Ka jingiathuhkhana shaphang ‘Arngut ki Syiem’

Ka jingiathuhkhana shaphang ‘Arngut ki Syiem’

Ha kane ka por nga kwah ban kren shaphang ar ngut ki Syiem, uwei u dei u Syiem Nebukhadnessar bad uwei pat u dei u Syiem David.

1. U Syiem Nebukhadnessar

U Syiem Nebukhadnessa u dei u Syiem uba khraw jong ka hima Babilon. La ong u une u syiem Babilon u la long u syiem uba khrawbor haduh katta katta, ha kaba u la jop thma ïa kiba bun ki ri ha ka por jong u.

U la roi ha ka spah ka phew, ka jingdon jingem, bad ka nam jong u ka la phriang kylleng. Bad namar ka jingkhraw ka nam ka burom, ka spah ka hajar jong u, ka jingsarong ka la rung ha u, haduh ba u sngew ba kita kiei kiei baroh ki dei ka jinglah jong u, ka jingstad jong u bad um shym kynmaw Blei shuh ha ka jingim jong u.

Ka Bible ka iathuh ïa ngi ba ha kawei ka sngi u dang ïaid kai ha ki barada kata ka ïing syiem dulan paki jong u, u la peit sawdong u ïohi ïa ka jingitynnad jong ka bad hangta u la sdang ban kren sarong ha ka dohnud jong u. To ngin pule DANIEL 4:28-33

[28] Kane baroh, ka la jia ha u Nebukhadnessar syiem. [29] Ha ka bakut khat-ar bnai u la dang ïaid kai ha kata ka ïingsyiem jong ka Babilon. [30] U syiem u la ïathuh bad u la ong, “Hato kane kam long ka Babilon bakhraw, ïa kaba nga la tei ma nga ban long ka jaka shong syiem, da ka jingkhraw ka bor jong nga bad na ka bynta ka nam ka burom jong nga?” [31] Hamar ba u syiem u dang kren ïa kata ka ktien, ka jingsawa ka la hiar na bneng ka da ong, “Ko Nebukhadnessar syiem, la ong ha me: ka hima ka la leit noh na me. [32] Bad yn beh noh ïa me na ki briew, bad ka jaka shong jong me kan long ryngkat bad ki mrad khlaw; bad yn pynbam phlang ïa me kum ki masi dab, bad hynñiew ki aïom kin lut ha me; tad ynda me la tip ba U Bahakhlieh Tam Eh u synshar ha ka hima jong ki briew, bad ba u ai ïa ka ha uba u mon hi.” [33] Ha kata hi ka por, la pyndep ïa kata ha u Nebukhadnessar; bad la beh noh ïa u na ki briew bad u la bam phlang kum ki masi dab bad ka met jong u ka la jhieh da ka umjer bneng, tad ynda u shñiuh jong u, u la san kum ki 'ner pukni, bad ki tyrsim jong u kum ki tyrsim sim.

Ngi la pule hangne ngi ïohi ïa kaei ba u syiem Nebukhadnessar u la ong. Ha ka dkhot ba 30 u ong, Hato kane kam long ka Babilon bakhraw, ïa kaba nga la tei ma nga ban long ka jaka shong syiem, da ka jingkhraw ka bor jong nga bad na ka bynta ka nam ka burom jong nga?”

Nga, nga, nga, ka jinglah jong nga, ka bor jong nga, ka burom jong nga. Um shym la ai burom ïa U Blei bakhrawbor. Ba dei U Blei ba kyrkhu, dei U Blei ba kyntiew etc, hynrei nga, nga, nga.

Namar kata ka nga, nga, ka bym shym nang ban ai burom ïa U Blei, U Blei u la beh noh ïa u na kata ka ïing syiem sha khlaw ban im noh kum ki mrad, haduh ba hap ban bam phlang kum u masi dab, ki sñiuh kum ki ner pukni, ki tyrsim la kum ki tyrsim sim.

U Blei um lah shah ïa ki briew ba sarong, ki lah ban riewspah, khrawbor katba khrawbor hynrei haba ki sarong U Blei un shop beit arsut!

Kane ka long ka jingmaham ïano re ïano kita kiba sngewlah hi, long hi, man hi. Oh nga ïoh ïa kane ka spah da ka jinglah kamai hi jong nga, nga ïohi ïa kane ka ïing da ka jingnang kynshew jong nga, da kaba klet noh ïa U Blei uba kyrkhu, uba ai bor na ngin ïoh spah. Hynrei nga, nga, nga.

Don bun ki briew kiba ïoh ïa ka dohnud jong u Syiem Nebukhadnessar, hooid kim dei ki syiem, hynrei ki ïoh ïa ka jinglong jong u Syiem Nebukhadnessar.

Lehse ïoh don na phi kiba don ïa kaba kum kane ka dohnud, U Blei U la kyrkhu shibun eh, u la ai ha phi ïa ka spah ka phew jingdon jingem, u la ai ha phi wat ïa ka kam ka jam (kam sorkar) kaba biang, hynrei phi lyndet noh ïa U Blei, nga ong ïa phi kylla bamut kloi katba dang don ka por, ïoh ba phin shah tim ha U Blei kumba shah tim u syiem Nebukhadnessar bad ïoh ba phi shah beh ha U Blei kumba u syiem Nebukhadnessar u la shah beh na khet syiem sha khlaw kum u mrad.

2. U Syiem David 

U Syiem David u dei u Syiem uba khraw ha ka hima Israel. U la jop thma ïa kiba bun ki syiem ha ka por jong u, wat ïa kita ki hima kiba khrawbor. U la ïoh ïa ka nam bad ka burom, u la don ka spah ka hajar, ki jingri jingdup kyrhai. U dap u biang ha kiei kiei baroh. Hynrei kaba sngewtynnad ka long, kat kane ka nam ka burom, ka spah ka phew kyrhai ba u don, bad ki jingjop thma kiba bun, u syiem David um shym la shim burom sha lade, um shym la ong, ka dei ka jingkhlaiñ bor jong nga, ka dei ka jinglah jong nga, etc. hynrei barobor u ai ka burom sha U Blei.

U ïai pynkynmaw ïa lade barobor ba um dei ban klet ïa U Blei.

SALM 103:1-5 KHB

[1] Ko mynsiem jong nga, to kyrkhu ïa U Trai; bad baroh kaba ha nga, ïa ka kyrteng bakhuid jong u. [2] Ko mynsiem jong nga, to kyrkhu ïa U Trai, bad wat klet ïa ki jinglehbha jong u baroh: [3] uba map ïa ki jingleh bymman jong pha baroh, uba shna ïa ki jingpang jong pha baroh; [4] uba pynim ïa ka jingim jong pha na ka jingjot; uba pynphong pansngiat ïa pha da ki jingleh isynei bad ki jingisynei bajem: [5] uba pynkdang ïa ka shyntur jong pha da kiei kiei ki babha; kat ban pynthymmai ïa ka jinglong samla jong pha kum ka pukni.

Namar ba u don ïa kaba kum kane ka dohnud, U Blei u ong ïa U David ba u long kum ka dohnud jong nga. Kam 13:22; 1 Sam 13:14

U Blei u maham ba ngim dei ban klet ïa U Blei.

DEUTERONOMI 8:11-14

[11]  “To sumar ïa lade ba ïoh men klet ïa U Trai uba U Blei jong me, da kaba khlem da sumar ïa ki hukum jong u, bad ïa ki jingbishar jong u, bad ïa ki aiñ jong u, ïa kiba nga hukum ïa me ha kane ka sngi: [12] ba ïoh ynda me la lah bam, bad me la kdang, bad me la thaw ki ïing ki babha, bad la shong sah ha ki; [13] bad haba ki la ïaroi ki masi jong me, bad ki langbrot jong me, bad ba la man bun ka rupa, bad ka ksiar jong me, bad ba la man bun baroh katba me don; [14] te hadien kata ba ka dohnud jong me ka da sngewkhraw, bad men klet te ïa U Trai uba U Blei jong me, uba la wallam noh ïa me na ka ri Ijipt, na kata ka ïing ka jinglongmraw; 

Ngi donkam ban kynmaw ba dei U Blei uba kyrkhu, uba pyndap, uba pynmanbha ïa ka jingim jong ngi.

DEUTERONOMI 8:18-20

[18] Hynrei, to men kynmaw ïa U Trai uba U Blei jong me, namar long ma u keiñ, uba ai bor ïa me ban ïoh ka spah; ba un ïoh pynskhem ïa la ka jutang ïa kaba u la smai ha ki kpa jong me, kumba ha kane ka sngi. [19] Te kan long, lada men klet jynduh ïa U Trai uba U Blei jong me, bad men bud hadien kiwei pat ki blei, bad shakri ïa ki, bad mane ruh ïa ki, nga phla pyrshah ïa phi ha kane ka sngi ba phin ïajot noh da shisha. [20] Kumba kita ki jaid bynriew ïa kiba U Trai u pynjot noh ha shuwa jong phi, kumta keiñ, phi ruh phin ïajot noh; namar ba phim shym kohnguh ïa ka ktien U Trai uba U Blei jong phi.

• U Blei u ai ha phi ka met bakoit bakhiah ba phin shakri ïa u, ban trei na ka bynta jong u.

• U Blei u ai ha phi ki kali, ki bike, ki scooty ba phin ïoh ban leit jingiaseng wan jingiaseng, kata ka dei kaba nyngkong. Ym dei tang ban ïoh kamai, buh skul shaw skul, leit trei leit ktah tang ia ki kam lade.

• U Blei u kyrkhu u pyndap ba phin ïoh ban kyrshan ïa ka kam jong U. 

PROBERB 3:9 

To burom ïa U Trai da la ka spah, bad da ki soh nyngkong ka jingmih jong me baroh:

Ngi donkam ban nang ban burom ïa U Trai haba U Trai u kyrkhu ïa ngi.

Jingkyntu: To ngin ïoh ïa ka dohnud jong U Syiem David, hynrei ngin kiar na ka dohnud jong u Syiem Nebukhadnessar.

U Blei un kyrkhu, Amen 

© Jester Mawlong | Sept 9, 2026