Kiar na ka jingsngew long eiei

Kiar na ka jingsngew long eiei 

Ka jingsngew long eiei bad ka jingkwah ban long eiei ka ia pher. Ka jingsngew long eiei ka ia khleh lang bad ka jingsarong. Katba ka jingkwah long eiei pat ka dei kata ka jingkwah ban leh eiei na ka bynta U Trai lane na ka bynta ia lade bad ka ïing ka sem.

To ngin ia peit mynta shaphang kane “Ka jingsngew long eiei”

Bunsien ngim da pyrkhat khia ha kaba iadei bad kane ka bynta, hynrei ka dei ka mat kaba ngi hap ban pyrkhat jylliew bha, namar kane ka jingsngew long eiei, kam dei tang ka jingsngew, hynrei ka dei kawei na ki buit lane ka jingriam u Soitan ban pynngat bad pynjot ia ki briew.

Phin shem bunsien ki briew ynda ki la ngat ha kane ka jingriam jong ka jingsngew long eiei, kim lah shuh ban poi shano shano, kin shu kut ha lyer. 

Ha ka jingshakri jong nga, nga la iohi da la ki jong ki khmat ia kiba bun ki briew (kham tam ki samla), kiba don ka jinglah bad ka jingaiei jong U Blei, hynrei haba ki don kata ka mynsiem sngew long eiei nga shem mynta kim poi shano shano, ki shu sahkut hajuh lane ha suiñ.

Teng teng ki nongtem, tem pat tem bha, lah da sngew long eiei, ki nongrwai, rwai pat rwai bha lah da sngew long eiei, lada don lei ba ïaroh tok, tang katta lah sdang sa ka sngew stad bad sdang sa ban nym ñiew shuh ia kiba halor, ia kita kiba hikai, lane kiba ialam lynti ia ki. 

Teng teng ka Balang ka ailad bad pynshlur ia ki ba kin mih sha khmat ha ka jingshakri, hynrei kaba sngewsih ka long, shakri bha pat shakri, lah da sngew long eiei, ym ñiew shuh iano iano, ym sngap shuh iano iano. Teng teng don wat ki briew jong U Blei, da kaba burom wat ki Pastor, etc, haba U Blei u pyndonkam ïa ki, ki sdang ban sngew long eiei noh. Kane ka long kaei kaei kaba sngewsih shibun, ka long ruh kaba U Blei um sngewbha.

Kynmaw U Blei um lah shah ia ki briew kiba don kata ka jingsngew long eiei. 

“Ka jingsngew long eiei ka ia khleh lang bad ka jingsarong”

“Ka jingsngew long eiei ka wanrah ia ka jingsngew mar ia ryngkat”

“Ka jingsngew mar ia ryngkat ka pynmih ia ka jingshah pynhiar khet”

U Lusiphar (Lucifer), uba long mynshuwa u rangbah angel ba ialam jingmane ha bneng hynrei mynta u la kylla long u Soitan, u don kata ka jingsngew long eiei, bad kata ka jingsngew long eiei ka la pynlong ïa u ba un sngew long mar ia ryngkat bad U Blei bad ka jingmih nangta ka long ka jingshah pynhiar khet, la shop noh ia u arsut na bneng sha dujok.

ISAÏAH 14:12-15

¹²“Kumno me la hap na bneng, ko 'lurshai, u khun jong ka step! Kumno la ot noh ïa me sha ka khyndew, uba la ju pyndem lin ïa ki jaid bynriew! ¹³Te me la ong ha la ka dohnud, ‘Ngan kiew sha bneng, ngan kyntiew ïa la ka khet haneng ki khlur jong U Blei; bad ngan shong halor u lum ka jingïaseng, ha ki bakut phang shatei: ¹⁴ngan kiew sha lyndet ki lyoh; ngan long kum U Bahajrong Tam.’ ¹⁵Pynban, yn sa pynhiar ïa me sha dujok, shaduh trai jong ka 'liewlong.

Hynrei U Jisu wat la u la long eiei (U long U Blei), hynrei um don kata ka jingsngew long eiei, um shym la bat ban long mar ia ryngkat bad U Blei, bad ka jingmih nangta ka long ka jingshah kyntiew khet.

PHILIPPI 2:6-11

⁶uba haba u long ha ka dur U Blei, um shym la ñiew eh ïa ka ban bat ban long marryngkat bad U Blei, ⁷hynrei, u la pynsuda ïa lade, u da shim ïa ka dur mraw, haba u la jia long ha ka jingsyriem ki briew; ⁸te haba la shem ïa u ha ka rukom kum u briew, u la leh rit ïa lade, haba u la jia long uba kohnguh wat haduh ka jingïap, ho-oid, ka jingïap ka diengphna keiñ. ⁹Naba kumta te, U Blei u la kyntiew eh ïa u, bad u la ai ha u ïa kata ka kyrteng kaba halor ka kyrteng baroh; ¹⁰ba ha kata ka kyrteng U Jisu, ka khohsiew baroh kan ïoh dem khrup, ki jong kiba ha ki bneng bad ki jong kiba ha ka khyndew bad ki jong kiba hapoh ka khyndew keiñ, ¹¹bad ba u thylliej baroh un ïoh phla shynna ba U Jisu Khrist u long U Trai, ïa ka ban pyndonburom ïa U Blei uba U Kpa. 

Paralok baieit, lada U Blei um shym la burom ïa u Lucifer uba don kata ka jingsngew long eiei, un nym burom ruh ia ngi lada ngi don ia kata ka jinglong, kumta to ngin kiar na ka mynsiem jong ka jingsngew long eiei, wat haba U Blei u pyndonkam ia ngi, u ai jingstad, ngin nym sngew sarong, hynrei ngin shakri da ka jingsngewrit, ngin long kiba iaineh ha kata kaba U Blei u pyndonkam ia ngi, nga ngeit kata kan pynkmen ia U Blei bad kan pynlong ruh ba U Blei un nang ai shuh shuh ka jingaiei, bad un nang kyntiew kyrdan ia ngi na kawei ka kyrdan sha kawei pat.

JAKOB 4:6

Hynrei, u ai ïa ka jingaiei ba kham bun: naba kumta la ong: “U Blei u ïaleh pyrshah ïa kiba sngewkhraw, hynrei, ha kiba sngewrit u ai ka jingaiei.” 

1 PETROS 5:6

To phin pynrit ïa lade namar kata hapoh ka kti bakhrawbor ka jong U Blei, ba un ïoh pynkhraw ïa phi ha ka Ïa ba bit.

Nga ngeit kane ka la long ka jingkyrkhu ia ngi iwei pa iwei lada ngi la sngap bad pison bha ia kane ka Ktien jong U Blei. Amen 

© Jester L Mawlong | May 1, 2025