U BLEI U LONG UBA LAH
U Blei ba ngi shakri u long U Blei uba donbor bad uba lah baroh. Ha ka Ktien Hebru la ong El-Shaddai, bad ha ka English la ong, Omnipotent - Kaba mut, U Blei badonbor baroh.
Une U Blei ba donbor baroh u la paw ha u Abram mynba um pat shym la ioh khun.
JENESIS 17:1 KHB
Te u Abram u la long khyndaiphew khyndai snem, bad U Trai u la paw ha u Abram, bad u la ong ha u, “Nga long U Blei U Badonbor Baroh; to ïaid ha khmat jong nga, bad to long me uba janai.
Ha ka NLT Bible ka ong, 'El-Shaddai', kaba mut 'U Blei ba donbor baroh' lane 'U Blei ba lah baroh'
Genesis 17:1 NLT
When Abram was ninety-nine years old, the Lord appeared to him and said, “I am El-Shaddai—‘God Almighty.’ Serve me faithfully and live a blameless life.
Lada ngi pule ter ter, ngi iohi kumno U Blei u la pynkylla ïa u Abram sha u Abraham. Na u bym don khun, sha u kpa kiba bun ki jaid bynriew. Hallelujah!
Haba ngi pule ha ka Bible ngi iohi une U Blei badonbor U long U Blei uba lah baroh. U lah ban leh wat ïa kata kaba u briew um lah ban leh. Bad ha U, ym don kawei ruh kaba um lah. Hallelujah!
Ym don ka bym lah bad U Blei…
LOUKAS 1:37 KHB
Naba kawei ruh ka ktien na U Blei kan ym long khlem ka bor.”
LOUKAS 1:37 KHACLBSI
Naba ym don kano kano kaba U Blei um lah ban leh.”
Luke 1:37 AMP
For with God nothing [is or ever] shall be impossible.”
MATHAÏOS 19:26 KHB
“Da ki briew kata ka bym lah, hynrei, da U Blei kiei kiei baroh ki long kiba lah.”
EPHESOS 3:20-21, U lah ban leh palat ban ïa kaei ba ngi lah ban pyrkhat.
Uta u dei U Blei… Hallelujah!
1. U long uba lah ban pynim janai ïa ngi.
Mynba ngim pat shem ïa U Jisu, ngi long kita kiba la ïap. Ngi la ïap ha ki jingryngkang bad ki pop, ong ka Ktien jong U Blei. Hynrei haba ngi ngeit ïa U Jisu, U Jisu u la pynim pat ïa ngi. EPHESOS 2:5
HEBRU 7:25
Namar kata, u lah ruh ban pynim janai ïa kita kiba wan ha U Blei da u, haba u im ha la ka rta ïa ka ban ïasaid na ka bynta jong ki.
Ka jingpynim jong U Trai ka long kaba janai, pura, ym shiteng shiliang.
2. U long uba lah ban pyndep ïa kaei ba U
la kular.
U Blei u la kular ban ai khun shynrang ïa U Abraham…(story of Abraham), kumta u Abraham u la ngeit ïa kaei ba U Blei u la kular, bad ngi iohi kumno U Blei u la pyndep thik kumba u la kular ha ka jingim jong u Abraham.
ROM 4:19-22
[19] Bad da kaba u long bymtlot ha ka jingngeit, um shym la ñiew ïa la ka met ba la lah kylla sdot noh lypa, haba u la long jin shispah snem ka rta, lymne ïa kata ka jingkylla sdot noh ka kpoh ka Sara; [20] bad da kaba u khmih ha kata ka jingkular ka jong U Blei, um shym la lyngngoh artatien da ka jingbymngeit; hynrei, la pynkhlaiñ ïa u ha kata ka jingngeit, u da pyndonburom ïa U Blei; [21] haba u la sngewskhem ruh ba kat kaba u la lah kular, u don bor ïa ka ban pyndep ruh. [22] Namar kata te, “la ñiew ka hok ïa kata ha u.”
3. U long uba lah ban pynkhiah ïa ki
jingpang jong ngi.
MATHAÏOS 9:28-30 KHB
[28] Haba u la wan hapoh ïing te, kita ki bamatlah ki la ïawan ha u; te U Jisu u la ong ha ki, “Phi ngeit ba nga lah ban leh ïa kane?” Ki la ong ha u, “Ho-oid, ko Trai.” [29] Ynda kumta, u la ktah ïa ki khmat jong ki, u da ong, “Katba kum ka jingngeit jong phi kan long ha phi.” [30] Ïa ki khmat jong ki te la pynpeit. U Jisu te u la maham ïa ki, u da ong, “To sumar ban ym tip mano mano ruh.”
U Jisu u kylli ïa kita kiba matlah, Phi ngeit ba nga lah ban pynkhiah ïa phi? Bad haba ki ong ha u, Ngi ngeit, kumta u la pynkhiah ïa ki.
U Blei u long uba lah ban pynkhiah ïa ki jingpang jong phi ruh haba phi ngeit ha U. Amen
Shuh shuh ngi iohi na ka Ktien U Blei, shaphang uwei pat uba pang ñiangthihlieh.
MARKOS 1:40-42 KHB
[40] Te u bapang 'ñiangthohlieh u la wan ha U, u da kyrpad ïa U, bad u da dem khohsiew ha U, bad u da ong ha U, “Lada me mon, me lah ban pynkhuid ïa nga.” [41] Te U Jisu haba U la sngewsynei, U la kner ïa la ka kti bad U la ktah ïa u, bad U ong ha u, “Nga mon; to men long khuid.” [42] Te U tang shu la kren, uta u 'ñiangthohlieh u la iehnoh ïa u, bad la pynkhuid ïa u.
4. U long uba lah ban pyllait ïa ngi na ki
jingma!
Shuwa ban bret ïa u Shadrak, Meshak bad Abednego ha ka lawar, kaei ba ki la ong ka long, Ba U Blei jong ngi u lah ban pyllait ïa ngi na ka lawar ding!
DANIEL 3:16-17 KHB
[16] U Shadrak, u Meshak, bad u Abednego, ki la ïathuh bad ki la ong ha u syiem, “Ko Nebukhadnessar, ngim donkam ban jubab ïa me ha kane. [17] Lada ka long kumta, U Blei jong ngi ïa uba ngi shakri u lah ban pyllait ïa ngi na ka lawar ding ba la thang rhem; bad un pyllait ïa ngi ruh na ka kti jong me, ko syiem.
La bret shisha ïa ki ha ka lawar ding ba la thang rhem hynñiew shah, hynrei kim shym la ing ong ka Ktien jong U Blei. Bad wat kata ka jingsma ing ruh kam don ha ki jaiñ jong ki. Kaba phylla!
Parabangeit baieit, ngi im ha ki sngi kiba la ker sawdong da ki jingma suda, wat mynsngi mynshai ym don jingshngaiñ shuh. Hynrei to ngin nym sheptieng, U Blei jong ngi u long uba lah ban iada ïa ngi. Hallelujah!
SALM 91:1-13 KHB
[1] Uta uba shong ha ka jaka barieh jong U Bahakhlieh Tam Eh, un ïoh ïaineh hapoh ka jingkah jong U Badonbor Baroh. [2] Ngan ong shaphang U Trai, “U long ka jaka rieh jong nga bad ka kut jong nga; U Blei jong nga, ha uba nga shaniah.” [3] Naba un pyllait ïa me na ka shangkhawiah jong u nongriam, bad na ka jingïapkhlam ba pynsniew. [4] Un tap ïa me da la ki sner, bad hapoh ki thapniang jong u men ïoh rieh ïa lade: ka jingshisha jong u ka long ka stieh bad ka 'tiehbah. [5] Men ym sheptieng na ka jingtriem mynmiet, lymne na u khnam ba her mynsngi; [6] na ka jingïapkhlam ba ïaid ha ka ba-dum, lymne na ka jingpynjot kaba pynjot mynsngi. [7] Ha syndah jong me shi hajar kin kyllon, bad shiphew hajar ha ka kti kamon jong me; hynrei, kan ym wan hajan jong me. [8] Tang da la ki khmat men khmih, bad men ïohi ïa ka bainong jong ki bymman. [9] Naba me, A Trai, me long ka jaka rieh jong nga! Me la pynlong ïa U Bahakhlieh Tam Eh ka jaka shong jong me; [10] kan ym jia ei ei ka basniew ïa me, lymne kano kano ka jingïapthem kan ym wan hajan ka ïingjaiñ jong me. [11] Naba un hukum ïa la ki angel shaphang jong me, ban sumar ïa me ha ki lynti jong me baroh. [12] Kin rah ïa me ha la ki kti, ba ïoh men jynthut la ka kjat ha u maw. [13] Men ïuh halor u sing bad u 'seiñpuh: ïa u sing samla bad ïa u bseiñ men ïuh roit hapoh sla'jat.
U Blei uba la ïada ïa u Shadrak, Meshak, Abednego, U long u juh U Blei u ban ïada ïa ngi. Hallelujah!
5. U long uba lah ban sumar ïa ka
mynsiem jong ngi.
Shisien ba phi la aiti ha U Trai, u Soitan um lah ban knieh noh ïa ka jingim jong ngi na U Trai. U Blei u long uba lah ban ïada, ban sumar ïa kata kaba ngi la aiti ha u - ka jingim, ka ïing ka sem, etc.
U Apostol Paul u ong, nga ngeit ba U long uba lah ban da…
2 TIMOTHI 1:11-12 KHB
[11] sha kaba la thung ïa nga u nongïalap, bad u apostol, bad u nonghikai. [12] Namar kane ka daw, nga shah ruh ïa kine kiei kiei: pynban, ngam sngewlehrain; namar nga la ithuh ïa uta ha uba nga la ngeit, bad nga ngeit skhem ba u long uba lah ban da ïa kata kaba nga la aiti ha u hamar kata ka sngi.
U Trai un ïada, un sumar ïa ngi na ki jingpynshoi.
MATHAÏOS 6:13 KHB
To wat ïalam ïa ngi sha ka jingpynshoi ruh, hynrei, sumar ïa ngi na ka basniew.
Ïa U Jisu la pynshoi bad u la jop, u lah ruh ban ïada ïa ngi. Hallelujah!
HEBRU 4:15; 2:18,
U Judah u ong shuh shuh, ba un ïada ïa ngi ba ngin ym kyllon.
JUDAH 1:24-25 KHB
[24] Te ha uta uba lah ban ri kyndong ïa phi ba khlem jynthut, bad ban pynïeng ïa phi ba khlem pop ha khmat ka burom jong u ha ka jingkmen bakhraw eh, [25] ha U Blei U Bastad tang ma u hi uba U Nongpynim jong ngi, da U Jisu Khrist uba U Trai jong ngi, to long ka burom, bad ka jingkhraw tam, ka jingsynshar bad ka bor, mynta ruh, bad sha ki bymjukut baroh: Amen.
To U Blei un kyrkhu ïa phi baroh.
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester L Mawlong | Nov 12, 2025
Comments
Post a Comment