Kumno phin ioh ia u snem thymmai basuk bad ba kmen?
Nga ngeit baroh ngi kwah ia u snem thymmai basuk bad ba kmen, dei namar kata ka daw baroh baroh ngi ia wish paralok naduh ka Christmas ban ong Christmas basuk, Christmas bakmen, haduh ka New Year ruh ban ong, Snem thymmai basuk, 'Happy New Year'. Namar ngi sngewthuh ba ka jingsuk bad ka jingkmen ka long kaba donkam haduh katta katta ha ka jingim jong u briew.
Hynrei ka jingkylli ka long, Hato tang shu wish kumta ngin ioh shisha ia kata ka New Year kaba suk bakmen? Em, ym baroh ki ban ioh shisha ia kata tang da kaba shu ia wish paralok.
Ha kane ka por nga kwah ban pyni ia phi ia ka lynti kaba bha tam ban ioh ia u snem thymmai basuk bad bakmen, bad kata ka long:
1. Kylla kaba mut na ka pop
Kaba nyngkong lada ngi kwah ban ioh ia ka jingsuk bashisha ngi donkam ban kylla bamut na ki pop baroh. Lada ngim kylla bamut ngin nym lah satia ban ioh jingsuk wat lada ngin ia wish paralok da ki spah sien ruh.
Ka pop ka pynlong ban duh noh ia ka jingsuk jong U Blei. Ngi kynmaw shaphang u Adam bad ka Im, U Blei u la buh ia ki ha kper Eden, ka jaka jong ka jingsuk bad ka jingkmen kyrhai, hynrei haba ki la leh pop, la beh noh ia ki na kata ka jaka jong ka jingsuk.
Ka Bible ka iathuh shai ba ym don jingsuk ia u bymman (nongpop bym treh ban kylla kaba mut). Ia kane ngin shem na ki ar bynta ha ka kitab u Isaiah.
ISAÏAH 48:22
‘Ym don ka jingsuk,’ ” ong U Trai, “ïa u bymman.”
ISAÏAH 57:21
‘Ym don jingsuk,’ ” ong U Blei jong nga, “ïa ki bymman.”
Paralok baieit, lada phi kwah shisha ia u snem thymmai basuk bakmen, kylla bamut noh na ka pop jong phi baroh, namar lada phim kylla ka bamut yn nym don jingsuk ong ka Ktien jong U Blei. Pynban, lada phi kylla kaba mut kan wan ka jingsuk jong U Blei ha ka dohnud jong phi.
KI KAM 3:19
Namar kata, to kylla-ka-bamut, to wan phai khmat ruh, ban ïoh pyndam noh ïa ki pop jong phi, ba kumta kin ïoh wan ki aïom shong pyngngad na khmat U Trai,
Haba phi kylla ka bamut, U Blei un pyndam (erase) noh ia ki pop jong phi baroh. Bad ha kata ka por kan wan ka jingsuk jong U Blei kaba ym lah shuh ban batai. U Petros u ong, kata ka aiom shong pyngngad.
Lehse phi la leh ia ka pop, phi sngew ba ym don shuh ba lah ban map ia phi, nga iathuh ba don jingmap ha U Jisu Khrist.
Ka Bible ka ong, 1 ÏOANNIS 1:9
Lada ngi phla ïa ki pop jong ngi, u long uba ïaineh bad u bahok, ban map noh ïa kita ki pop jong ngi bad ban pynkhuid ïa ngi na ka bymhok baroh.
ISAÏAH 1:18-19
¹⁸“Ale te, to ngin ïasaid nia lem,” ong U Trai: “la ki pop jong phi ki long ki basaw hain hain, kin lieh kat ka ïor; la ki la saw bthuh, kin long kum u 'ñiuh langbrot. ¹⁹Lada phi long kiba kloi bad ba kohnguh, phin bam ïa ka jingbha jong ka ri:
Lada U Blei u la map ia ki pop jong phi, phin long u briew uba suk tam na ki briew baroh.
SALM 32:1-2
¹Suk uta uba la ïohmap noh ïa ka jingpalat jong u, uba la ïoh tyllep noh lin ïa ka pop jong u. ²Suk uta u briew uba U Trai um ñiew shuh ïa ka jingbymhok ha u, bad uba ha ka mynsiem jong u ym don ka jingshukor.
Paralok baieit, kaei ka pop ba phi la leh, kylla bamut noh ha kane ka por. U Blei un map bad pynkhuid phar ia ki pop jong phi baroh, bad u snem thymmai un long uba suk bakmen na ka bynta jong phi.
2. Pdiang ia U Jisu ha ka dohnud
Ka step kaba ar, hadien ba phi la kylla bamut na ka pop, pdiang noh ia U Jisu ha ka dohnud jong phi.
Ka Bible ka iathuh ia ngi ba U Jisu u dei U Syiem ka jingsuk.
ISAÏAH 9:6
Namar ha ngi la kha ïa u khun, la ai ïa u khun ha ngi; te ka jingsynshar kan long halor ka tyrpeng jong u: bad yn khot ïa ka kyrteng jong u, “U Baphylla, U Nongsylla,” “U Blei Bakhrawbor,” “U Kpa Bymjukut,” “U Syiem ka Jingsuk.”
Haba ngi ngeit bad pdiang ia U ha ka dohnud jong ngi, un ai ha ngi ia ka jingsuk bad ka jingkmen kaba shisha.
Paralok baieit, ngin nym lah ban ioh jingsuk na ka spah ka phew, ngin nym lah ban ioh jingsuk na ki jingsngewbha ka pyrthei, ngin nym lah ban ioh jingsuk na ka kyiad, u drugs, lane na ka jingiakai kynthei shynrang, hynrei ka jingsuk bashisha ka don tang ha U Jisu. Hallelujah!
Kumta ba ka New Year jong ngi kan long kaba suk bakmen shisha, donkam ban ngeit bad pdiang ia U Jisu ha ka dohnud, dei hangta ngin mad ia ka jingsuk bashisha ha ka mynsiem jong ngi.
ÏOANNIS 14:27
Ïa ka jingsuk nga iehnoh ha phi, ïa ka jingsuk ka jong nga, nga ai ha phi, ym kumba kata ka pyrthei ka ai, nga ai ma nga ha phi. Wat khih khuslai na ka dohnud jong phi, lymne wat sheptieng.
Hangne U Jisu u kren shai u ong, ym kumba ka pyrthei ka ai. Kane ka pyni ba ka jingsuk ba ka pyrthei ka ai ka long temporary, ka long kaba shukor. Hynrei ka jingsuk ba U Jisu u ai ka long permanent, bad ka long ka kaba shisha. Hallelujah!
Dei namar kata ka daw phin shem don bun bah ki briew kiba don ka spah ka phew, ka jingnang jingstad, hynrei ki pyniap noh ia lade (suicide). Balei? Ka daw ka dei namar ba kim don ka jingsuk bashisha. Mynta ki kmen ki sngewbha, lashai ka jingsngewsih ka tynrah ia ki haduh ba kim ban se ban pyniap wat ia lade ruh.
Paralok baieit, lada phi la duh noh ia ka jingsuk, lada phi la duh noh ia ka jingkmen. Lada ka ïing ka sem jong phi tang ka iania ia-aw, tang ka huri hura, ym ju don jingsuk, ym ju don jingkmen, Wan sha U Jisu ha kane ka por, dei tang ha U Jisu ka don ka jingsuk bashisha.
Note: 'Ka jingsuk bashisha ka don tang ha U Jisu Khrist, U Syiem ka jingsuk'
3. Iathuh ia ki jingeh jong phi sha U Jisu
Kaba lai, hadien ba phi la kylla bamut, phi la pdiang ia U Jisu ha ka dohnud, wat nym kit shuh ia ka jingeh ha lade, aiti ia kata sha U Jisu. U Jisu u khot ia ngi ba ngin wan sha U bad bret ia ka jingkit bakhia jong ngi baroh sha U.
MATHAÏOS 11:28
To wan ha nga, phi baroh ki bathait bad bakhia ka jingkit, te ngan pynjem ïa phi.
Kaei ka jingkit bakhia ba phi don, la ka long na ka bynta ialade, ka ïing ka sem, ki khun ki kti. Ka jingkit bakhia jong ka jingpang jingshitom, jingeh jingjynjar, ka jingduk jingkyrduh, kano kano, bret ia kata baroh sha U Jisu.
1 PETROS 5:6-7
⁶To phin pynrit ïa lade namar kata hapoh ka kti bakhrawbor ka jong U Blei, ba un ïoh pynkhraw ïa phi ha ka Ïa ba bit; ⁷da kaba bred halor jong u ïa ka jingkhuslai jong phi baroh, naba u sumar sukher ma u shaphang jong phi.
Ki synran U Jisu haba ki la ia kynduh ia ka eriong kaba la beh pyrshah ia ki, ki la mareh wut wut sha U Jisu ban iathuh ia kata ka jingeh ha U, bad haba U Jisu u la iohsngew ia kata, U la hukum ia ka eriong ba kan long jai jai, bad kumta hi ka eriong ka la long jai jai. MARKOS 4:34-41
U Jisu u la wan khnang ban bah ia ki jingkhuslai jingsngewsih jong ngi baroh.
ISAÏAH 53:4-5 KHB
⁴Shisha u la bah ïa ki jingkhuslai jong ngi, bad u la kit ïa ki jingsngewsih jong ngi: pynban, ngi la ñiew ïa u ba la pynmong, ba la shoh da U Blei, bad ba la pynjynjar. ⁵Hynrei, la pynmong ïa une namar ki jingryngkang jong ngi, la pynlwet ïa u namar ki jingleh bymhok jong ngi: ka jingpynshitom ka jingsuk jong ngi ka la long halor jong u; bad da ki jingjngem snam jong u la pynkhiah ïa ngi.
Paralok baieit, balei phin kit sah ha lade ia ka jingkhuslai jingsngewsih, haba don uwei uba kloi ban kit ia kata ka jingkit jong phi, uta u dei U Jisu Khrist.
PHILIPPI 4:6-7
⁶Wat khuslai ïa kaei kaei ruh; hynrei, ha kaei kaei baroh da ka jingduwai bad ka jingkyrpad lem bad ka jingainguh, to phin pyntip ïa ki jingpan jong phi sha U Blei. ⁷Te kata ka jingsuk U Blei, kaba palat ïa ka jingshemphang baroh, kan ri jai jai keiñ ïa ki dohnud jong phi bad ïa ki jingmut jong phi ha U Khrist Jisu.
ÏOANNIS 14:1
“Wat khih khuslai na ka dohnud jong phi: to ngeit phi ha U Blei, to ngeit ha nga ruh.
4. Shaniah lut ha U Trai
JEREMAÏAH 17:7-8 KHB
⁷Suk uta u briew uba shaniah ha U Trai, bad uba ka jingshaniah jong u long U Trai. ⁸Naba un long kum u dieng ba la thung hajan ki um, bad uba pur ïa la ki thied hajan ka wah, ba un ym sheptieng haba wan ka jingshit, hynrei, ka sla jong u kan long jyrngam; bad ha ka snem barang ryngkhiang un ym sumar khuslai, lymne un ym pep ban sei soh.
Paralok baieit, haba phi nang ban shaniah ha U Trai, phin long u briew uba suk ha ki por baroh. U snem thymmai jong phi un long uba suk bad uba kmen.
Jingpynkut: Lada phi kwah shisha ban iohi ba u snem thymmai un long uba suk bakmen bad ba dap jingkyrkhu,
1) Kylla bamut noh na ka pop jong phi baroh.
2) Pdiang noh ia U Jisu ha ka dohnud jong phi.
3) Iathuh ia ki jingeh jong phi baroh ha U Jisu.
4. Shaniah lut ha U.
U Blei un kyrkhu ia phi, Amen
SNEM THYMMAI BASUK BAKMEN IA PHI BAROH!
HAPPY NEW YEAR !!!
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Jan 01, 2024
Comments
Post a Comment