WAT PAT DUH BOR
#-1.
#-1.
Ka ktien ‘wat’ ka dei ka kynja ‘ktien jingmaham, (a warning word) lane jingkyntu. Haba ong ‘wat pat duh bor’ ka mut ngim pat dei ban duh bor, lane ym pat long ban duh bor.
#-2.
Ka kyntien ‘wat pat duh bor’ ka pyni ba dang don kaei re kaei sha khmat. Dang don kaei re kaei kaba bha sha khmat, dang don kaei re kaei kaba janai sha khmat, dang don kaei re kaei kaba kordor sha khmat. Ka dei ka kyntien kaba pynpyrkhat ia u briew.
Balei ngim dei ban duh bor? Jia aiu lada duh bor?
Ngi hap ban kynmaw ia kane kawei, ba ka jingim Khristan ka long kum u nongiamareh race, lane u nongtih mawlynnai. Lada ngi duh bor noh shuwa ba ngin poi ha ka thong, ngin nym ioh eiei.
U Apostol Paul u ong ia ki bangeit ha Galatia ba kim dei ban duh bor noh shuwa ka por lane ka ïa ba biang.
GALATIA 6:9
Te ha kaba leh babha, wat ai ba ngin man thait shuh, namar ha ka Ïa babiang, ngin ïoh ot lada ngim da duh bor noh.
Hangne u Apostol Paul u kren shaphang kaba leh babha, hynrei kane ka lah ban long ha ki liang baroh. Lada ngi duh bor noh shuwa kata ka ïa ba biang, ngin nym ioh ot eiei.
Bad ka thong kaba nga mut ban kren hangne ka long kham tam shaphang ka jingim bymjukut. Nga lah ban ong ba kum u bangeit, lada ngi duh bor noh shuwa ka ïa ba U Jisu un wan, kan pynlong ba ngin nym ioh ban ot ia ka jingim bymjukut.
Dei namar kata ka daw ngi hap ban sumar ba ngin ym duh bor noh.
Balei ki bangeit ki duh bor?
Lehse don shibun ki daw kiba pynlong ia u bangeit ban duh bor, hynrei ngin ia peit tang katto katne kiba kham long practical, kaba ngi ju iashem iakynduh barabor.
Nga ngeit da kaba ngi ia peit ia kane, kan iarap ia ngi kumno ba ngin leh ba ngin nym duh bor noh, bad kiei kiba ngi dei ban kiar etc…
1. Ngi duh bor namar ba kiei kiei baroh
kim long kumba ngi khmih lynti ba kin
long.
Teng teng kum ki bangeit, ngi pyrkhat oh namar ba nga lah ngeit ia U Trai, kiei kiei baroh kin iaid beit, bad kin long kumba nga duwai ne nga khmih lynti. Pynban bun sien kam long kumta, bad haba ngi iohi ba kam long kumta kumba ngi khmih lynti ba kan long, kumta ngi duh bor noh.
Nga la ia kynduh bun bah ki briew kiba long kumta.
Ki khun Israel ruh haba U Blei u la khot ia ki na ri Ijipt ban leit sha ri Kanaan, ki nang pyrkhat ba ka jingiaid lynti kan long suk khlem don jingpynwit, namar ba lah khot ia ki da U Blei. Pynban haba ki la sdang ban iaid lynti, kiei kiei kim shym la long kumba ki la khmih lynti ba kin long, ki la ia kynduh ia shibun ki jingeh ki jingialeh ha kata ka jingiaid lynti, haduh ba ki la shah ring mraw sha Babylon, kumta kata ka jingiashem ka la pynduh bor noh ia ki. Ki la thait, ki la sngewlwait, ka wan ka jingkhñium ka wan ka jingud pyrshah ia U Blei bad pyrshah ia u Moses kum u nongialam jong ki, haduh ba U Blei u la hap ban kren ia ki lyngba u nongiathuhlypa Isaiah, ban ong, Balei me ong, ko Jakob, bad me kren, ko Israel, “La buhrieh ïa ka lynti jong nga na U Trai, bad ka jingbishar jong nga ka la jah noh na U Blei jong nga”?
ISAÏAH 40:27 KHB
NOTE: Haba ngi iohi ba kiei kiei kim long kumba ngi khmih lynti, ngi sngew kumba U Blei u la iehnoh ia ngi.
Kane ka jingduh bor ka lah ruh ban wan wat ha ki nongtrei ia ka kam U Blei. Teng teng ngi la leh shitom, ngi la plan la pyrkhat, ngi la leh bha, hynrei ki briew kim patiaw eiei, bad kiei kiei baroh kim shym la long kumba ngi khmih lynti, ha kaba kum kata ka por kan pynlong wat ia ki nongtrei kam Blei ruh ban duh bor.
U Elijah ruh u la duh bor, haba kiei kiei kim long kumba u khmih lynti. Kata ka jingduh bor kaba haduh ba u la kwah ban iap noh.
1 SYIEM 19:1 ter ter.
- U la hap ban phet iap la ka jong ka
jingim…v.3
- U duwai ban iap noh…v.4
- U la ioh thiah…v.5
- U Blei u la wan ban kyrsiew ia u…v.5
Paralok baieit, to ngin nym duh bor noh wat la ngi iohi ba kiei kiei kim long kumba ngi khmih lynti ba kin long, hynrei to ngin iai kyrmen ha U Trai ba ha kawei ka sngi ngin sa ioh ot ia u soh bathiang jong ka jingtrei jong ngi. Amen
2. Ngi duh bor namar ba ngi peit sha ki
briew
Don bun bah ki briew ki kylla tlot, ki kylla thait bad lwait ha ka jingshakri ia U Trai namar ka jingpeit briew. O ba u long kumta kumta, o kat uto u leh kumto, o u kren ia nga kumta kumta, bad shibun kiei kiei. Bad haba ka jingpynleit jingmut jong ngi ka long tang ha kata ka jingiashem bad ka jingiakynduh bad u briew, hangta ngin sdang ban duh bor.
Ngi sdang ban kiar na ka jingiaseng, kiar na ka jingiasyllok ki briew jong U Blei, bad lada ngim kylla bamut, kan pynlong ba ngin nang duh bor, ngin nang duh bor haduh ba ngin nym ioh ot ia ka jingim bymjukut.
Kumta ka jingkhot ka long, to ngin nym peit sha u briew, hynrei to ngin peit tang sha U Blei. U long ma u U tyllong jong ka bor. The more we look at him, the more we will get strength.
ISAÏAH 40:29 KHB
U ai ka bor ha kiba sngewlwait; bad ha u bymdonbor u pynroi ka bor.
Haba ngi nang ban peit sha U, wat haba ngim sngew don bor, hynrei un pynroi ka bor ong ka Ktien U Blei. Hallelujah!
HEBRU 12:1-2 KHB
[1] Naba kumta, ma ngi ruh, haba la ker tawiar ïa ngi da u lyoh ki sakhi katne katne, to ngin bred noh ïa ka jingpynwit baroh, bad ïa kata ka pop kaba shait snoh ha ngi, bad to ngin ïaphet da ka jingïaishah ïa ka jingïaphet thong ïa kaba la buh ha khmat jong ngi; [2] da kaba khmih sha U Jisu U Nongpynlong bad U Nongpynjanai ïa ka jingngeit jong ngi, uba namar kata ka jingkmen ïa kaba la buh ha khmat jong u, u la shah ïa ka diengphna, u da ibeiñ ïa ka jinglehrain, bad u la shong ha ka kti kamon ka khet U Blei.
3. Ngi duh bor namar ba ngi peit sha ki
jingeh.
Ka jingpeit bad pyrkhat tang ia ka jingeh bad ka jingiashem iakynduh ha ka jingim, ka pynduh bor noh ia u bangeit.
Ki khun Israel haba ki la iohi ia u Goliath, ki la duh bor noh. Ki peit ia u ki iohi ia ka jingjrong ka ryngieng jong u, ki iohi ia ka dohksah jong u, ki iohi ia ki atiar thma jong u, kumta ki la um hin lyhin ka dohnud jong ki. Kata ka mon ban ialeh kam don shuh. Ki la duh bor noh. Balei ki duh bor? Namar ki peit sha ka jingeh ym sha U Blei.
1 Samuel 17:1…
Hynrei u David wat haba u la iohi ia u Goliath um shym la duh bor noh. Balei? Namar ba u peit sha U Blei. U iohi ia ka jingkhraw jong U Blei.
Ki khun Israel ki compare ialade bad u Goliath, u David u compare ia u Goliath bad U Blei. Hallelujah!
Para bangeit baieit, to ngin nym pynleit jingmut tang ha ka jingeh, hynrei to ngin pynleit jingmut ha ka jingkhraw jong U Blei. Hallelujah!
U Ïoannis u ong, Kham khraw uta ba don hapoh jong phi ban ia uba don ha kane ka pyrthei. Amen 1 Ïoannis 4:4
4. Ngi duh bor namar ba ngim shym la ap
ha U Trai.
Kawei pat kaba pynlong ia u bangeit ban duh bor ka dei namar ba um shym la nang ban ap ha U Trai, hynrei u shaniah ha ka bor lade.
Ka mut aiu ‘ap ha U Trai‘?
Ap ha U Trai ka mut ‘shaniah ha U Trai, kyrmen ha U Trai, khmih lynti ia ka jingpynshaitbor na U Trai‘, kata ka dei ka jingmut.
Haba ngi sngewthuh ba tang na U Trai ka wan ka jingiarap bad ka bor, kumta kan pynlong ba ngin ieit ban don ha syndah jong U, ban iasyllok, ban iakren bad U, etc.
Bad haba ngi don kata ka jingmut ban ap khmih ha U Trai, U Trai un pynshaitbor ia ngi, U Trai un pynthymmai bor ia ngi ba ngi lah ban iai trei bad iaid mareh haduh ba ngin da ioh ot ia kaei ba ngi khmih lynti.
ISAÏAH 40:31 hynrei, kita kiba ap khmih ïa U Trai kin pynthymmai bor; kin her sha jrong da ki thapniang kum ki pukni; kin mareh, bad kin ym sngewthait; kin ïaid, bad kin ym sngewlwait.
Yn nym don jingsngewthait, yn nym don jingsngewlwait haba ngi nang ban ap khmih ha U Trai. Hallelujah!
5. Ngi duh bor namar ba ngim don ka
jingiadei ba jan bad ka Ktien U Blei.
Ka jingbym don ka jingiadei bajan bad ka Ktien U Blei ka dei kawei pat kaba pynduh bor ia u bangeit. U bangeit u bym don ia ka Ktien U Blei u long kum u briew u bym biang bam. Ngi lah ban sngewkhlain, ngi lah ban ym sngew lei lei, hynrei ha kawei ka sngi ngin duh bor bad ngin tlot.
U Elijah haba um shym la ioh bam lah katto katne sngi, u la tlot bad lwait, hynrei haba u angel U Trai u la wan ai bam ia u, u la khie bad u la iaid ha ka bor kata ka jingbam haduh ba un poi ha u lum Horeb. 1 Syiem 19:5-8
Ka jingkyntu ka long, to ngin nym leh klet ia ka Ktien U Blei.
HEBRU 4:12 KHB
Namar ka ktien U Blei ka long kaba im, bad kaba don bor, bad kaba kham nep ban ïa kano kano ka waitlam ar liang syrti, bad kaba pei haduh kaba pynkhlad ïa ka jingim bad ïa ka mynsiem, ïa ki mat bad ïa ka khleiñ shyieng ruh, bad kaba bishar ïa ki jingmut bad ïa ki jingthmu ka dohnud.
Jingkyntu: Para bangeit bangeit baieit, to ngin nym pat duh bor noh, ka jingiaid lynti ka dang jlan, ka jingialeh ka dang jur, to ngin pyneh haduh kata ka ïa kaba biang haduh ba ngin da iashem bad U Jisu mar khmat.
U Blei un kyrkhu. Amen
© Jester Mawlong | June 23, 2024
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
Comments
Post a Comment