Mareh ban ioh ia ka Pansngiat

Ka khubor na ka Ktien U Blei kaba nga don ban wanrah shaphi ha kane ka por ka long "MAREH BAN IOH IA KA PANSNGIAT" 

Da kaba nga pynshong nongrim ia kane ka jingkren na ka shithi u apostle Paul sha ki nong Korinth (1 Cor 9:24)

Balei la ong, Mareh ban ioh ia ka Pansngiat? Namar don bun ki rukom mareh ne ki nongmareh. Don kiba mareh naka bynta ka jingmyntoi ka met, ban koit ban khiah, ban bang ka bam ka dih bad kumta ter ter, don ruh kiba shu mareh pynbud tynneng. Don pat ki Nongmareh kiba mareh ryngkat ka jingthmu ban ioh ia ka Pansngiat.

U apostle Paul haba u hikai ia ki bangeit kumno ba kin leh ban ioh ia ka Pansngiat (kaba long ka jingim bymjukut), u ai ka nuksa da kaba u pynsyriem ia u Khristan bad u Nongiamareh thong. 

Lehse ngi lah ban pyrkhat, balei la pynsyriem bad u Nongiamareh thong? Kadaw ka long ba u Nongiamareh thong u don ka jingmad (experience) kaba ia syriem bha bad u Khristan. 

1 Korinth 9:24. "Hato phim ju tip ba kita kiba ïaphet ha ka jingïaphet thong ki ïaphet baroh keiñ, hynrei, tang uwei u pdiang ïa ka prais? To ïai-ïaphet kumta ba phin dup ïoh.

Hangne u ong, "To iai ia phet kumta..." Ka jingmut ka long, phet kum utei ne haba phi la phet kum utei te phin sa ioh ia kata ka Pansngiat.

Mynta ngin ia peit kumno u Nongiamareh thong u phet bad kaei kaba u Nongiamareh thong u dei ban leh khnang ba un poi sha ka jingjop, bad ban ioh ia ka Pansngiat. Da kaba peit ia kane kan iarap ruh ia ngi kumno ba ngi ruh ngi lah ban leh khnang ba ngi poi sha ka jingjop bad ban ioh ia ka Pansngiat ba U Blei u la pynkhreh na ka bynta jong ngi.

1. Iohi ia ka dor jong ka Pansngiat: Kaei kaba pynkhih (motivate) ia U nongiamareh thong? Ka dei Ka Prize ne Ka Pansngiat. U nongiamareh thong ba u lah ban mareh bha u hap ban iohi bad ban sngewthuh ia ka dor jong kata ka Pansngiat.

Da kaba u iohi kumta, ka pynlong ia u ban peit (focus) la ki khmat sha kata ka Pansngiat. Ym shawei pat ne ym sha u briew, bad kane ka pynlong ia u wat haba u iaid u ieng, u thiah u shong, u trei u ktah ruh, un pyrkhat shaphang kata ka Pansngiat. Kumjuh ruh ka long na ka bynta jong ngi kum ki Nongiamareh thong ba kynja-mynsiem. Kaba nyngkong ngi donkam ban iohi ia ka jingkordor kata ka Pansngiat kaba long ka jingim bymjukut. Bad kata kan iarap, kan pynkhih (motivate) ia ngi.

2. U dei ban don ka thong - La kumno kumno ban ioh ia katei ka Pansngiat. Haba ngi don ka thong, kata kan pynlah ia ngi wat ban kheiñduh ia kiei kiei baroh. U apostle Paul u ong ha ka shithi sha ki Philippians 3:13-15, nga beh sha pyrshah ka dak (thong)... bad ha ka dkhot 7 & 8 u ong, na ka bynta kata ka thong nga niewduh niew-synrum lut ia kiei² baroh wat ia kita kiba long ka jingmyntoi ia u. Ngi dei ban don ka thong. Lada ngim don ka thong ngin long tang kum ki nongmareh bang-ja lane kita kiba shu pynbud tynneng. U Apostol Paul u ong ka long kumba shoh kai ia ka suiñ. (1 Korinth 9:26)

 * Ka jingim Khristan kam dei satia ban shu pynbud tynneng, hynrei hap ban don ka jingiohi bad ka thong ha ka.

3. Hap ban pyneh bad iaishah - Ngim lah ban shu mareh tang kat ha ita i jingsngew tynnad lade, kum ki nongmareh step, ynda lah sngewthait, lah sngew biang wan phai noh sha ïing, sangeh noh. Em... Ka jingiamareh thong ban ioh ia ka pansngiat hap ban da pyneh, hap ban iaishah. (1 Korinth 9:25)

 

Mut dur ki nongiamareh thong (Athletes) tang ba kin ioh ia kata ka Pansngiat kaba tang shipor ka lah pyut, haduh katno ki pyneh, ki hap ban shah ia shibun kiei kiei. Katno tam lei ma ngi ban ioh ia kata ka Pansngiat bym pyut shuh ngi hap ban kham pyneh, ngi hap ban iaishah.

Ban shakri ia U Trai, ban leit jingiaseng, ban duwai, ban pule Bible etc hap ban pyneh... u Paul u ong ha ka 1 Korinth 9:27, "Nga pynshitom khop ia la ka met bad nga ialam mraw ia ka keiñ..." U Mraw ia kaba um mon ne um kwah u hap ban leh. Na ka bynta ban ioh ia ka Pansngiat, ngi hap ban ring mraw ia ka malade baroh.

4. U donkam ban bret noh ia kano kano ka jingpynwit. Eg. Athletes - ym ju don u nongiamareh race u ban kit ryngkat ka jingkit ba khia haba u iamareh race. Un hap ban pynthylli lut ialade, un pynsting katba lah.

Kumjuh ka long ha ka jingim jong ngi kum ki bangeit, ba ngi lah ban phet bha bad ban poi sha ka thong, ban ioh ia kata ka pansngiat bym pyut shuh, hap shisha ban bret noh bad ban buh noh sharud ia ki jingpynwit baroh. Ka pop bad ki jingkhuslai pyrthei ki khanglad iangi ban mareh bha. 

 

Heb 12:1-2. Bret noh ia kano² ka pop bad kano² ka jingpynwit... Hangne u nongthoh u ong, kano² ka pop. (Pule ruh Eph 4:25,31; Col 3:8)

U ong ruh, kano² ka jingpynwit. Lada kidei ki jingkhuslai, kano² ka jingkit bakhia, bret lut sha U Jisu, wat ym kit halade, ioh ba ngim lah shuh ban mareh bha ha kane ka jingiaphet thong. U Jisu u ong, wan ha nga phi kiba khia ka jingkit te ngan pynjem ia phi - Matthew 11:28. Bret lut sha u... Kano kano ka jingpynwit, ka pop.

Lada kine ki don, ngin nym lah ban mareh kumba dei biang bad ngin nym lah ban poi sha ka thong jong ka jingjop. Hap ban bret lut 

5. Mareh katba kum ka rukom (rules) - Ym don shortcut way. Kohnguh ia ka ktien U Blei, mareh ha ka mon bad jingkwah jong U Blei. Ym ha ka jingkwah ne jingsngewtynnad lade. 

2 Timothy 2:5, "Bad lada uno uno u ïaleh ruh ha ki jingïaleh thong, yn ym pynphong pansngiat ïa u, lymda un ïaleh katba dei ka rukom."

Kadei ia ngi ban pule bha ia ka Ktien U Blei ba ngi lah ban tip bad ban sngewthuh kham bha ha ka jingiaid lynti bad ha kata ka jingiaphet thong jong ngi.

6. Mareh bad wat ym sangeh - Ka jingmut ka long "Iai Mareh" haduh kaba kut.

Mat 10:22 & Mat 24:13; "Jar uba da iaineh haduh bakut un ioh lait im"

Ka jingmut ka long ba ngim dei ban iehnoh shiteng, ngim dei ban phaidien ne phai sha ka diang ne kamon hynrei hap ban mareh beit shaphang.

* Ka tnga u Lot ka la sangeh bad ka la duh noh ia ka Pansngiat jong ka jingiohlaitim. Genesis 19:1-24-26.

* Don kiba sangeh noh namar ka spah, don kiba sangeh noh namar ki jingsngewbha pyrthei, don kiba sangeh noh namar ki jingeh jingjynjar etc.

Ka jingkyntu ka long, to ngin ym sangeh. U apostle Paul u kylli ia ki bangeit ha Galatia, Phi la ju phet bha...uei ba pynpep ia phi??? (Gal 5:7.) Phi la ju phet bha te, sa ban poi noh sha ka thong...uei pat ba pynpep ia phi??? To ngin nym shah ba kano kano kawei pat ka jingthaw kan pynpep noh ia ka jingiamareh thong jong ngi. 

7. Ka pansngiat ka ap na ka bynta kiba jop - U Paul u ong, Nga la pyndep ia ka jingiaphet, nga la ri ia la ka jingngeit, mynta nga ap sa ia ka pansngiat. Bad u ong ruh ba ym tang na ka bynta jong nga hynrei na ka bynta baroh kita kiba la pyndep ia ka jingiaphet. (2 Timothy 4:7-8) 

Pule ruh

* Rev 2:10 - Crown of life 

* James 1:12 

* Matthew 24:13

Amen 

© Jester Mawlong | August 17, 2020