Ki jinglong ba U Blei U ïaroh

Ki Jinglong Ba U Blei U Ïaroh 

Haba ngi pule ha ka kitab U Job ngi iohi kumno U Blei u la ïaroh ia U Job wat ha khmat jong u Soitan. Lehse ngi lah ban pyrkhat kaei kaba la pynlong ia U Blei ba un da ïaroh ia U Job haduh katta katta? 

Ba ngin ioh ia ka jubab, to ngin pule na ka kitab u JOB 2:1-3. Hangne ngin ioh ia ka jubab, pleng dei na kine ki jinglong ba u Job u don kaba la pynlong ia U Blei ban ïaroh ïa u.

JOB 2:1-3

[1] Te la jia ka sngi pat ïa ki khun U Blei ban wan ïeng ha khmat U Trai, bad u Soitan ruh u la wan hapdeng jong ki ban ïeng ha khmat U Trai. [2] Bad U Trai u la ong ha u Soitan, “Nangno me la wan?” U Soitan te u la ïathuh ha U Trai, bad u la ong, “Na kaba leit shane bad shawei ha ka khyndew, bad na kaba ïaid sharum shaneng ha ka.” [3] Te U Trai u la ong ha u Soitan, “Me la khmih thuh ïa u shakri jong nga u Job? Naba ym don uba kat u ha ka khyndew, u briew uba janai bad uba beit, uba sheptieng ïa U Blei, bad uba kiar na ka basniew: bad u dang neh ha la ka jingjanai, la me la kynshuiñ ïa nga pyrshah ïa u, ïa ka ban pynjot ïa u khlem daw.” 

U Blei u ong ia u Soitan, me la khmih thuh ia u shakri jong nga u Job… ym don kum ma u ha ka khyndew. v.3

To ngin ia peit kiei kita ki jinglong ba u Job u don.

1. Ka jinglong janai: 

Janai = Ka mut ba khlem shah kynnoh pop, (blameless). 

Kata ka jinglong janai jong u Job haduh ba u Soitan ruh um ioh daw shuh ban pynshoi da kumwei pat lait satang ba un phah weng ia ka kti jong U Blei ba u Job. 

Ai ba ngi ruh ngin beh sha kata ka jinglong janai, ba khlem shah kynnoh pop khnang ba ngi ioh ka jingiaroh na U Blei.

2. Ka jinglong beit:

Kawei pat ka jinglong kaba U Blei u ïaroh ka dei ka jinglong ‘beit’. Kaba sngewsih ha kine ki sngi, kiba bun ki briew wat ki bangeit ne Khristan ki don ia kata ka jinglong bym beit lane jinglong kynriang. U Blei um sngewtynnad ia ka jinglong kynriang, la ka long ha kano kano ka bynta, la ha ka jingiadei para briew lane ha ka jingshakri ia U Trai. U Blei u kwah ia ka jinglong ba beit na ngi.

3. Ka jingsheptieng Blei:

 

Kaba lai pat ka dei ka jinglong ba sheptieng Blei. 

Sheptieng Blei ka mut ka jingtiengburom ia U Blei. 

U Job u don ia kata ka jinglong ba sheptieng Blei ha U bad kata ka jinglong basheptieng Blei ka la pynlong ia u ban ït ialade ha la ka sngi, ban wad ia ka khmat U Trai, ban duwai bad ban mane ia U Blei.

Ai kane ruh kan don ha ka jingim jong ngi, ha la ka sngi ngin tieng burom ia U Blei.

4. Kaba kiar na kaba sniew:

Kata ka jingtiengburom jong u Job ia U Blei, ka la pynlong ia u ba un kiar na kaba sniew. 

Ka long kaba shisha kumba u nongthoh ki proberb u ong, haba ki briew ki tieng burom ia U Blei, ki kiar na kano kano kaba sniew, hynrei ki briew bym don ka jingtiengburom ia U Blei ki kynrup naphang.

PROBERB 16:6

Da ka jingisynei bad ka jingshisha, ïa ka jingleh bymhok la ju sait noh: bad da ka jingsheptieng ïa U Trai, ki briew ki kynriah na ka basniew.

PROBERB 8:13

Ka jingsheptieng ïa U Trai long ban shun ïa ka basniew: 

Haba ngi don ka jingtiengburom ia U Blei ngi shun, ngi isih ia kaba sniew lane ka pop. Bad haba ngi isih ia ka pop, ngi ioh ka jingiaroh na U Blei. Hallelujah!

Nga ngeit U Blei u la kyrkhu ïa ngi lyngba kane ka jingiapuson ba khyndiat. 

Ka jingkyntu ka long, to ngin don ia ka jinglong ba janai, ba beit, ka jinglong basheptieng Blei bad ban kiar na kaba sniew.

U Blei un kyrkhu ia phi, Amen.

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester L Mawlong | Feb 21, 2025