Wat nym iuh ia ka snam uba lui lui
Uei une uba lui lui?
Uei une uba lui lui?
Uba lui lui u dei U Jisu Khrist. Ka Bible ka iathuh ia ngi ba U Jisu Khrist u long uba khlem pop, um shym la leh ia kano kano ka pop, hynrei la pynlong pop ia u na ka bynta jong ngi.
2 KORINTH 5:21
Namar ïa uta u bym shym la tip ïa ka pop, u la pynlong ka pop na ka bynta jong ngi, khnang ba yn pynlong ïa ngi ka hok U Blei ha u.
Watla um shym la leh pop, hynrei la rai pynrem ia u bad la sah narphna ia U na ka bynta ki pop jong ngi.
Ka mut aiu iuh ia ka snam uba lui lui?
Ka mut leh pop biang (da ka mon sngewbha hadien ba lah ngeit bad kylla bamut), phaidien noh na kaba bud bad shakri ia U Trai, ngi leh bymsuidniew ia ka jingpynim ba U Trai u la ai. Kata ka dei ka jingmut, ‘Ïuh ïa ka snam ba lui lui‘, ha ka jingsngewthuh jong nga.
Ha ka Bible ngi shem don kiba die ia ka snam ba lui lui, kumba long u Judas, don ruh kiba ïuh ïa ka.
Jia aiu lada ngi ïuh ïa ka snam ba lui lui? Ngin hap ban mad ia ka jingpynshitom ka bakhraw.
U Judas hadien ba u la die ia U Jisu, u la ong, 'nga la leh pop haba nga la die noh ia ka snam ba lui lui jong U Trai.' Kumta u la leit bad phasi noh ia lade. MAT 27:1-5.
U Jisu u ong shaphang u Judas, ba ka la kham bha ban ym kha ia u sha ka pyrthei.
MATHAÏOS 26:24
U Khun u briew shisha un sa leit kumba la thoh shaphang jong u, hynrei, kordit ïa uta u briew da uba yn die noh ïa U Khun u briew! ka la bha ïa uta u briew lada ym shym la kha satia ïa u.”
U Judas u la mad ia ka jingkordit bad ka jingiap jah burom namar ba u la die ia ka snam uba lui lui ba long U Jisu Khrist. Hynrei u Apostol Paul u ong ba kan kham kordit shuh shuh ia uta uba iuh ia ka snam ba lui lui, kaba mut uta uba lah ngeit bad lah pdiang ia U Trai hynrei u leh bym- suidñiew, u phai dien noh na kaba bud ia U Jisu.
HEBRU 10:29
Ka jingpynshitom ba kham jur katno, phi tharai, kan dei ïa uta uba la ïuh hapoh ki kjat ïa U Khun U Blei, bad ba la ñiew bymkhuid ïa ka snam ka jutang, da kaba la pynkhuid ïa u, bad ba la lehbeiñ ïa U Mynsiem ka jingaiei?
Hangne u Apostol Paul u pyndonkam da ka ktien kaba ong, 'ka jingpyn- shitom ba kham jur'. Kane ka pyni ba ka jingpyn-shitom kan kham khraw ia kita kiba ïuh ne leh bymsuidñiew ia ka snam U Jisu.
Ïuh = Leh bym salia
Ñiew bymkhuid = Ñiew dew thala ia ka snam U Jisu kaba don bor ban sait bad map ia ki pop.
Lehbeiñ ia U Mynsiem ka jingaiei = Leh bym suidñiew ia ka jingktah bad ka jingpynkynduh U Mynsiem Bakhuid.
HEBRU 6:4-6
[4] Namar shaphang kita ïa kiba la pynshai shi sien bad ba la ïoh mad ïa ka jingai kaba kynja bneng, bad ba la pynlong ki nongïoh bynta na U Mynsiem Bakhuid, [5] bad ba la ïoh mad ïa ka ktien babha U Blei, bad ïa ki bor ka pyrthei ka ban sa wan, [6] bad hadien kata, ba ki la hap noh, ka long ka bym lah ban pynthymmai pat ïa ki sha ka jingkylla-ka-bamut; haba la sahnarphna pat da ki hi, ïa U Khun U Blei, bad la pynlehrain pyrshah ïa u.
Ia kiba lah ngeit, lada ki phaidien yn sympat bun thri…
Kaei kane ka jingpynshitom ba kham jur?
1. Ka jingjynjarbah
U briew uba la iuh ia ka snam ba lui lui un nym ioh shuh ia ka jingrongnoh, bad haba um ioh shuh ia ka jingrongnoh un hap ban mad ia ka jingpynshitom ba khraw jong U Blei kaba long ka jingjynjarbah, kaba la thoh ha ka kitab Jingpynpaw lynnong ba 6 haduh ka lynnong ba 11.
Kane ka jingpynshitom kan long ia uta u briew uba iuh ia ka snam ba lui lui jong U Trai.
2. Ka dujok ding bymjukut
U briew uba la iuh ia ka snam ba lui lui jong U Trai, un nym ioh shuh ia ka bneng, hynrei ka dujok ding bymjukut ka ap ia u. Bad hangta ka jingpynkordit kan long sha ki bymjukut, ki bymjukut bad ki bymjukut.
Bad hangta lada ngi kwah ban kylla bamut biang sa shisien ruh ngin nym lah shuh. U Jisu shuwa ba un iap, halor ka diengphna u la duwai bad ïasaid ha u kpa ban ong, "Ko Pa to map ia ki naba kim tip ia kaei ba ki leh" (Loukas 23:34). Hynrei ha kata ka sngi khatduh, un nym ïasaid shuh, ka lah dei sa ka pali ban pynshitom, ban pynkordit ia kita kiba la iuh ia ka snam ba lui lui jong U Trai.
Jingkyntu: To ngin nym ñiew dewthala ia ka snam jong U Trai, to ngin ñiewkor ñiew burom ia ka snam jong U Trai, bad ban iai sngewnguh ia U Trai namar ka snam ba lui lui ba la pynmih na ka bynta ki pop jong ngi.
Lada kumno re kumno ngi la sdang ban iuh ia u khun U Blei bad ia ka snam jong u, bad ngi la leh bym suidñiew ia ka jingpynim ba U Trai u la ai ha ngi, lada ngi la ñiewbeiñ ia U Mynsiem Bakhuid ka jingaiei, kylla bamut ha kane ka por, katba U Trai u dang ai ha ngi ka lad ban phai sha U, namar kan sa por ka por lada ngi kwah eh ban phai sha U, ban kylla bamut, ngin nym lah shuh. Eg. Judas; U Riewspah
To U Blei un kyrkhu ia phi. Amen
© Jester Mawlong | Sept.3, 2024
Comments
Post a Comment