U samla uba riewspah
Ha ka gospel u Loukas 18:18-23 la iathuh khana ia ngi shaphang 'U Samla uba riewspah'.
Haba ngi pule shaphang une u samla bariewspah ngi iohi ia ki ar tylli ki side, kata Side A bad Side B.
1. Side A (Positive):
1) U don ka spah
Mar sien plied ha kane ka lynnong bad dkhot la iohi ba u long u Samla uba riewspah. Heading
Ha ka dkot 23 la ong ba u long uba riewspah eh. Bad ha ka gospel u Mathaïos la ong ba u don shibun ka spah. Mat 19:22
Na kine ki dkhot ngi sngewthuh ba une u samla u long da shisha uba riewspah. Kata ka long kaei kaei kaba sngewtynnad ban iohsngew shaphang une u samla.
2) U tip bha ia ki hukum bad sumar bha ruh ia ki
Nga lah ban ong, u dei u samla uba shakri Blei bha. Ia kane ngi lah ban sngewthuh na kaei ba u kylli ia U Jisu ban ong, kaei ba nga dei ban leh ban ioh ka jingim bymjukut, bad haba U Jisu u ong ba me dei ban sumar ia ki hukum, u ong ia kita nga la sumar na myndang khynnah. Kane ka pyni ba u dei uba ieit ban shakri Blei bad sumar ia ki hukum jong U Blei.
Kane ruh ka long kaei kaei kaba sngewtynnad. Kaba ba ngi ruh ngin bud nuksa, ban ieit ia U Blei ban sumar ia ki hukum U Trai.
2. Side B (Negative):
1) U ieit ia ka spah ban ia U Blei
Haba u kylli ia U Jisu ban ong kumno ngan leh ban ioh ia ka jingim bymjukut, bad haba U Jisu u la ong ia u ba lada me kwah ban long janai, khie leit die noh ia kiei kiei kiba me don to ai ruh ha kiba duk bad sa wan bud ia nga, une u samla bariewspah u la sngewsih eh bad u la phet noh. Lk 18:22-23
Ha ka gospel Mat.19:22 la ong ba u la sngewsih bad u la phet noh.
Kane ka pyni ba u ieit palat ia ka spah, haba U Jisu u ong to khie die noh, u la sngewsih eh.
Ka long kaba sngewtynnad ba ngin don ia ka spah ka phew, hynrei lada ngin buh pat ia la ka dohnud hangta, ngin long kiba bakla shibun. Ka Bible ka hikai ba ngim dei ban ieit spah (ieit sbai).
HEBRU 13:5
To long kiba lait na kaba ieit sbai, da kaba sngewhun bad kita kiei kiei ba phi don; namar u hi u la ong: “Ngan ym iehnoh noh ïa me da lei lei, lymne ngan ym leh lyndet noh ïa me da lei lei.” cf. 1 Tim 6:11
Ka jingieit sbai ka long u thied ki kynja basniew baroh. 1 Tim.6:10
2) U pyrkhat tang ialade
Kumno ngi lah ban sngewthuh ba une u samla u pyrkhat tang ialade?
Ngi sngewthuh na ka rukom kren jong u. U kylli ia U Jisu ban ong ngan leh kumno ba ngan ioh ia ka jingim bymjukut? Hangne ngi iohi u ong, ba ngan ioh. Kane ka pyni u pyrkhat tang ialade. Ha ka jaka ba un ong ngan leh kumno ba kiwei ruh kin ioh jingim bymjukut? Kata ka dei ka mentality jong une u samla bariewspah.
Haba U Jisu u ong, khie leit bad die noh ia kiei kiei katba me don, to ai ruh ha kiba duk, u la sngewsih. Namar ba u don ka mynsiem kaba pyrkhat tang ialade, um treh ban die ia kiei kiei baroh. Um kwah ba kiwei kin ioh bynta lem na kata ka jingkyrkhu ba U Blei u la kyrkhu ia U. Um pyrkhat ia kiwei, ieh kin mat ia iap shato, kata ka dei ka jinglong jong une u samla.
Kane ka long kaei kaei kaba sngewsih. Bun bah ki Khristan ne bangeit kiba long kum une u samla bariewspah. Ki don ka spah, ki shakri ia U Blei, ki leit tista sha ki jingiaseng, ki sumar ia ki niam bad ki hukum ka Balang. Hynrei kaei ba ki leh ka long tang na ka bynta ia lade shimet, kim ju pyrkhat na ka bynta kiwei. Ki iap ne ki im ruh kim tip. 2 Tim.3:2
Ka jinghikai ba ngi ioh na kane ka story ka long:
*** To ngin shakri ia U Trai bad ngin sumar ruh ia ki hukum jong U. Ïoannis 14:15
*** To ngin nym ieit ia ka spah palat ban ia U Blei. Kiar na ka jingieit sbai.
*** To ngin nym pyrkhat tang ialade, hynrei to ngin pyrkhat lem ruh na ka bynta kiwei pat.
Lehse phi lah ban ong, o nga te ngam don spah, kumno ngan pyrkhat ia kiwei, kumno ngan die noh ia kiei kiei kiba nga don, haba ngam don eiei. Hooid lehse phim don ia ka spah ka phew, hynrei kaei ba phi don ai ia kata.
Kaei kata kaba phi thikna ba phi don, U dei U Jisu Khrist. Ai ia U Jisu Khrist sha kiwei pat, ai ba kiwei kin ioh jingpynim lyngba jong nga bad phi. To ngin nym pyrkhat tang ba ngi lah im ialade lah biang, hynrei em, ai kiwei ruh kin ioh im.
U Petros bad U Ïoannis kim don ksiar ne rupa, hynrei ki don ia U Jisu, bad ia kata kaba ki don ki ai sha kiwei pat. Kam 3:6
U Blei un kyrkhu. Amen
© Jester Mawlong | April 22, 2024
Comments
Post a Comment