Kiei kiba ngi dei ban kren?

Kiei kiba ngi dei ban kren?

Kum ki Khristan bad ki briew salonsar ngi donkam ban pyrkhat kaei ba ngi dei ban kren? Ngim lah ban shu kren pathar katba mon lane ban shu kren khlem pyrkhat, ban ong ka ktien ioh ei, kaba khlem lut kren katba mon. Em, ngim lah satia ban leh kumta.

Ka ktien jong U Blei kam shah ba ngin leh kumta, ka don ka nongrim ‘Kiei kiba ngi dei ban kren, bad kiei kiba ngim dei ban kren’

To ngin ïa peit ïa ki katto katne kita ki rukom kren ba ngi dei ban kren.

1. Kren ia kiei kiei kiba shisha

Ngi im ha ki sngi ha kaba ka jur bha ka jingthok ka jinglamler, ka jingkren ïa kiei kiei ki bym shisha. Hynrei ka Ktien jong U Blei ka hikai ba ngim dei ban kren ïa kano kano ka jinglamler, ka bym shisha, hynrei ban kren tang ïa kiei kiei kiba shisha.

EPHESOS 4:25

Naba kumta, da kaba buh noh ïa ka jinglamler, to kren ïa kaba shisha uwei pa uwei bad la u paramarjan; naba ngi ïalong ki dkhot jong ki paralok. 

Ka jingkren barobor ia ka jingshisha ka pyni ïa ka jingsan (maturity) jong u briew.

EPHESOS 4:15

Hynrei, da kaba leh hok ha ka jingieit, ngin ïoh nang san sha u ha kiei kiei baroh, uba long U Khlieh, U Khrist keiñ: 

C.f: NIV

Ephesians 4:15 NIV

Instead, speaking the truth in love, we will grow to become in every respect the mature body of him who is the head, that is, Christ. 

SALM 34:13 ka ong, To sumar ïa la u thylliej na ka basniew, bad ïa ki rmiang shyntur jong me na kaba kren shukor. 

Ngi hap ban sumar ïa la ka ktien ka thylliej, ngin kren ïa kiei kiei kiba shisha.

2. Kren ia kiei kiei kiba tei

Haba ngi pule ha ka EPHESOS 4:29 ngi iohi ka ktien U Blei ka ong, Wat ai ba kano kano ka ktien sih kan mih na ka shyntur jong phi, hynrei, tang kata kaba bit ïa ka ban tei ïa kaba donkam, ba kan ai ka jingaiei ïa kita kiba ïohsngew.

U Paul u ong, wat ai ba kano kano ka ktien sih kan mih na ka shyntur jong phi. Ka ktien sih hangne kam thew eh tang kato ka ktien sih ba shait kren ki ‘riew pyrthei, ki ‘riew thala thaleiñ, hynrei ka mut kano kano ka ktien ka bym tei ka bym wan rah jingkyrkhu, ka bym myntoi, kaba mut ruh ka ktien kaba pynmong, pynsngewsih ia kiwei. Kata ka dei ka ktien sih ba la ong da u Apostol Paul.

Ka jinghikai ka long, to ngin kren barobor ia ki ktien ki ban tei ïa kiba iohsngew.

U Apostol Paul u ong shuh shuh, Ai ba ka jingkren jong phi ha la ka sngi kan long da kaba jali ja-um, ba la pynthiang da ka mluh, ba phin ïoh tip kumno phi dei ban ïa-pynphai ktien ha uwei pa uwei baroh. KOLOSSAI 4:6

Kumta ngi hap ban duwai ha la ka sngi kumba U David u duwai ha U Blei ban ong, To ai ba ki ktien ka shyntur jong nga bad ka jingpyrkhat ka dohnud jong nga kin long ba la pdiang sngewbha ha khmat jong me, A Trai, u mawsiang jong nga, bad u nongsiewspah jong nga. SALM 19:14

3. Kren ïa kiei kiei kiba ai mynsiem lane 

    pynshlur (encourage)

Kaba lai, kaei ba ngi dei ban kren ka long, kren barobor ïa ki ktien ki ban ai mynsiem ïa kiwei pat. La ka long ki kmie ki kpa ïa ki khun, ki khun ïa ki kmie ki kpa, para bangeit bad kumta ter ter.

Kumba ngi la pule na ka EPHESOS 4:29 u Paul u ong, Wat ai ba kano kano ka ktien sih kan mih na ka shyntur jong phi, hynrei, tang kata kaba bit ïa ka ban tei ïa kaba donkam, ba kan ai ka jingaiei ïa kita kiba ïohsngew.

Ha ka line kaba khadduh u ong, ba kan ai ka jingaiei ïa kita kiba iohsngew. Kaba mut lyngba ka ktien ba ngi kren, ki briew kin ïoh mynsiem ban iaid shaphrang bad ban leh eiei na ka bynta U Trai, lane ha kano kano ka kam jong ka jingim jong ki. 

Kiar na kano kano ka jingkren kaba long kumba tan, lane pynhiar ïa ki briew shapoh. Hynrei kren ïa kiei kiei ki ban ai mynsiem, ki ban pynshlur ïa kita kiba iohsngew.

Nga ngeit ngi la mad jingkyrkhu lyngba kane ka jinghikai ba lyngkot ha kane ka por.

Amen

© Jester Mawlong | August 17, 2026