U Blei u bah khlieh ia kita kiba u la khot

U Blei u bah khlieh ia kita kiba u la khot 

U Blei haba u khot iano iano um ju iehnoh kumto, hynrei u da bah khlieh ia uta u briew nadong shadong. Naduh ka bam ka dih, ka kup ka sem, ka jingiada jingsumar, etc etc. 

Ngin ia peit ia ki nuksa na ka Bible kiba pyni kumno U Blei u da bah khlieh na ka bynta kita kiba u la khot.

1. U Abraham

Ngi pule ha ka kitab Jenesis 12: ngi iohi kumno ba U Blei u la khot ia U Abraham. Ha kata ka jingkhot jong U, ngi iohi kumno U Blei u kular na ka bynta U Abraham.

JENESIS 12:3 bad ngan kyrkhu ïa kita kiba kyrkhu ïa me, bad ngan tim ïa uta uba tim ïa me: bad ïa ki jaid bynriew baroh ha ka pyrthei kin long ba la kyrkhu ha me.”

Kane ka kren ia kata ka jingbah khlieh jong U. Haba ki briew ki tim ia ngi ngim donkam ban tim kylliang ia ki, hynrei U Blei un tim.

Haba ngi don ha ka jingkyrduh, U Blei u bah khlieh ban pyndap ia ngi. Amen 

Dei namarkata kadaw U Jisu u ong, wat khuslai ia kaei ba phin bam bad ia kaei ba phin kup. Mathaios 6:25-34

Balei ngim dei ban khuslai? Namar U Blei u la dep bah khlieh. Hallelujah!

ISAÏAH 46:3-4

[3] “To shahshkor ïa nga, ko ka ïing u Jakob, bad kiba dang sah baroh na ka ïing Israel, ïa kiba nga la bah naduh ka kpoh, ïa kiba nga la kit naduh ba la pun: [4] te haduh ka jinglong tymmen nga long uta, bad haduh ban da phuh 'ñiuhlieh ngan kit ïa phi: nga, nga la pynlong, te nga ngan bah; ngan kit ruh, bad ngan pyllait.

Kaei ba ngi donkam ban leh ka long, ngeit bad kohnguh ia ka jingkhot jong U.

2. U Jakob lane u Israel

U Blei u la khot ia U Jakob, pynban ngi iohi u Jakob bunsien u sheptieng bad u artatien ia ka jingkhot jong U Blei. Haduh ba U Blei u la hap ban iai pynkynmaw ia u, bad teng teng ngi iohi U Blei u kynhied ia u.

Ha ka kitab u ISAÏAH 41:14 ngi iohi U Blei u ong ia u Jakob, Wat sheptieng, me u Jakob uba kum u khñiang, bad phi ki rangbah Israel; nga ngan ïarap ïa me, ong U Trai, U Nongsiewspah jong me, uta U Bakhuid jong ki Israel.

U Blei u ong, nga ngan iarap… kane ka kren ia ka jingbah khlieh jong U Blei ia uta uba u la khot.

ISAÏAH 43:1-4

[1] Hynrei, kumne u ong U Trai uba la thaw ïa me, ko Jakob, bad uta uba la thaw dur ïa me, ko Israel: “Wat sheptieng, namar nga la siewspah ïa me; nga la khot ïa me da ka kyrteng, me long u jong nga. [2] Haba me leit lyngba ïa ki um, nga ngan long lem bad me; bad lyngba ki wah, kin ym tyllep ïa me: haba me ïaid lyngba ka ding, men ym ing; lymne ka thylliej ding kan ym jliah ïa me. [3] Namar nga long U Trai U Blei jong me, uta U Bakhuid jong ki Israel, u nongpynim jong me; nga la ai ïa ka Ijipt ban long ka jingsiewspah na ka bynta jong me, ïa ka Ethiopia bad ka Seba namar jong me. [4] Haba me la long u bakordor ha khmat jong nga, bad uba donburom, bad nga la ieit ïa me; namar kata, ngan ai noh ki briew namar jong me, bad ki kynja bynriew namar ka jingim jong me.

Ma nga bad ma phi ruh ngi long kita kiba U Blei u la khot. U la khot ia ngi katba kum ka jingthmu jong u. Kynmaw uwei pa uwei na ngi, ngi don la ka jong ka jong ka jingthmu U Blei.

2 Timothi 1:9 

....uba la pynim ïa ngi, bad uba la khot ïa ngi da ka jingkhot bakhuid, ym katba kum ki jingleh jong ngi, hynrei, katba kum ka jingthmu bad ka jingaiei jong u hi, ïa kaba la ai ha ngi ha U Khrist Jisu mynshuwa ki Ïa bymjukut.

Ephesos 1:3-4

[3] Long ba la kyrkhu ïa U Blei bad U Kpa U Jisu Khrist uba U Trai jong ngi, uba la kyrkhu ïa ngi da ki jingkyrkhu bakynja mynsiem baroh ha ki jaka bneng ha U Khrist: [4] kat kumba u la jied ïa ngi ha u mynba ym pat pynshong nongrim ïa ka pyrthei, khnang ba ngin long ki bakhuid bad kiba khlem jingduna ha khmat jong u ha ka jingieit.

Kumta kumba U Blei u la bah khlieh ia u Abraham, u Jakob kita kiba la khot jong u, un leh ruh kumta na ka bynta jong ngi kiba la khot jong U ha kine ki sngi. Ngim donkam ban da khuslai bad sheptieng ia ka ka jong ka jingim, U Blei uba la khot iangi un bah khlieh ia ka jingim jong ngi nadong shadong.

Haba ong kumta, kam mut pat ba ngin shu shong suk noh khlem leh eiei shuh, ngi hap ban leh eiei. Kham tam ban kohnguh bad leh ia kaei ba U ong bad U kwah ia ngi ban leh. Ngi la ia peit ia ka nuksa u Abraham, kumno ba u la kohnguh bad leh ia kaei ba U Blei u ong ia u ban leh. Kumta ruh U Blei u da bah khlieh ia u Abraham nadong shadong.

Ha ka shithi sha ki nong Rom 8:30 ka Ktien U Blei ka ong, Bad ïa kiba u la thmu lypa, ïa kita u la khot ruh; bad ïa kiba u la khot, ïa kita u la pynksan ruh; te ïa kiba u la pynksan, ïa kita u la pyndonburom ruh. 

U Trai un pyndonburom ia ngi kumba u la khot ia ngi. Namar U long uba lah ban shaniah ong ka Ktien U Blei.

1 Thessaloni 5:24

Uta uba khot ïa phi u long uba lah ban shaniah, u ban leh ruh ïa kata.

To U Trai un kyrkhu ia phi. Amen

© Jester Mawlong | Oct 29, 2024