KA JINGNGEIT KABA KHAM KORDOR BAN ÏA KA KSIAR
1 PETROS 1:6-7
⁶Ha kaba phi ïasngewkmen eh, la mynta khyndiat por, lada donkam, la pynsngewsih ïa phi ruh ha kiba bun jaid ki jingtynjuh; ⁷khnang ba kata kaba phrang ïa ka jingngeit jong phi, kaba kham kordor ïa ka ksiar kaba jot noh, la la phrang ruh ïa ka da ka ding, yn ïoh shem ïa ka ha ka jingïaroh bad ka burom bad ka jinglong burom, ha ka jingpynpaw U Jisu Khrist:
Hangne ngi iohi shaphang kata ka jingngeit kaba kham kordor ban ïa ka Ksiar. Kane ka pyni ba ka jingngeit jong kaba ngi don ha U Jisu ka long kaba kham kordor ban ïa ka Ksiar.
Ban don ïa ka Ksiar ka long kaei kaei kaba sngewtynnad, hynrei kaba kham sngewtynnad ka long haba ngi don ka jingngeit ha U Jisu.
Balei ka kham kordor ban ïa ka Ksiar?
Namar ba ka iai sah bymjukut. Ka Ksiar ka long temporary. Ka Ksiar kaba ki ong kam sniew ne sarang, hynrei ha ka sngi ba khadduh kan sa sarang. Lehse phin sngewphylla, hynrei la thoh ïa kane ha ka Bible. JAKOB 5:1-3
Kumta namar ba ka long kham kordor ban ïa ka Ksiar -
Ka jingkmen ba ngi don ka jingngeit ka long kham khraw ban ïa kaba ngi don Ksiar.
Ka long kaba shisha haba ngi don ïa ki Ksiar ki ksah, ngin sngewkmen, sngewheh mynsiem. Hynrei ai ba ka jingdon jong ngi ïa ka jingngeit, kan kham khraw ban ïa kata. Hallelujah!
1 PETROS 1:8-9
⁸ïa uba, haba ym ïohi ruh, phi ieit; ha uba, la phim ïohi mynta, hynrei, phi ngeit, phi ïasngewkmen eh da ka jingkmen ka bym lah ong bad kaba dap da ka burom; ⁹da kaba pdiang ïa ka jingkut ka jingngeit jong phi, ka jingpynim keiñ ïa ki mynsiem jong phi.
Ki bangeit ha ka Balang ba u Petros u sharai, ki long ki bangeit kiba sngewthuh ïa ka jingkordor jong ka jingngeit jong ki, kumta wat haba ki mad jingeh ruh ki kmen. Ïaroh i'U Trai!
Ka jingsumar kyndong ka dei ban kham sumar
Namar ba ka jingngeit jong ngi ka long kaba kham kordor ban ïa ka Ksiar, kumta ka jingsumar jong ngi ruh ka dei ban kham sumar kyndong bha.
Mutdur lada ïa ka Ksiar kaba ngi donkam tang ha kane ka pyrthei, haduh katno ngi da sumar bha ïa ka, ba mano mano yn nym don ba tuh noh. Ngi da buh bha ha ka jaka kaba shngaiñ bha.
Katba katno tam ngi dei ban kham sumar kyndong ïa ka jingngeit kaba ngi don ha U Khrist, ba uno uno ruh un nym ioh ban knieh noh.
U Paul u ong ïa u Timothy, To ïaleh ïa ka jingïaleh babha jong ka jingngeit, to men bat khak ïa ka jingim bymjukut, sha kaba la khot ruh ïa me, bad me la phla ïa kata ka jingphla babha ha khmat bun ki sakhi. 1 TIMOTHI 6:12
Namar ba ka jingngeit ka long kaba kham kordor ban ïa ka Ksiar, u nongtuh (Soitan) ruh un kwah ban tuh, kumta kumba nga ong, ngi hap ban sumar bha ïa ka.
Ka jingiaishah ïa ki jingtynjuh ruh ka dei ban kham iaishah.
Ka Ksiar ba nylla ka donkam ban rung lyngba ka ding, ban iaid lyngba ki jingphrang kiba bun. Kumjuh ruh ka jingngeit jong ngi, ba kan long kaba janai, la donkam ban iaid lyngba shibun ki jingpynphrang (jingeh, jingialeh), ka jingim ka bym mad jingeh - jingialeh kam lah ban pynmih ïa ka jingngeit kaba kham kordor ban ïa ka Ksiar.
Dei na kata ka daw, u Jakob u ong, to phin ñiew ka jingkmen suda haba phi hap (mad) ïa ki jingtynjuh.
JAKOB 1:2-4
²To phin ñiew ïa ka, ka jingkmen suda, ko parabangeit jong nga, haba phi hap ha ki jingtynjuh babun jaid; ³haba phi tip ba kata kaba phrang ïa ka jingngeit jong phi, ka pynlong ïa ka jingïaishah. ⁴Hynrei, kane ka jingïaishah, to ai kan ïoh ïa la ka jingtrei bajanai, ba phin ïoh long kiba janai bad kiba tylli biang, ki bymduna ha kaei kaei ruh. Cf. Jakob 1:12
Haba ki jingtynjuh, jingeh ki wan bad ngim lah ban iaishah, ngi thut noh ïa U Blei bad ngi kynriah noh na ka jingngeit, kumta ngin nym ïoh ïa kata ka jingngeit kaba kham kordor ban ïa ka Ksiar. Hynrei haba ngi lah ban iaishah, wat haba ki jingeh ki wan, kumta kita ki jingeh ki long kumba phrang ïa ka jingngeit jong ngi. Bad ha kaba kut ngin shem ba ka jingngeit jong ngi ka long kham khraw bad kham kordor ban ïa ka Ksiar ba nylla. Hallelujah!
Note: Haba ong kumta, kam mut ba ngi kwah khnang ïa ki jingeh jingtynjuh, hynrei lada ki wan, ngin long ready ban challenge, khnang ba ka jingngeit jong ngi kan long kaba janai. Hallelujah!
Nga ngeit kane ka la long ka jingkyrkhu ïa phi ha kane ka por.
U Blei un kyrkhu, Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | May 2, 2026
Comments
Post a Comment