Ha ka por jong U un pynlong ïa kiei kiei baroh kiba itynnad!

Ïai ap ïa ka por jong U 

Paralok baieit, lehse don na phi kiba la lynga, pisa namar ba kiei kiei baroh kiba phi phohsniew, kiba phi kyrmen kim i poi shano shano, shibun ki jingpynwit, shibun ki jingkhang lad, bad bunsien phi sngew kumba U Blei u lah klet ïa phi. Phi sngew kumba U Blei um sngap shuh ïa ki jingduwai jong phi. Hynrei nga ong ïa phi, wat pat duh jingkyrmen, hynrei ‘Ïai ap ïa ka por jong U Blei, namar ka Ktien jong U Blei ka ong na ka kitab u Ekklesiastis 3:11, Ha ka por jong U un pynlong ïa kiei kiei baroh kiba itynnad!

EKKLESIASTIS 3:11

U la pynlong itynnad ïa kiei kiei baroh ha la ka aïom.

Ecclesiastes 3:11 NKJV

He has made everything beautiful in its time.  

U la pynlong ïa kiei kiei baroh kiba itynnad ha ka por, kaba mut ha ka por jong U. Ynda ka por ba U Blei U la buh ha ka jingim jong phi, phi shem ba kiei kiei baroh kin sa long kiba itynnad, ka ban da long maian (amazed) shisha.

Nga kwah ban pyni ïa phi kawei ka nuksa shaphang uwei u briew uba don ki jingphohsniew kiba sngewtynnad ha ka jingim jong u, pynban katba ki sngi ki nang iaid i kumba kita ki jingphohsniew jong u kim poi shano shano ruh. Hynrei une u briew u la iaineh ha U Blei bad u la iai ap khmih lynti ïa ka por jong U Blei. Kumta ngi shem hadien, kita ki jingphohsniew baroh ba une u briew u don, ki la urlong. Bad uta u briew u dei u Joseph.

Ngi pule ha ka kitab Genesis 37:1-36, ngi shem kumno u Joseph u la phohsniew ïa ka jingphohsniew bad u la iathuh ïa kata ka jingphohsniew ha la ki hynmen, bad ha u kpa bad ka kmie jong u, hynrei ngi iohi kaei ba kine ki hynmen ki la leh?

** Kine ki hynmen trai jong u ki la bishni bad ki la mut ban pyniap ia u - namar kata ka jingphohsniew ba u la phohsniew. v5-11

** La bret ia u ha thliew um - ki la mut ban pyniap ia u. vs.18-24

** Ki la die mraw ia u ha u kynja Ishmael tang 20 ki sbai rupa - v.25-28.

Ynda u la poi sha Ijipt, u la shong mraw ha kawei ka ïing jong u Rangbah nongkam jong u syiem Pharaoh, uba kyrteng u Potiphar.

** La pharep sniew da ka tnga u kynrad jong u u Potiphar - Gen 39:1-19.

** La bret ia u sha ka byndi - v.19-23

Hynrei kaba sngewtynnad ka long une u Joseph um shym la duh jingkyrmen, hynrei u la iai ngeit bad iai ap ïa ka por jong U Blei, kumta ngi shem hadien kane -

** Na kata ka byndi la kyntiew ïa u sha ka khet nongsynshar. Gen 41:37-57

** U la long ka jingkyrkhu ia ka ïing ka sem, ia ka jaid ka kynja, ia ki ri bapher². Gen 42:1 ter ter. Hallelujah!

Nangta ngi ïohi ruh ïa u Abraham bad ka Sara, ki dei ki briew kiba ym don jingkyrmen shuh ban dang ïoh khun, namar ba ka Sara ka long kaba lyngki bad u Abraham ruh u lah tymmen.

Ka Ktien jong U Blei ka ong ba katkum ka rukom ki kynthei, ka aiom ban kha khun ka lah kut na ka bynta ka Sara, nalor ba ka long kaba lyngki, ka long ruh kaba lah tymmen  (Jenesis 18:11); hynrei ha ka por jong U Blei, ka Sara ka la ïoh ïa u khun shyntang uba ngi tip kum u Isaak, bad na u la mih ka jaid bynriew bakhraw, ka jaid bynriew Israel.  (Jenesis 18:10).

Ha ka por jong U Blei, kiei kiei baroh ki la long kiba itynnad ha ka jingim jong u Joseph, kiei kiei baroh ki la long kiba itynnad ha ka jingim jong u Abraham bad ka Sara. 

Kane kan long ruh ïa phi, lada phi iaineh, iai kyrmen bad iai ap ïa ka por jong U Blei. Phi sa shem ba kiei kiei baroh kin sa long kiba itynnad!

U Blei un kyrkhu ïa phi, Amen

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.

© Jester Mawlong | June 22, 2026