Hato dang don jingshngaiñ?

Hato dang don jingshngaiñ ?

Haba ngi peit ïa ki jingjia kiba jia sawdong jong ngi, ngi i ba ha ka pyrthei hi ym don jingshngaiñ shuh. Ka jingma ka ap sawdong jong ngi ia kaba ngim lah ban tip lypa. 

Ngi iohi lyngba ki khubor ia ka jingjah briew kaba khah khah, kaba la pynkyndit bad pynlyngngoh ia kiba bun ba lang, ka jingshah pyniap jong ki briew ha kylleng ki jaka, kiba bun ki jingshah pyniap ki long kiba pynsuhjer shisha, ha kaba ïa ki briew lah shu pyniap la kum ïa ki mrad. 

Haei shuh ka jingshngaiñ ka don? Lada leit jingleit da Kali ha surok ruh ym don jingshngaiñ, ka jingjia accident bad ka jingiap kaba man ka sngi, lada leit jingleit da ka train ruh ym don jingshngaiñ, ka jingiatyngkhuh jong ki train kaba man ka por. Nangta ngi pyrkhat ban leit jingleit noh da ka aeroplane ban kham kloi bad kham shngaiñ, hynrei kata ruh kam thikna ïa ka jingshngaiñ. 

Dang ha kine ki sngi, kata ha ka 12 tarik June, 2025, ngi iohi ia ka jingpluh kynsan jong ka aeroplane Air India ha kaba 241 ngut ki passanger bad ki nongtrei jong ka ki la iap lut baroh.

Shuh shuh, nga ngeit ngi dang kynmaw ia kaei kaba dang shu jia shen ha Pahalgam, kaba long kawei na ki jaka jngoh kai pyrthei ba itynnad bad pawnam bha, kaba don ha Kashmir, ngi iohi ki briew da ka jingpyrkhat ban leit kai noh sha kane ka park, sha kane ka jaka jngoh kai pyrthei ban pyngngad ka jingmut jingpyrkhat, hynrei ynda la leit ki ia kynduh ia ka jingiap bad ka jingjia basngewsih. 

Ha surok ym don jingshngaiñ, ha suiñ ym don jingshngaiñ, ha Park ym don jingshngaiñ, ha duriaw ym don jingshngaiñ, ha iew ha hat, ym don jingshngaiñ. Haba kumne haei keiñ dang don jingshngaiñ!

Paralok baieit, hapdeng kata ka jingbym don jingshngaiñ shuh, nga kwah ban iathuh ïa phi ïa ka khubor babha, bad kata ka long dang don ka jaka kaba shngaiñ ïa ngi, bad haba ngi leit sha kata ka jaka, kan don ka jingiada bad ka jingsumar kaba kyrpang.

Lehse phi lah ban pyrkhat kaei kata ka jaka, bad shaei ka don? Kane ka jaka dei U Jisu Khrist. U Jisu Khrist u long ka jaka rieh ba shngaiñ tam ïa ngi wat hapdeng kane ka pyrthei bym don jingshngaiñ shuh. Haba ngi ngeit bad ngi shaniah ha U, ma U un iada bad un pyllait ïa ngi na ki jingma bad jingmynsaw ba har rukom.

PROBERB 18:10

Ka kyrteng U Trai ka long ka kut baskhem: u bahok u phet sha ka, bad u skhem.

Proverbs 18:10 NKJV

The name of the Lord is a strong tower; The righteous run to it and are safe.

Ha ka NKJV ka ong Safe, kaba mut Shngaiñ 

SALM 61:3 KHB

Naba me ju long ka jaka rieh ïa nga, ka kut baskhem na u nongshun.

U nongshun lah ban dei u Soitan, lah ban dei u briew. Hynrei haba ngi nang ban shaniah ha U Trai, ma U un sumar ïa ngi, la ka long haba ngi iaid ngi ïeng, ngi trei ngi ktah, bad wat haba ngi thiah mynmiet.

SALM 4:8 KHB

Ha kaba suk ngan thiah bad ngan ïohthiah ruh: naba tang ma me, A Trai, men pynshong ïa nga ha kaba suk.

SALM 4:8 KHACLBSI

Haba nga dem, nga leit thiah ha ka jingsuk; tang ma me hi, A Trai, me sumar janai ïa nga.

U Trai un sumar, U Trai un iada.

SALM 33:18-20 KHB

[18] Ha khmih, ka khmat U Trai ka don ha kita kiba sheptieng ïa u, ha kita keiñ kiba kyrmen ha ka jingisynei jong u; [19] ïa ka ban pyllait ïa ka mynsiem jong ki na ka jingïap, bad ban sumar im ïa ki ha ka 'nemsniew. [20] Ka mynsiem jong ngi ka la ap ïa U Trai: u long ka jingïarap jong ngi bad ka stieh jong ngi.

Shuh shuh ha ka kitab Salm 91:1…

SALM 91:1-8, 10 KHB

[1] Uta uba shong ha ka jaka barieh jong U Bahakhlieh Tam Eh, un ïoh ïaineh hapoh ka jingkah jong U Badonbor Baroh. [2] Ngan ong shaphang U Trai, “U long ka jaka rieh jong nga bad ka kut jong nga; U Blei jong nga, ha uba nga shaniah.” [3] Naba un pyllait ïa me na ka shangkhawiah jong u nongriam, bad na ka jingïapkhlam ba pynsniew. [4] Un tap ïa me da la ki sner, bad hapoh ki thapniang jong u men ïoh rieh ïa lade: ka jingshisha jong u ka long ka stieh bad ka 'tiehbah. [5] Men ym sheptieng na ka jingtriem mynmiet, lymne na u khnam ba her mynsngi; [6] na ka jingïapkhlam ba ïaid ha ka ba-dum, lymne na ka jingpynjot kaba pynjot mynsngi. [7] Ha syndah jong me shi hajar kin kyllon, bad shiphew hajar ha ka kti kamon jong me; hynrei, kan ym wan hajan jong me. [8] Tang da la ki khmat men khmih, bad men ïohi ïa ka bainong jong ki bymman.

[10] kan ym jia ei ei ka basniew ïa me, lymne kano kano ka jingïapthem kan ym wan hajan ka ïingjaiñ jong me.

Paralok baieit, dei tang ha U Jisu ka don ka jingshngaiñ, kumta man ka sngi wat nym klet ban duwai, ban aiti ha U ïa kiei kiei baroh. 

Shuwa ban mih na ïing duwai, shuwa ban leh eiei duwai, shuwa ban thiah duwai, kumta U Trai un iada bad un sumar, un pyllait na ki jingma jingmynsaw baroh kiba lah ban wan pyrshah ïa ka jingim jong ngi. 

To ngan duwai na ka bynta jong phi baroh, Ah Blei uba U Kpa jong ngi uba ha bneng, nga wan sha Me ha ka kyrteng U Jisu, nga ainguh ïa Me ba Me long U Nongiada bad u Nongsumar jong ngi, hooid wat la ngi im ha ka pyrthei ka bym don jingshngaiñ shuh, hynrei nga tip ha Me ka don ka jingshngaiñ, kumta nga duwai ia kaba men iada bad men sumar ïa la ki jong ki briew jong Me, men pyllait na kano kano ka jingma, jingmynsaw, namar ha Me ka don ka jingshngaiñ bashisha. Trai wat shah ba u bymman un pynjot, bad un pyniap ïa ki mynsiem bakordor. Men isynei bad men iada ma me ko Trai, naduh mynta bad ha ka karta Amen.

© Jester L Mawlong | June 26, 2025