Lai tylli kiei kiei kiba kjap noh ia ka jingim jong u bangeit

Lai tylli kiei kiei kiba kjap noh ia ka jingim jong u bangeit

Kiei kita?

Ha ka gospel u Loukas 8 lynnong la ïathuh ïa ngi shaphang ka pharshi u nongbet, bad ha kane ka pharshi la ïathuh shaphang u symbai ba hap hapdeng ki diengshiah, bad la ong ba kine ki shiah, ki ïa kjap noh ïa uta u symbai haduh ba um lah shuh ban seisoh. To ngin ïa peit mynta kiei kita kiba kjap.

LOUKAS 8:14

Uta uba la hap hapdeng ki dieng Shiah te, long kita kiba ju ïohsngew, te katba ki nang pynleit la ki sngi ka rta, la kjap ïa ki da ki jingkhuslai bad ka spah, bad ki jingsngewbha kane ka jingim; te kim sei ki soh ki ba-ih bha. 

Katkum kane ka gospel u Loukas 8:14 ngi iohi ïa ki lai tylli kiei kiei kiba kjap ïa ka jingim jong u bangeit.

1. Ki jingkhuslai 

Ka jingkhuslai ka dei kaba nyngkong eh ka ban kjap ïa ka jingim bad jinglong mynsiem jong u bangeit. Phin shem u briew ynda haba ka jingkhuslai ka la ban ïa u, un nym kwah shuh ban leh eiei. Wat ban bam ban dih, ban sum ban sait ruh um kwah, sa katno tam lei ban shakri ïa U Blei. Kata ka dei ka bor jong ka jingkhuslai. Dei namar kata ka daw, U Jisu u ong, wat khuslai shaphang la ka jingim, u ong shuh shuh, uei uta uba da khuslai uba lah ban pyntam shipruh ïa ka ka ryngïeng?

MATHAÏOS 6:25-34 KHB

[25] “Namar kata, nga ong ha phi, wat khuslai ïa la ka jingim, kaei ba phin bam, lane kaei ba phin dih; lymne ïa ka met jong phi, kaei ba phin kup. Ka jingim kam long kaba kham kor ïa ka jingbam, ka met ruh ïa ka jaiñkup? [26] To khmih thuh ïa ki sim bneng, ba kim ïabet, lymne kim ïa-ot, lymne kim ïalum ha ki thiar; hynrei, pynban, U Kpa jong phi uba ha bneng u bsa ïa ki. Phi te phim long kiba kham kor shibun ïa ki? [27] Uno te na phi, haba u da khuslai ruh, uba lah ban pyntam shi pruh ïa la ka rynïeng? [28] Balei ba phi khuslai shaphang kaba kup ruh? To pyrkhat ïa ki 'tiew Lili ka ryngkew, katno ki man bha; kim trei, lymne kim thir; [29] hynrei, nga ong ha phi, ba wat u Solomon ha ka burom jong u baroh um shym la kup kum uwei na kine. [30] Lada U Blei te u pynkup kumta ïa u 'hur ryngkew, uba mynta u long, lashai te la bred ha ka lawar ding, kaba katno tam ïa phi, A phi kiba rit ka jingngeit! [31] Namar kata, wat khuslai, da kaba ong, ‘Kaei ba ngin bam?’ lane, ‘Kaei ba ngin dih?’ lane, ‘Kaei ba ngin kup?’ [32] naba ïa kita kiei kiei baroh, ki Jentil ki ïawad; naba U Kpa jong phi uba ha bneng u tip ba phi donkam ïa kine kiei kiei baroh. [33] Hynrei, phin ïawad shuwa ïa ka hima U Blei, bad ïa ka hok jong u: te ïa kine kiei kiei baroh, yn sa ai lang tam ha phi. [34] “Namar kata, wat khuslai na ka bynta kaba lashai, naba kata kaba lashai kan khuslai na ka bynta la ka jong. Ïa ka sngi ka biang la ka jong ka basniew.”

Kumta kum ki bangeit, ngi hap ban ialeh ban kiar na ka jingkhuslai, namar lada ngi ailad ïa ka jingkhuslai, kan kjap beit ïa ka jingim mynsiem jong ngi.

2. Ka spah 

Phin shem bun bah ki briew haba ki la beh eh ïa ka spah, kin klet beit ïa U Blei, namar kim don por shuh bad U Blei, ym don por shuh ban duwai, ban pule Bible, lada duwai ruh la shu duwai dep niam dep rukom, la shu duwai kyrkieh.

Dei na kata ka daw u Solomon ong, wat ai ha nga shibun ka spah ioh ngan klet ïa me, hynrei ai ha nga ka jingbam kat ban biang.

PROBERB 30:8-9

⁸… to bsa ïa nga da ka jingbam kat ban biang ïa nga: ⁹ïoh ba ngan sngewdap, bad ba ngan len ïa me, bad ngan ong, “U Trai u long uei?” lane ïoh ba ngan duk, bad ba ngan tuh, bad pyndonkambeiñ ïa ka kyrteng U Blei jong nga.

Ka Balang ha Laodikaïa ruh ka dei ka Balang kaba la dap la biang, bad kata ka jingsngew dap sngewbiang ka la pynlong ïa ka ba kan hiar ha ka jinglong mynsiem. Ka spah ka ka kjap noh ïa kane ka Balang, haduh ba ka la shu kylla blem blem.

JINGPYNPAW 3:15-17

¹⁵“Nga ithuh keiñ ïa ki jingleh jong pha, ba pham long kaba khriat lymne kaba shit: A nga da kwah dik dik ba phan da long kaba khriat lane kaba shit! ¹⁶Kumta, naba pha long kaba shu syaid, khriat ruh em, shit ruh em, ngan sa prie noh ïa pha na ka shyntur jong nga. ¹⁷Naba pha ong, “Nga kaba riewbha, bad nga la pynman spah, te ngam don ka jingkyrduh ei ei ruh em,” bad pham tip ba ma pha hi pha long kata kaba lanot khop, bad kaba jynjar sat, bad ka baduk, bad ka bamatlah, bad ka balyngkhuit. 

Haba ong kumta, kam mut pat ban ong ba ngim dei shuh ban trei ban ktah, ban kamai kajih, ngi lah ban trei, ban kamai kajih, hynrei ngim dei pat ban buh ïa ka spah ha khmat eh jong ka jingim jong ngi, hynrei ngi hap ban buh ïa U Blei ha khmat.

MATHAÏOS 6:33 Hynrei, phin ïawad shuwa ïa ka hima U Blei, bad ïa ka hok jong u: te ïa kine kiei kiei baroh, yn sa ai lang tam ha phi.

3. Ki jingsngewbha pyrthei 

Ka jingsngewbha pyrthei ruh ka dei kawei kaba kjap ïa ka jingim jong u bangeit. Shisien ba u briew u la ieit ia ki jingsngewbha pyrthei, un klet beit ïa U Blei. U Ïoannis lei u ong ba uta uba ieit ïa ka pyrthei, um don shuh ka jingieit ïa U Blei, lane ka jingieit jong U Blei ruh kam don shuh ha u.

1 ÏOANNIS 2:15

Phi wat ieit ïa ka pyrthei, lymne ïa kita kiei kiei ruh kiba ha kata ka pyrthei. Lada uno uno ruh u ieit ïa ka pyrthei, kata ka jingieit U Kpa kam don shuh ha u. 

U Ïoannis u ong beit, “phi wat ieit ïa ka pyrthei” namar ka jingieit pyrthei ka pynjngai noh na U Blei.

Mut dur kat u Demas u briew uba la shakri ïa U Blei, uba la ïa trei ryngkat bad u Apostol Paul, hynrei ynda kata ka jingieit pyrthei ka la ioh rung ha u, um kwah shuh ban shakri Blei, um kwah shuh ban ïa iaid bad ban ïa trei bad u apostol Paul. 

Ha ka shithi sha U PHILEMON 1:24 la ong ba u Demas u long u lok babaïatrei lem jong nga. Hynrei ha ka shithi ba 2 TIMOTHI 4:9-10 la ong ba u Demas u la ieit pyrthei bad u la iehnoh ïa nga.

2 TIMOTHI 4:9-10

⁹To pynkloi ban wan shen sha nga; ¹⁰namar u Demas u la iehnoh ïa nga, bad u la ieit ïa kane ka pyrthei, bad u la leit noh sha Thessaloni…

U briew ynda u la ieit pyrthei, u klet lut wat ïa ki paralok kiba ju ïatrei ryngkat bad u.

Kine ki long ki lai tylli kiei kiei kiba kjap noh ïa ka jingim jong u bangeit, bad ba pynlong ia u bangeit ban ym poi sha ka thong. Sei te sei soh, hynrei khlem ih bha ong ka ktien jong U Blei.

Nga ngeit U Blei u la kyrkhu ïa ngi lyngba kane ka jinghikai ba lyngkot. Amen 

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester L Mawlong | July 5, 2025