Kaba iohsngew ïa ka sur ba U khot

Kaba iohsngew ïa ka sur ba U khot

Lada ngi peit na kaei ba la jia ha ka Bible ngi iohi kita kiba iohsngew ïa ka jingkhot jong U Trai bad kita kiba shu ia bud tynneng ka don ka jingiapher bak lybak.

Kaba iohsngew ïa ka jingkhot:

1) Ka pynlah ban iehnoh ïa ka pyrthei bad  

     ka pop.

2) Ka pynlah ban ñiewduh ïa kiei kiei   

     baroh na ka bynta U Khrist.

3) Ka pynlah ban bud ïa U Trai khlem da 

     phaidien wat haba ki ia kynduh ïa ki 

     jingeh kiba bun.

Hynrei kiba shu ïa bud tynneng pat kin nym lah ban iehnoh ïa ka pyrthei / pop. Kin nym lah ban kheiñ duh na ka bynta U Khrist. Bad kin nym lah ban shah ïa ki jingeh bad tang shipor kin phaidien noh. 

Ngi iohi ka nuksa na kito ki 4 hajar, 5 hajar ngut ki briew kiba la ia bud ïa U Jisu. Ha kaba kut sah sa tang 120 ngut, kiba la ia lum lang ha kamra ba haneng.

Ngin ia peit mynta ïa ka suksa, kumno ba kita kiba iohsngew ïa ka jingkhot jong U Trai, ki da kloi shisha ban iehnoh, ban ñiewduh bad ban iaineh skhem.

Nuksa 1: Ki synran U Jisu

MATHAÏOS 4:18-22 KHB

[18] Haba U Jisu u ïaid harud ka duriaw Galilaïa, u la ïohi ar ngut shipara, u Simon ïa uba khot “u Petros”, bad u Andriw u para jong u, ba ki dang ïabred ïa ka jar ha kata ka duriaw; naba ki ju long ki nongtong dohkha. [19] U la ong te ha ki, “To ale nadien jong nga, te ngan pynlong ïa phi ki nongtong briew.” [20] Kumta, haba ki la iehnoh dak ïa ki jar, ki la ïabud ïa u. [21] Te haba u la leit noh nangta, u la ïohi ar ngut kiwei pat kiba shipara, u Jakob u khun u Sebedi, bad u Ïoannis u para jong u, ha ka lieng bad u Sebedi u kpa jong ki, ba ki dang ïashna ïa ki jar jong ki, bad u la khot ïa ki. [22] Ki ruh de, haba ki la iehnoh dak ïa ka lieng bad ïa u kpa jong ki, ki la ïabud ïa u.

Bad haba ki la bud ïa U Trai, ki iehnoh lut ïa kiei kiei baroh, ki la iaineh skhem khlem phaidien shuh, kampher wat la ki mad jingeh jingialeh katno katno ruh, hynrei triang ki iaineh. Hallelujah!

Nuksa 2: U Paul mynba u dang long u Saul

Haba U la ia kynduh bad U Jisu ha kata ka lynti sha Damaskos, u la iohsngew ïa ka jingkhot jong U Trai, kumta une ruh u la iehnoh ïa kiei kiei baroh bad u la bud ïa U Jisu haduh ka jingiap.

U la kheiñ duh wat ïa la ka jong ka jingim, u la iehnoh lut wat ia kata kaba long ka jingmyntoi ïa u.

PHILIPPI 3:7-8 KHB

[7] Hynrei, kita kiei kiei kiba la long ki jingmyntoi ïa nga, ïa kine nga la ñiew ka jingduh na ka bynta U Khrist. [8] Ho-oid, shisha keiñ, bad nga ñiew ïa kiei kiei baroh ba ki long ka jingduh na ka bynta ka jingbha kor tam jong ka jingtip ïa U Khrist Jisu uba U Trai jong nga; na ka bynta jong u, nga la duh noh ïa kiei kiei baroh, bad nga ñiew synrum ïa ki, khnang ba ngan ïoh ïa U Khrist.

Kumba ngi tip, u apostle Paul u la ia kynduh shibun ki jingeh ha ka jingiaid lynti jong u, hynrei u la iaineh skhem triang khlem phaidien.

Kumta shuwa ban pynkut noh, nga don ban kyntu ieit ïa phi, ioh lehse baroh shi katta phi la shu bud tynneng ïa U Trai, na kata ka daw ka jingim bad jingshakri Blei ka kiew ka kiew, ka hiar ka hiar. Nga duwai ba ha kane ka por phin da iohsngew ïa ka jingkhot jong U Trai, kumta ba phi lah ban bud, ban aiti bad ban iaineh haduh kaba kut.

To U Blei un kyrkhu ïa phi. Amen 

© Jester Mawlong | March 15, 2026