Ka jingieit sbai

Ka jingieit sbai

Intro: Uei u sbai? U sbai ka thew hi ia ka pisa. Ha ki por mynshuwa ki briew kim pat ju pyndonkam pisa, ki pyndonkam tang da u sbai. Lada ki leit die ia ki mar ki mata, lane ki jingri jingdup jong ki, ki ioh bujli pat da u sbai, la ka long katno katno tylli katba shong ka dor jong kata ka mar. Ka long kum ha kine ki por jong ngi mynta, haba ngi leit die jingdie, ngi ioh bujli da ka pisa.

Please Subscribe to my YouTube channel too by clicking this link 

Ia kane ka rukom la leh ruh wat ha ki Balang, la ju pyndonkam ia u sbai haba donkam eiei.

1 KORINTH 16:1 

Hynrei, shaphang kata ka jingsynñiang sbai kaba na ka bynta ki riewkhuid, kumba nga la buh beit biang ruh ha ki balang ka Galatia, kumjuh ruh, to leh ma phi.  

Hangne ngi iohi ka don kata ka jingiasynniang sbai na ka bynta ki riewkhuid ia kaba u Apostol Paul u bthah ia ki Balang ba kin leh, ban long ka jingkyrshan ia ki riewkhuid.

Ka mut aiu ieit sbai?

Ieit sbai ka mut kheiñ kordor ia ka pisa ban ia U Blei ne ia ki briew bad kiei kiei baroh.

Balei ba ngim dei ban ieit sbai?

Namar ka jingieit sbai ka long u thied jong ki kynja basniew baroh. 

1 TIMOTHI 6:10

Namar u thied jong ki kynja basniew baroh, long kata kaba ieit sbai: ïa kaba don kiba haba ki beh eh, la ïalam bakla ïa ki na ka jingngeit, bad la dung ïa ki hi, da kiba bun ki jingsngewsih.

Na kane ka jingieit sbai ka kha ka jingsniew ba laiphew jaid. Na kata ka daw la ong ba ka jingieit sbai ka long u thied ki kynja basniew baroh.

Ngin ia peit kiei ki jingsniew kiba lah ban mih na ka jingieit sbai.

1. Ka jingieit sbai ka pyniap ia ka jingiatiplem.

Ki briew kiba la ieit sbai palat, ka jingiatiplem jong ka iap noh. Namar ba ka jingiatiplem jong ki ka lah iap, kumta kim don jingsngew shuh lada ki leh kumno kumno ruh, ban leh thok, leh klop, leh jubor bad kumta ter ter. Kim salia wat lada dei ia ki paralok ne iano iano ruh. Nga ngeit phi iohi ia kane. 

U Judas namar ka jingieit sbai, u la die noh wat ia la u jong u kynrad. Kumno u nud ban die ia la u jong u Kynrad? Dei namar ba ka jingiatiplem jong u ka lah iap namar ka jingieit sbai.

Balei ka jynjar, ka hiran haduh katne katne, dei namar kiba bun (kham tam kita kiba don ha ka bor) ki long kiba ieit sbai. Tang ban bit ban biang ialade, kim salia lada kiwei kin duh lane kin iap noh ruh.

2. Ka jingieit sbai ka pyniap ia ka jingsngewsynei.

 

Phin shem barobor ki briew kiba ieit sbai kim ju don jingsngewsynei lane isynei shuh iano iano ruh. Kin khñiot dor, kin khñiot beiñ ia kiba rit baria, ia ki bym don bor, tang ban ioh sbai ma ki ka la biang. Kim ju pyrkhat ia kiwei!

Teng teng haba ngi iohi ia ka jingshah khñiot beiñ jong ki briew ngi isynei pateng, hynrei kine kiba ieit sbai kim don jingsngewsynei. Balei? Namar ba ka jingiatiplem bad ka jingsngewsynei jong ki ka lah iap, na kata ka daw kim don jingsngew shuh lada ki leh kumno kumno ruh.

Ngi iohi ia kane ka nuksa na ki Pharisi, namar ba ki long kiba ieit eh, kim ju don jingisynei shuh ia kiwei, wat ia ki khunswet, ki riew kynthei ruh.

Ha ki Gospel la iathuh ia ngi shaphang ka jingieit sbai jong ki Pharisi.

LOUKAS 16:14

Kita ki Pharisi ruh, kiba ieit sbai eh, ki la ïohsngew ïa kine kiei kiei baroh, te ki la pynran beiñ ïa la ki khmut ïa u.

Haba U Jisu u ong ba 'ngim lah ban shakri arngut ki kynrad, ngim lah ban shakri ia U Blei bad ka spah', ki Pharisi ki la pynran beiñ ia la ki khmut, ong ka Ktien jong U Blei. Balei ki pynran beiñ? Namar ba kim lah ban pdiang ia kaei ba U Jisu u ong, namar ba ki long kiba ieit sbai eh.

Dei namarkata ka daw, u nongthoh sha ki Hebru u kyntu jur ba ngim dei ban ieit sbai.

HEBRU 13:5

To long kiba lait na kaba ieit sbai, da kaba sngewhun bad kita kiei kiei ba phi don; namar u hi u la ong: “Ngan ym iehnoh noh ïa me da lei lei, lymne ngan ym leh lyndet noh ïa me da lei lei.”

Hooid ka long kaba sngewtynnad ba ngin don ia ka spah ka phew, ba ngin dap ngin biang, hynrei ym pat ba ngi ieit sbai haduh ba ngin leh da ki lynti bymhok, da kaba khñiot beiñ ia kiwei khlem jingisynei shuh.

U Apostol Paul u ong ia u Timothy ba u dei ban phet iap na kaba ieit sbai. (1 Tim 6:11)

La iathuhlypa ha ka Bible ba ki briew ha ki sngi ba khadduh kin long kiba ieit tang ia lade, kiba ieit sbai bad kumta ter ter. Hynrei ka jingkyntu ia ngi ki bangeit ka long ba ngim dei ban ieit sbai.

2 TIMOTHI 3:2

Namar ki briew kin long kiba ieit tang ïa lade, kiba ieit sbai, kiba kren sarong, kiba leh khraw, kiba kren sniew, ki bymkohnguh ïa la ki kmie ki kpa, ki bymsngewnguh, ki bymkhuid.

U Apostol Paul um kwah ba ka jingieit sbai kan rung ha ka Balang, dei na kata ka daw u ong wat haba jied ia ki nongialam lane ki basan (Elder/Deacons, etc) dei ban jied da ki bym ieit sbai. Namar lada ka jingieit sbai ka ioh jaka ha ka balang, kan pynsniew dur ia ka balang bad kin mih ruh shibun kiei kiei ki bym sngewtynnad.  

1 TIMOTHI 3:3

"...u bym shait ïamai, u bymïashoh ïadat; hynrei, uba jemnud, u bymïania, u bymieit sbai."

Note: Baroh ngi donkam ia u sbai (pisa), tangba ngim dei ban ieit sbai.

3. Ka jingieit sbai ka pynkha ia ka jingthok jingshukor.

Ki briew kiba ieit sbai (pisa), kim salia wat ban thok ban shukor bad ban leh klop, tang ban ioh ia u sbai (pisa) ka biang beit na ka bynta jong ki. U Sakhaios ha ka por ba um pat iashem bad U Jisu u la leh klop shibun eh, hynrei hadien ba u la iashem bad U Jisu, u ong ba lada nga la leh klop iano iano, ngan siew pat saw shah. Kane ka long ka jinghikai na ka bynta jong ngi, ba lada ngi la leh klop, leh thok leh shukor iano iano, ngi donkam ban kylla bamut kum une u Sakhaios.

Kane ka long ka jinghikai shaphang ka jingieit sbai. Ka jingkyntu ka long, to ngin kiar bad phet iap na kaba ieit sbai, namar ba ka jingieit sbai ka long u thied ki kynja basniew baroh'

To U Blei un kyrkhu. Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | Mar 11, 2024