Haba ngi pule ha ka Kitab Proberb 30:26 la iathuh ia ngi shaphang ki Heiraks. Kine ki Heiraks ki long ki mrad kiba rit bad kiba tlot, pynban ki long kiba stad shikatdei eh ong ka ktien U Blei.
Ki sngewthuh ialade ba ki long kiba tlot, kiba rit, ki bymdonbor eiei, bad ki sngewthuh ba ka jingshngaiñ jong ki ka dei sa tang ha u mawsiang, kumta la ong ba kine ki Heiraks ki ju shna ia la ki ïing jong ki ha u mawsiang.
Kaba sngewtynnad shuh shuh ka long ba kine ki Heiraks kim ju jngai na u mawsiang, watla ki wad bam wad dih ruh ki wad hajan hajan u mawsiang bad haba wan u nongshun ne ka jingma, wut wut ki mareh ban rieh ha uta u mawsiang.
Kane ka long ka jinghikai bakhraw ia ngi ruh ba kumno ba ngi dei ban long kiba stad ha ka ban tei ia la ka ïing jong ngi halor u Mawsiang ba long u Khrist Jisu, bad ba ngim dei ruh ban jngai na U. Namar dei tang ha u Khrist uba u Mawsiang ba shisha ka don ka jingshngaiñ ia ka jingim jong ngi.
Mat 7:24-27, ka iathuh ba ki wah ki lah ban shlei, ki lyer iong ki lah ban beh, hynrei uta uba stad uba tei ia la ka ïing halor u Mawsiang un ym shah tyllep noh lane un ym jot noh.
Ngi iohi ia kaei kaba jia ha kine ki sngi shaphang u COVID 19 ne Coronavirus, ka pyrthei ka don hapdeng ka jingshaiong bad ka jingkhynniuh bakhraw, kam don jingshngaiñ shuh, wat ki ri ba khrawbor ka pyrthei kim don jingshngaiñ, ki ri kiba stad kim don jingshngaiñ, uba riewspah um don jingshngaiñ. Ki tiar thma ba ki ri bakhraw bor ka pyrthei ki don kim lah ban ai jingshngaiñ ia ki.
Dei kane ba u Jeremiah u ong, wat ai ba u riewstad un sarong ha la ka jingstad lane uba khrawbor un ym sarong ha la ka bor... hynrei uta uba sngewsarong un sarong ba u ithuh ia U Trai - Jer 9:23-24.
(Ngin sngewsarong ba ngi nang ban tei ia la ka ïing ha U Khrist ba long u mawsiang baskhem)
Kynmaw ba ka bor bad ka jingkhlaiñ jong u briew, ka spah ka phew, kim lah ban ai jingshngaiñ ne jingiada ba shisha ia u briew.
Salm 33:16-17, "Ym don u syiem uba lait im da ka jingbun u paidiapom: u radbah um ioh lait da kaba jur ka jingkhlaiñ, U kulai u long uba thala ban long ka jingiada: lymne un ym pyllait ia uno uno ruh da ka bor bah jong u"
Ngi iohi ia u radbah Goliath - Ka jingkhlain, ka bor jong u, ki atiar thma ba u phong kim lah da shisha ban ai jingshngaiñ ia u, u la kyllon iap ha ka kti u David, u khynnah ap langbrot.
Paralok bad parabangeit baieit, ngi im ha ka pyrthei ka bym don jingshngaiñ shuh, dei sa tang ha U Jisu ka don ka jingshngaiñ bashisha. To ngin long kiba stad da kaba ngin nang ban tei ia la ka ïing, ia la ka jingim halor u Mawsiang. To ngin nym jngai na u, to ngin iaineh bad ngin iai shong ha syndah jong u ha ki por baroh. Ka Salm 91:1 ter ter ka ong, uta uba shong ha ka jaka barieh jong uba hakhlieh tam eh, un ioh iaineh hapoh ka jingkah jong uba donbor baroh (ba long U Trai U Blei uba u Mawsiang baskhem jong ngi). Amen
Comments
Post a Comment