U Jisu Khrist - Ka jingkyrmen ia kiba la duh jingkyrmen

U Jisu Khrist - Ka jingkyrmen ia kiba la duh jingkyrmen

JEREMAÏAH 29:11

Naba nga tip ïa ki jingmut kiba nga pyrkhat shaphang jong phi,’ ” ong U Trai, “ki jingmut ka jingsuk keiñ, te ym ki jong ka jingsniew, ban ai ka jingkyrmen ïa phi ha ka por bakut jong phi.

Paralok baieit, lada phi la duh jingkyrmen ha ka jingim, phai sha U Jisu. Ha U Jisu ym ju don ka jingduh jingkyrmen. Ngi iohi ha ka Bible, kiba bun bah ki briew kiba la duh jingkyrmen, kiba la kut lad ka jingim, hynrei haba ki phai sha U Jisu, U Jisu u ai pat ka jingkyrmen ia ka jingim jong ki. 

 

1. U BARTIMAIOS

Uei une U Bartimaios? Ka Bible ka iathuh ia ngi ba U Bartimaios u dei u briew uba matlah bad namar kata ka jingmatlah, u la hap ban shu makia bad ban shu khrong harud lynti. MARKOS 10:46 ter ter.

Mut dur haduh katno ka jingsyrtok ka jingim jong u bapli. Um iohi ia ka bneng ka khyndew, um iohi shuh wat ia la ka kmie ba kha ba pun ia u, etc. Hynrei ha kawei ka sngi katba u dang shong khrong harud lynti, u la iohsngew ba U Jisu u iaid lynti nangta, bad kumta hi u la ieng joit bad u la pyrta da ka sur bajam ban ong, Ko Jisu me U Khun U Dabid to isynei ia nga. 

Ki paidbah ha kata ka por ki la ia mai ia u ba un sngap jar, namar ki sngew lehrain ba u pyrta jam, hynrei u Bartimaios um sngap satia, u la iai pyrta bad khot ia U Jisu haduh ba U Jisu un da iohsngew bad u la pynpeit pat ia ki khmat jong u.

U briew ba la duh jingkyrmen, ka jingim kaba la shu makia bad khrong, u la ioh ia ka jingkyrmen ba thymmai ha ka jingim. U la im kumba kiwei pat ki im.

Paralok baieit, lehse ka jingim jong phi ka la ia syriem bad U Bartimaios, la ker sawdong ia phi da ka jingdum, kat shaba phai phi iohi satang ka jingdum (phi lah ban iohi ki khmat, hynrei ka jingdum ka tap lup ia phi), kat shaba phai satang ka jingduh jingkyrmen, nga kwah ban iathuh ia phi, ba don U Jisu u ban ai jingkyrmen ia phi bad u ban weng noh ia baroh ki jingkahdum ha ka jingim jong phi.

Kaei kaba phi donkam ban leh ka long, wan sha U Jisu.

Ieng joit na kata ka jingduh jingkyrmen! Mareh sha U Jisu. Wat sngap ia ki jingsngew jong phi, wat sngap ki briew kin ong kumno, hynrei mareh kumba U Bartimaios u mareh sha U Jisu, un ai ka jingkyrmen ia phi.

Ah lada u Bartimaios un pynsngap ia ka jingsngew lane ka jingong jong ki briew un jin da la sah matlah baroh shirta, un jin da la khrong sah. Hynrei namar ba um shym la pynsngap, u la mareh bad u la iohi imat pat ki khmat jong u. Hallelujah

U Jisu Khrist u dang long u juh mynta, ong ka ktien U Blei. HEBRU 13:8 Lada phin wan sha U, un ai ka jingkyrmen ia phi.

ÏOANNIS 6:37

Baroh ba uta U Kpa u ai ha nga, kin wan ha nga: uta te uba wan ha nga, da lei lei ngan ym kyntait noh shabar.

  

2. KA KYNTHEI KABA PANG MIH SNAM LAH 12 SNEM

MARKOS 5:25-34

Ka Bible ka iathuh ia ngi shaphang kawei ka kynthei kaba pang mih snam lah 12 snem. Kane ka briew ka la buh ia ka jingkyrmen jong ka ha ki doctor bad ki nongpynkhiah jong ka pyrthei, haduh ba ka la pynlut ia ka jingdon jingem jong baroh phar, ban ioh khiah na kata ka jingpang mih snam jong ka. Hynrei katba ka nang pynlut, katta ka jingshitom ka nang jur, ong ka Ktien jong U Blei. V.26 

Ainguh ia U Blei kane ka briew ruh ka la iohsngew shaphang U Jisu (bad nga ngeit ka lah tip ruh shaphang jong U ba u long ka jingkyrmen ia kiba bun kiba la duh jingkyrmen), kumta kane ka briew ryngkat kata ka jingpang ka la par dohiap tang ban poi sha U Jisu, bad haba ka la ia kynduh ia U Jisu, U Jisu u la pynkhiah phar ia ka na kata ka jingpang mih snam kaba la ban ia ka lah 12 snem.

Paralok baieit, lehse phi la shah ban beiñ ha u Soitan lyngba ki jingpang jingkhrew, phi la shah sumar ha kiba bun ki doctor, bad phi la pynlut ia ka spah ka phew jong phi, phi la bynda lut ia ki jingdon jingem jong phi, hynrei katba phi nang pynlut, katta ka jingpang ka nang jur, phi la duh jingkyrmen shibun eh. Ha kane ka por nga don ka khubor babha na ka bynta jong phi, bad kata ka long, don U Jisu Khrist uba la wan khnang sha kane ka pyrthei ban bah noh ia ki jingpang jingkhrew jong ngi baroh. Ha U ka don ka jingkyrmen!

ISAÏAH 53:4‭-‬5

⁴Shisha u la bah ïa ki jingkhuslai jong ngi, bad u la kit ïa ki jingsngewsih jong ngi: pynban, ngi la ñiew ïa u ba la pynmong, ba la shoh da U Blei, bad ba la pynjynjar. ⁵Hynrei, la pynmong ïa une namar ki jingryngkang jong ngi, la pynlwet ïa u namar ki jingleh bymhok jong ngi: ka jingpynshitom ka jingsuk jong ngi ka la long halor jong u; bad da ki jingjngem snam jong u la pynkhiah ïa ngi.

3. U BRIEW BA PANG ÑIANGTHOHLIEH

MARKOS 1:40-42

Ha ka por jong ka Testament Barim, ia kiba pang ñiangthohlieh la hap ban pynkyrpang bad pynjngai na ki briew, hap ban pynjngai na ka imlang sahlang baroh. Mut dur katno ka jingsngew jynjar jong une u briew. Ka jingkhuslai ka jingsngewsih haduh katno phi tharai u hap ban shah, hynrei ngi iohi kumno haba u la wan sha U Jisu, U Jisu u la isynei bad la pynkhuid ia u na kata ka jingpang ñiangthohlieh. Une u briew u la long uba bitnam pat ban don lang ha ïing ha sem, ha ka imlang ka sahlang, ha ka shnong ka thaw.

Ka jingpang ñiangthohlieh hangne ka dei ka dur jong ka pop.

Paralok baieit, ka pop ka la pynjahburom ia phi. Phi la shah kyntait na ka imlang sahlang, phi la sngewsih bad khuslai na ka bynta kata, phi la sngewrem, phi la sngew jahburom ha ka jingim, hynrei ha kane ka por lada phin wan sha U Jisu, un pyniohpat haphi ia ka jingim bathymmai. Phin nym long shuh kumjuh.

U khun sarong awria, uba la jot la rem, hynrei haba u la wan phai pat sha U Kpa, la ai pat ha u ia ki jaiñ thymmai, ki juti, ka sati.

Ka ktien jong U Blei ka ong, ba lada uei uei u don ha U Khrist u long u jingthaw bathymmai… 2 KOR 5:17

Un pynkhuid bad un sait phar ia ki pop jong phi baroh.

ISAIAH 1:18 - Ki pop ba saw hain haiñ kin lieh kat ka ior!

U soitan te u kwah ban pynjahburom ia phi, kumba u la pynjahburom, pynlyngkhuid ia u Adam bad ka Im, u kwah ruh ban pynlyngkhuid bad pynjahburom ia phi. IOANNIS 10:10

Paralok baieit, lehse phi don ha pdeng jong ka jingduh jingkyrmen ha ka jingim jong phi, phi duh jingkyrmen namar ka jingpang kaba la ban ia phi lah slem, kaba phi la kyrmen ban ioh khiah na ki dawai bad ki nongsumar bapher bapher, hynrei phim shym la ioh khiah.

Lehse phi la duh jingkyrmen namar u lok uba shu dih buaid tanglang, lane namar ki khun kiba la shu iaid wir… nga ong ia phi wat pat duh jingkyrmen, wan sha U Jisu, un ai ka jingkyrmen ia phi, wat ha ka por ba kut, ha kaba ym don lad ym don lynti shuh ka jingim jong phi, hynrei ha U ka dang don ka lad, dang don ka jingkyrmen.

Kolossai 1:27

Ha kiba U Blei u la imon ban pyntip katno ka long kata ka jingkynrei spah ka burom kane ka jingmaïan hapdeng ki Jentil; kaba long keiñ U Khrist ha phi, ka jingkyrmen ka burom.

U Blei un kyrkhu ia phi. Amen

© Jester Mawlong | Feb 17, 2024