U Blei U bah ïa ka jingkit jong ngi ha la ka sngi

U Blei U bah ïa ka jingkit jong ngi ha la ka sngi 

SALM 68:19

To long ba la kyrkhu ïa U Trai, uba ha la ka sngi u bah ïa ka jingkit jong ngi, U Blei keiñ uba long ka jingpynim jong ngi. Selah.

Hangne ngi iohi ia ka jingrwai jong u nongrwai Salm shaphang U Trai uba bah ia ka jingkit jong ngi ha la ka sngi. 

Sngap ruh ha YouTube da kaba click hangne

Lyngba kane ka dkhot ngi ioh ia ki saw tylli ki bynta kiba long ka jinghikai ia ngi.

Kaba nyngkong ngi iohi ia ka jinglong babha jong U Blei 

U briew uba ju iarap ban pynkit lem ia ka jingkit jongno jongno la ju ñiew ba u dei u briew uba bha. Kata literally ngi ia kren.

Ngan shu ai ia phi kawei ka nuksa. Shu buh mynta phi kit ia ka jingkit kaba khia bha, bad kaba phi hap ban kiew ia ki riat lane thiep. Kumno re kumno hapdeng jong kata ka jingkhia jong kata ka jingkit, u wan uwei u briew bad u ong, Bah/Kong ai ngan iarap pynkit lem ia kato ka jingkit jong phi tang hangtei haba lait thiep. Kumta phi ai bad phi iaid ia uta u thiep thylli bad phi poi suk sha kliar jong u thiep. Hato uta um dei u briew uba bha? Katno tam lei te U Blei ba ngi shakri U bah ïa ka jingkit jong ngi ha la ka sngi ong ka ktien jong U Blei. U long da shisha U Blei uba bha. Hallelujah!

Kaba ar pat ka jinghikai ba ngi ioh nangne ka long ba ngi dei ban don ka dohnud ba sngewnguh

Ngan ai biang ia phi ka nuksa na uto u briew uba iarap ban pynkit lem ia ka jingkit jong phi haba phi kiew ia u thiep. Hadien ba utei u briew u la iarap ban pynkit lem ia ka jingkit jong phi, bad phi la iaid da kaba suk haduh ban poi sha kliar thiep, nga ngeit phin da pyrto bad phin da sngewnguh bad phin da iathuhkhana ia ki briew ban ong, oh uta uta te u long uba bha shisha, u la iarap ban pynkit lem ia ka jingkit jong nga na shiteng riat bad kumta ter ter.

Paralok baieit, lada ia u briew uba iarap ban pynkit lem ia ka jingkit jong ngi tang shibit por ngi da sngewnguh, sngewburom bad ngi da iathuhkhana kylleng. Katno tam te ïa uta uba bah ia ka jingkit jong ngi ha la ka sngi. Hato kam dei ka ngi ruh ban sngewnguh ïa U Blei, hato kam dei ia ngi ba ngin da iathuhkhana junom ia ka jingbha jong U Trai? Ka dei ia ngi ba ngin sngewnguh bad ngin iathuhkhana kylleng ia ka jingbha jong U Trai. Hallelujah!

To ngin nym sangeh noh ban sngewnguh ïa U Blei, to ngin nym sangeh noh ban iathuhkhana shaphang ka jingbha jong U Blei.

SALM 96:3

To ïathuhkhana ïa ka burom jong u hapdeng ki jaid bynriew, ïa ki kam baphylla jong u hapdeng ki kynja bynriew baroh.

Kaba lai pat ngi iohi shaphang U Blei ba um ju sngewthait lane sngewlwait 

Ka Bible ka ong, U bah ïa ka jingkit jong ngi ha la ka sngi. Kane ka pyni ba U Blei  ba ngi shakri u long U Blei u bym ju sngewthait lane sngewlwait. Ka long kaba shisha kumba u Isaiah u ong.

ISAÏAH 40:28

Mem shym la tip? Mem shym la ïohsngew? U Blei bymjukut, U Trai, U Nongthaw ïa ki bakut ka pyrthei, um sngewlwait, lymne um ju thait; ym don jingïit ïa ka jingshemphang jong u.

Ym don kawei ruh ka sngi kaba U Blei un ong, ni nga lah thiat, ni nga sngewlwait, em. Ha la ka sngi U bah ïa ka jingkit jong phi bad jong nga, kampher katno ka khia, hynrei u iai kit bad u iai bah ong ka ktien U Blei. Hallelujah!

Kaba saw bad kaba khadduh ngi iohi ia ka khubor babha na ka bynta kiba thiat bad kiba la ban khia ka jingkit.

Paralok baieit, lehse phi don ia ka jingkit kaba khia ha ka jingim, ia kaba phi la kit la slem, kaba mano mano ym don ba tip bad ym don ba sngewthuh, tang ma phi marwei phi sngewthuh haduh katno ka khia kata ka jingkit. Ka khubor ba bha na ka bynta jong phi ka long, don uwei uba kloi ban iarap ban kit lem ia kata ka jingkit jong phi, bad uta U dei U Jisu. Nga ong ia phi ha kane ka por, to bret bad aiti noh ia kata ka jingkit bakhia jong phi sha U, wat nym kit sah ia kata ha lade. U Trai Jisu u dang khot ia phi ia kaba phin wan ban bret ia kata ka jingkit jong phi ha U.

U ong ha ka Gospel U MATHAÏOS 11:28, To wan ha nga, phi baroh ki bathait bad bakhia ka jingkit, te ngan pynjem ïa phi. 

Ngim da donkam ban da pyrkhat ban da khuslai, ban leh da kumne da kumtai, hynrei kaba suk ka long shu wan sha U Jisu bad bret ia kata ka jingkit baroh ha U, kumta phin shem kaba jahthiat ha ki mynsiem jong phi ong U Jisu.

Shuh shuh ha ka shithi 1 PETROS 5:7 ka ong, “... da kaba bred halor jong u ïa ka jingkhuslai jong phi baroh, naba u sumar sukher ma u shaphang jong phi.”

Une u dei U Blei ba ngi shakri, ha la ka sngi u kit ïa ka jingkit jong ngi. Hallelujah! 

Kumta sa shishien nga ong biang, lada phi don kano kano ka jingkit ha ka jingim jong ngi, wan sha U Jisu, aiti ia kata ka jingkit ha U. 

Shuh shuh ka Ktien jong U Blei ka ong ha ki SALM 55:22, To bred ïa la ka jingkit halor U Trai, te un shan ïa me: un ym shah ban pynkhih ïa u bahok lano lano ruh.

U Blei un kyrkhu ia phi lyngba kane ka jingiapuson ba khyndiat na ka Ktien U Blei, Amen.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester L Mawlong | February 6, 2025