Wat kren san lane leh san palat ïa ka bor ba la ai da U Blei

Wat kren san lane leh san palat ïa ka bor ba la ai da U Blei 

Lehse don ki ban ym sngew iahap bad kaei ba nga ong, hynrei haba ngi peit na ka ktien jong U Blei ngi ïohi ba ka ong kumta.

1 PETROS 4:11

Lada uno uno ruh u kren, un kren keiñ kum ki jingong U Blei; lada uno uno ruh u leh basan, to un leh kum na ka bor ba ai U Blei: ba ha kiei kiei baroh yn ïoh pyndonburom ïa U Blei da U Jisu Khrist, ha uba long ka burom bad ka jingsynshar sha ki bymjukut ki bymjukut: Amen.

U Petros hangne u pyni ba lada uno uno ruh u kren u hap ban kren kum ki jingong U Blei, bad lada u leh basan ruh u hap ban leh tang kum ka bor ba la ai U Blei. Ngim lah ban kren palat, ne leh palat na kata.

1. Kren kum ki jingong U Blei.

 

Kawei pa kawei kaba ngi kren, ïalap ne hikai ngi hap ban kren katkum ka ktien jong U Blei. Ym ba ngin kren da ka jingsngew stad hi, lane katkum ka jingsngewbit (opinion) jong ngi. 

Bun bah ki briew, haba ki kren, oh ki byrthen lah sngew kat kiwei na ki, hynrei lada phi puson bha pat phin shem don ki jingkren ki bym ïahap bad ka ktien jong U Blei. Na kata ka daw u Apostol Petros u sa ong, Lada uno uno ruh u kren, un kren keiñ kum ki jingong U Blei. 

2. Leh basan kum na ka bor ba la ai U Blei.

Kane ruh ka long kaei kaei kaba ngi hap ban tynjuh, ngim lah ban shu leh basan palat ïa kata ka bor ba la ai da U Blei. Lada ngi leh basan palat ïa kata ka bor ba la ai da U Blei ka don ka jingma.

Ngan ai ïa phi ka nuksa na u khynnah. Shu mut dur, u khynnah ba dang 12 snem un pyrshang ban kit 30, 40 kg, kaei ka ban jia ïa u? Khlem artatien un kyllon, un mynsaw bad un shitom. Balei? Namar katkum ka standard u khynnah 12 snem u dei ban kit la kumno kumno tang 6, 7 kg. Bad lada u kit palat na kata, kan ktah ïa ka jingkoit jingkhiah.

Ha ka juh ka rukom, U Blei u ai ha u bangeit ha la ka jong ka jong ka jingaiei, kaba ngim lah ban leh palat na kata.

Ha ka jingiaid lynti jong nga ha ka jingshakri, nga la ïohi ïa kiba bun ki briew kiba la leh basan palat ïa kata ka bor ba la ai da U Blei ïa ki, hynrei tang katto katne ki bakla lynti noh bad kim lah ban ïaid shaphrang. 

Na kata ka daw, u Apostol Petros u kren shai ba ngim dei ban kren lane leh basan palat ïa ka bor ba la ai da U Blei. Nga ngeit ha ka por jong u Petros ruh ka long kumta. Bun kiba kren san, leh san palat ïa ka bor ba la ai da U Blei, bad ki bym poi pat shano shano.

Kumta ka jinghikai ka long: Lada ngi kren, to ngin kren katkum ka jong ong jong U Blei. Lada ngi leh basan to ngin leh katkum ka bor ba la ai da U Blei. Kane kan ïarap ïa ngi ba ngi lah ban ïaid shaphrang bad pyndep pura ïa ka plan bad jingthmu U Blei ha ka jingim jong ngi. 

Kane ka long ka lynti babha tam na ka bynta jong ngi iwei pa iwei.

© Jester Mawlong | Oct 19, 2026