KI SNGI JONG U NOAH BAD KI SNGI JONG U LOT
Balei U Blei u pynjot noh ïa ki briew ha ka por jong U Noah bad ha ka por jong U Lot? Kaei ba ki la leh?
LOUKAS 17:26-30 KHB
[26] Te kumba ka la long ha ki sngi u Noah, kumta ruh kan long ha ki sngi U Khun u briew. [27] Ki la ïabam, ki la ïadih, ki la ïashongkurim, la ïa-pynshongkurim ïa ki, tad ynda kata ka sngi ba u Noah u la rung hapoh kata ka ïinglieng, mynba kata ka jingshlei ka la wan, bad ka la pynjot noh ïa ki baroh. [28] Kumjuh ruh kumba ka la long ha ki sngi u Lot; ki la ïabam, ki la ïadih, ki la ïathied, ki la ïadie, ki la ïathung, ki la ïatei: [29] hynrei, ha kata ka sngi ba u Lot u la mih noh na Sodom, U Blei u la pynhap slap da ka ding bad da u kyndok na bneng, bad u la pynjot noh ïa ki baroh. [30] Kumta ruh kan long ha kata ka sngi ha kaba yn pynpaw ïa U Khun u briew.
U Jisu u ong, kumta ruh kan long ha ki sngi u Khun u briew. Kaba kren ia kine ki sngi ba nga bad phi ngi im, kiba dei ruh kita ki sngi bad U Jisu u la jan ban wan, bad shen un sa pynjot noh ïa kane ka pyrthei bymman.
Kaei ba ki briew ha ka por u Noah bad u Lot ki long?
1. Ki im tang ha ka ïa bam, ïa dih.
Ka jingiabam ia dih hangne kam mut tang ia ka ja ka sha, hynrei ki jingdih kiba sniew, ba pynbuaid.
Ha ka por jong U Noah ki briew ki im tang ha ka ïa bam ïa dih bad ialeh sngewbha ha ka doh. Kim don jingpyrkhat ia ka bymjukut.
U Jisu u ong, kumta ruh kan long ha ki sngi u Khun u briew.
Haba ngi peit ïa ka jinglong jingman jong ki briew ha kine ki sngi ngi iohi ba ka la iasyriem bad ka por jong U Noah.
Ka jingngop jong ki briew ha ki jingdih pynbuaid (drugs, kyiad etc) kaba la ishyrkhei. Naduh ki samla ba dang lung ka rta, wat ki kynthei khynnah ki la ïa ngop ha ka kyiad, u drugs, ha ka bam ka dih. Kaba la ishyrkhei!
Ki shnong ki thaw ki la shaiong ngaiñ namar kine ki jingsniew. Ki sengbhalang ki ialeh dohiap dohim ban teh lakam, hynrei katba dang ialeh katta i kumba ka nang jur pynban.
Shuh shuh kaei ba ngi iohi ia ki briew ha ka por u Noah -
2. Ïashongkurim - ïa-pynshongkurim.
Ka don kata ka jingiashongkurim, ka jingia pynshongkurim pathar - lyngkar. Ka jingshongkurim kaba ym katkum ka mon lane ka jingbuhbeit U Blei. (Jen 6:1-2)
Ha kine ki sngi ruh ngi iohi ia kaba kum kane ka jinglong. Ka jingiashongkurim pynshongkurim ka la long lyngkar haduh katta katta. Ym lah shuh ban teh lakam. Wat ki khynnah ba dang rit rta, lah shu ïa shongkurim kulmar.
Lada khang na ïing na sem, phet noh syndon na ïing, lada iai khang shi iai khang, pyniap noh ïa lade ruh. Nga ngeit phi iohi kumba ki news, na ka sngi shabka sngi ki mih kiba kum kita ki jingjia.
Ka shongkha shongman ka la pathar haduh katta katta, na kata ka daw sa mih ki jingpang khyllah, jingpang aids laiphew jaid.
Ka jingshongkha pathar ka pynmih ïa ka pateng ba pathar!
Kane ka dei ka pop ba U Blei um lah ban shah.
Nangta shuh shuh kaei ba ki briew ha ka por jong U Noah bad u Lot ki long:
3. Ïa thied - ïa die, ïa thung - ïa tei.
Ban ïa thied ïa die, ïa thung ïa tei kam long ka pop, hynrei kaei ba ki briew ha ka por jong U Noah ki leh ka long ba ki briew kim don por shuh bad U Blei, lah shu lap miet tang ha ka jingïathied ïa die, ïa thung ïa tei, hynrei sha U Blei Zero.
Bad kata ka jingïathied ïa die ruh ka la long da ka lynti bym hok, ïa thung ïa tei bym hok. Leh tuh, leh thok, leh shukor.
Ha kine ki sngi ruh ngi iohi ia kaba kum kata ka jingïathied ïa die bymhok, ïa thung ïa tei, haduh ba kim don por shuh bad U Blei. Teng teng wat da ki da ki lynti bymhok da ki lynti bymdei ruh. La shu leh klop leh buit laiphew jaid. Kata ka dei kaei ba ki briew ki long!
Kaei shuh shuh kaba ngi iohi ia ki briew ha ka por u Noah ka long:
4. Ka jingiapyniap bad ka jingleh jubor kaba khraw.
JENESIS 6:5 KHB
Te U Trai u la ïohi ba ka jingleh bymman jong u briew ka la khraw eh ha ka pyrthei, bad ba ka jingthmu baroh ki jingpyrkhat ka dohnud jong u ki la long bymman ha la ka sngi.
* Haba ka don ka jingbymman, ka don ka jingsniew laiphew jaid.
Ha ka por jong u Noah, ka jingpyrkhat jong u briew ka la long bymman ha la ka sngi. Man ka sngi ki plan beit kumno ban ioh leh kam bymman.
Kane ka jinglong bymman, ka la pynsngewsih ïa U Blei shikatdei eh. Haduh ba U Blei u la kylla kabamut ba u la thaw ïa u briew. Haduh ba U la ong, ngan pynjot noh!
JENESIS 6:6 KHB
Bad U Trai u la kylla-ka-bamut ba u la lah thaw ïa u briew ha ka pyrthei, bad la pynsngewsih eh ïa u ha la ka dohnud. [7] Te U Trai u la ong, “Ngan pyndam noh ïa u briew ïa uba nga la thaw na khmat ka khyndew; naduh u briew haduh u mrad, bad haduh u kynja bapar, bad ïa ki sim bneng; naba nga kylla-ka-bamut ba nga la thaw ïa ki.” [8] Hynrei, u Noah u la shem ka jingieit isynei ha khmat U Trai.
* Ka pop bad ka jingbymman ka
pynsngewsih ïa U Blei.
* Ka jingbymman ka khot ïa ka jingpynjot!
U Blei u la hap ban pynjot noh ia ka pateng bynriew u Noah namar ka pop bad ka jingbymman, u la pynjot noh ia ka Sodom bad Gomorah namar ka pop bad ka jingbymman.
U Jisu u ong, kumba ka la long ha ki sngi u Noah, kumta ruh kan long ha ki sngi u Khun u briew. Kaba kren ia kine ki sngi ba nga bad phi ngi im, kiba dei ruh kita ki sngi bad U Jisu ka jan ban wan.
Kumba ngi la ia kren shakhmat, ngi iohi ïa kine ki sngi jong ngi, ki la long thik kum ha ki sngi jong U Noah. Kumba U Blei u la pynjot noh ïa ka pateng bynriew jong u Noah bad u Lot, shen un sa pynjot noh ïa kane ka pateng bynriew jong ngi, lada ka dang iai im ha ka jingbymman!
* U Blei um lah ban shah ia ka bymman. Ka jingim bymman ka pynbitar ia U Blei.
KA KHUBOR BABHA!
U Blei un nym shu pynjot khlem da ai jingmaham, khlem da ai lad ba kin kylla bamut. U maham, u ailad ba kin kylla bamut, hynrei lada ki iai pyneh dohnud, ki leh bymsuidñiew, ki kyntait, bad ki iai leh bymman, U Blei khlem artatien un pynjot khlem jingisynei.
U Blei u phah thaw ïa ka ïinglieng ïa u Noah bad u phah ruh ïa u Noah ban ïalap, ban maham…hynrei haba kim treh u pynjot noh khoit ia ki.
U Blei shuwa ban pynjot ïa ka Sodom bad Gomorah u ai ka lad ba kin kylla bamut, u phah ïa u Lot bahok ban ïalap ba ki briew kin nym leh bymman, hynrei hakhmat jong ki ka long tang kum ka jingkren biria. Haba kim shym la sngap U Blei u la thang ingkhong ia ki ha ka ding ba shyrkhei!
Ïa kane ka patang bynriew jong ngi mynta ruh U Blei u dang ai lad ba ngin kylla bamut, ba ngin phai sha U Blei. U dang phah ia ki Nongialap na ka por sha ka por, pynban lada ngi leh bymsuidñiew, khlem pep ka jingpynjot ba kyndit kyndit kan ia kane ka pateng bynriew ruh!
2 PETROS 2:5-6 KHB
[5] bad lada um shym la riej ïa ka pyrthei ba-mynbarim, hynrei, ïa u Noah, u nongïalap ïa ka hok, lem bad hynñiew ngut kiwei pat u la ri kyndong, mynba u la pynwan ïa ka jingshlei ha kata ka pyrthei ki bymriewblei; [6] bad haba la pynlong dpei ïa ki nongbah ka Sodom bad Gomorra, u la pynrem ïa ki da ka jingpynkyllon khram, u da buh ïa ki ban long ka rukom maham ïa kita ki ban im bymriewblei;
Shuh shuh ka Ktien jong U Blei ka pyni ba U Blei um shym la riej wat ia ki angel ki bym shym la ri ïa ka burom tyngrai jong ki…
2 PETROS 2:4 KHB
Namar lada U Blei um shym la riej ïa ki angel mynba ki la leh pop, hynrei, haba la shop arsut ïa ki sha dujok, u la aiti noh ïa ki ha ki krem ka jingdum tliw tliw, ba la ri noh ïa ki, ïa ka jingbishar;
Un nym riej ruh ia kae ka pateng jong ngi.
Kaei ba la jia ha ka por jong u Noah bad u Lot, ka long ka nuksa bad ka jingmaham ïa ngi.
Paralok baieit, wat nym ap haduh ba U Blei un da bitar ïa phi, hynrei kylla kabamut, ngeit bad pdiang noh ïa U Jisu ha ka dohnud jong phi.
U Noah watla u im ha ka pateng bynriew ba pop bad ba bymman, hynrei u la ri ia lade ha ka jingkhuid bad ka hok, u la rung ha ka ïing-lieng, bad u la lait na ka jingpynjot jong ka jingshlei um.
Nga ong ia phi ruh, wat la phi im hapdeng ki briew ba bymman, hynrei ri ia lade ha ka jingkhuid, rung ha ka ïing-lieng, ba long ka dur U Jisu Khrist, khnang ba phin lait na ka jingbitar jong U Blei.
ÏOANNIS 3:16
U Blei un kyrkhu ïa phi, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester L Mawlong | Sept 27.2025
Comments
Post a Comment