphar) ka la iapmat ia u bad ka la pynbor ba un ia thiah (shongkurim/klim) bad ka. 

Lada u Joseph un leh ia kata, kan long ka pop pyrshah ia U Blei. Hynrei U Joseph um shym la kohnguh ia ka, bad haba kam lah ban pynkohnguh, ka la shu pharep noh da kaba ong, ba u mut ban leh bor (rape) ia ka. Kumta namar kata ka jingpharep, la rai rem ia U Joseph bad la bret ia u ha ïing byndi (JENESIS 39:1-23), hynrei U Trai um shym la iehnoh ia u, U la donryngkat bad U Joseph wat ha kata ka ïing byndi.

Mut dur lada u Joseph un ong, oh imat kato ka jingiohipaw kam dei kaba shisha, imat U Blei um khot ia nga, un jin da la leh pop noh bad im lyngkar noh, shaei un poi? Hynrei U Joseph u la nud ban iaid lyngba kita ki lynti ba U Blei u mut ban pyndonkam ia u, khlem da phaidien noh, bad ngi iohi ha kaba kut u la long da shisha u Nongialam uba khraw, ha kaba u la long ka jingkyrkhu ia ka ïing ka sem, ka ri bad ia ki ba bun ki jaid bynriew. (JENESIS)

3. Ka jingshakri tang kum u nongiarap (helper)

Ka kyntien helper (nongiarap) ka long ka kyntien kaba kiba bun lehse kim da sngewtynnad. Ki kheiñ ba ka dei ka kam kaba poh. Hynrei lada phin study ia ka jingim jong ki briew ba khraw jong U Blei phin shem bun na ki ki dei tang ki nongiarap (helper) jongno re jongno, ki nongrah pla jong ki pastor jong ki, bad kumta ter ter. Pynban haba ki iaineh bad ki nud ban iaid lyngba ia kata ka lynti, U Blei u la pyndonkam borbah ia ki. 

Paralok baieit, lehse phi ruh phi la iaid lyngba ia kata ka lynti kum u helper, ha kaba bunsien ruh ka ju wan kata ka jingsngew ba kane ka dei ka kam kaba poh, ka dei ka jingleh ñiewbeiñ ia nga. Hynrei nga ong ia phi, lada phi nud ban iaid lyngba ia kata ka lynti, U Trai un pyndonkam borbah ia phi ruh.

Nga ruh nga la iaid lyngba kata ka lynti, nga la rung sha ka ministry tang kum u helper ha office Balang, hooid ha kaba sdang ka don kata ka jingsngew, hynrei nga sngewthuh ba kane ka dei ka lynti ba U Blei u mut ban pyndonkam ia nga, kumta nga la pyniap ia kata ka jingsngew, bad nga la iaid shaphang ban shakri ia U Trai haduh mynta.  

Ka jingkyntu ka long to ngin nym sngewpoh ban shim ia ka kyrdan helper, pyrkhat shaphang U Mynsiem Bakhuid, U dei U Blei ha ki lai ha Uwei, hynrei u shim ia ka kyrdan kum u nongiarap (helper). ÏOANNIS 14:16, 26; 15:26

4. Ka jingshakri kaba tang kum ka tyre spare.

Teng teng U Blei u lah ban pyniaid ia phi lyngba ki lynti kiba long tang kum ka tyre spare. Ha kaba ki briew kin shu pyndonkam tang haba kut lad, lane tang haba ym don da kiwei pat. Hynrei lada ngi nud ban iaid lyngba wat ia kaba kum kata ka lynti ruh, phin shem ba U Blei un pyndonkam ia phi ha ka rukom kaba kham pher.

Kane ruh ka dei kaba nga lah experience (mad) ha ka jingim bad ka jingshakri. Ainguh ia U Blei ba u ai ka jingaiei ba nga lah ban iaid lyngba ia kaba kum kane ka lynti ruh. Ngam ju don jingsngew eiei.

Ai ba kane kan long ka jingai mynsiem ia phi, lada kumno re kumno phi ia kynduh ia kaba kum kane ka lynti ba phin nym sangeh (give up) noh, hynrei phin iaid shaphang, pyndep hok ia kata ka bynta kaba phi ioh, nga ngeit U Blei un pyndonburom ia phi.

Kine ki long ki jinghikai kumno ba ngi dei ban long kiba shlur bad kiba nud ban rung lyngba ia kino kino ki lynti ba U Blei u mut ban pyndonkam ia phi. Ngi la ia peit shaphang u Moses, u Joseph kumno haba ki la nud ban rung lyngba ia kata ka lynti ba U Blei u mut ban pyndonkam ia ki, ki la long shisha ki briew kiba khraw jong U Blei. U Blei un leh kumta ruh ia phi lada phi ruh phi nud ban rung lyngba.

U Blei un kyrkhu. Amen 

© Jester Mawlong | Nov 29, 2023