To wan ha nga phi baroh kiba thait bad kiba khia ka jingkit te ngan pynjem ia phi

TO WAN HA NGA PHI BAROH KIBA THAIT BAD KIBA KHIA KA JINGKIT TE NGAN PYNJEM IA PHI

MATHAÏOS 11:28‭ To wan ha nga, phi baroh ki bathait bad bakhia ka jingkit, te ngan pynjem ïa phi.  

Paralok baieit, kaei ka jingkit bakhia ba phi don, U Jisu u tyrwa ban kit ei ia kata ka jingkit kaba khia jong phi. 

1. Ka jingkit bakhia bad kaba khraw tam ka dei ka pop.

Paralok baieit, ym don ka jingkit kaba kham khia ban ia ka pop. Ka pop kadei ka jingkit kaba khia tam kaba ban ia ka jingim u briew. Bad ia kane ka pop ym don satia mano mano ba lah ban kit lem, lane ban pyllait ia ngi, hynrei dei tang U Jisu. 

Ka bible ka iathuh ia ngi ba dei tang U Jisu ba long U khun jong U Blei uba lah ban kit noh ia ki pop jong ngi.

ÏOANNIS 1:29

Ha kaba lashai, u Ïoannis u ïohi ïa U Jisu ba U wan ha u, bad u ong, “Ha khmih, U Khun langbrot jong U Blei, uba kit noh ïa ka pop ka jong ka pyrthei!

U dakait ba la rai pynrem da ka pyrthei, U Jisu u map ia u. LOUKAS 23:42-43

Ka kynthei ba klim ba la kem bad pynrem ia ka da kiba bun, U Jisu u map bad u ong ngam pynrem ia pha. ÏOANNIS 8:1-11

Paralok baieit, lehse la ban khia ia phi da ka pop, haba phi peit sha lade, phim i don jingkyrmen shuh, nga ong ia phi lada phin wan sha U Jisu, bad pynrit ialade ha khmat jong U, U Jisu un map bad isynei ia phi.

Kaei ka pop ba phi la leh? U Jisu u la kular ban kit ei ia kata ka pop jong phi, kam pher katno ka khia.

ISAÏAH 1:18‭-‬20 

¹⁸“Ale te, to ngin ïasaid nia lem,” ong U Trai: “la ki pop jong phi ki long ki basaw hain hain, kin lieh kat ka ïor; la ki la saw bthuh, kin long kum u 'ñiuh langbrot. ¹⁹Lada phi long kiba kloi bad ba kohnguh, phin bam ïa ka jingbha jong ka ri: ²⁰hynrei, lada phi kyrngah bad ïaleh kiat, ka waitlam kan bam duh ïa phi: namar ka shyntur U Trai ka la kren ïa ka.”

 

Cf. 1 ÏOANNIS 1:9

Lada ngi phla ïa ki pop jong ngi, u long uba ïaineh bad u bahok, ban map noh ïa kita ki pop jong ngi bad ban pynkhuid ïa ngi na ka bymhok baroh.

Nuksa: U Pharisi & u Nongkhrong khajna LOUKAS 18:10-14

2. Ka jingkit bakhia jong ki jingpang jingshitom.

Kaba ar ka jingkit bakhia ba u briew u kit, ka dei ka jingpang jingshitom. 

Paralok baieit, lehse la ban khia ia phi da ki jingpang jingshitom, kaba phi la pyrshang da ki ba bun ki lad ki lynti ban ioh khiah bad ioh lait na kata ka jingban khia jong ka jingpang (ha lade, ka ïing ka sem), hynrei phim ioh jingpyllait, ha kane ka por, lada phim wan sha U Jisu da ka jingngeit, U Jisu un isynei bad pynkhiah janai ia phi.

KAM 10:38

"....shaphang U Jisu uba na Nasaret, kumno ba U Blei u la pynsleh ïa u da U Mynsiem Bakhuid, bad da ka bor, uba la ïaid kylleng u da leh babha, bad u da pynkhiah ïa kita baroh kiba la ban shitom da u Soitan; naba U Blei u long ryngkat bad u."

 

1 PETROS 2:24 KHB

"...uba da lade hi u la bah noh ïa ki pop jong ngi ha ka met jong u halor kata ka dieng, ba, haba la ïap noh sha kita ki pop ngin ïoh im sha ka hok; uba da ki jingjngem snam jong u, la pynkhiah ïa phi."

Ka kynthei ba pang mihsnam la 12 snem, kaba la pyrshang bad pynlut khoit ia ki jingdon jingem jong ka baroh tang ban ioh khiah na kata ka jingpang, hynrei kam shym la ioh jingiarap, katba ka nang pynlut, katta ka jingpang ka nang jur, ong ka Bible, hynrei dei tat haduh ba kan da wan sha U Jisu, hangta ka la ioh khiah na kata ka jingpang mihsnam jong ka.

Pule - LOUKAS 8:43-48

3. Ka jingjynjar bad jingkhuslai

ISAÏAH 53:4‭-‬5

⁴Shisha u la bah ïa ki jingkhuslai jong ngi, bad u la kit ïa ki jingsngewsih jong ngi: pynban, ngi la ñiew ïa u ba la pynmong, ba la shoh da U Blei, bad ba la pynjynjar. ⁵Hynrei, la pynmong ïa une namar ki jingryngkang jong ngi, la pynlwet ïa u namar ki jingleh bymhok jong ngi: ka jingpynshitom ka jingsuk jong ngi ka la long halor jong u; bad da ki jingjngem snam jong u la pynkhiah ïa ngi.

1 PETROS 5:7

"....da kaba bred halor jong u ïa ka jingkhuslai jong phi baroh, naba u sumar sukher ma u shaphang jong phi."

Cf. ÏOANNIS 14:1… "Wat khih khuslai…shu ngeit"

Paralok baieit, phin  nym lah ban ioh ia ka jingsuk na ka pyrthei bad na ki jingsngewbha pyrthei. Ka pyrthei da lei lei kan nym lah ban ai jingsuk ia ngi, hynrei dei tang ha U Jisu ka don ka jingsuk bashisha.

ÏOANNIS 14:27

"Ïa ka jingsuk nga iehnoh ha phi, ïa ka jingsuk ka jong nga, nga ai ha phi, ym kumba kata ka pyrthei ka ai, nga ai ma nga ha phi. Wat khih khuslai na ka dohnud jong phi, lymne wat sheptieng."

U Jisu u dang khot ieit ia phi, balei phim shu wan sha U. 

*** La ban khia ia phi da ka pop

*** La ban khia ia phi da ki jingpang jingkhrew

*** La ban khia ia phi da ki jingkhuslai bad ki jingjynjar ba bun jaid

U Jisu u khot ia phi, lada phin wan, phin shem ia ka jingjahthait bashisha.

To U Blei un kyrkhu ia phi. Amen

© Jester Mawlong | Dec 16, 2023