AIU NGI DEI BAN LEH KATBA NGI DANG AP ÏA KA JINGWAN U TRAI?
Ka jingwan U Trai ka dei kata kaba ki bangeit ha U Jisu Khrist ki ap khmih lynti. Kumta kum ki bangeit kiba don kata ka jingkyrmen na ka bynta kata ka jingwan U Trai lane ka jingrongnoh, ngim dei ban shu shong kli kti, bad ban shu ap khlem da leh eiei, hynrei ngi hap ïa ka ban leh eiei kum kata ka jingpynkhreh ïa lade na ka bynta kata ka jingwan U Trai.
Kaei ba ngi dei ban leh?
1. Pynkhuid ïa lade.
Kata ka dei kaba nyngkong eh ba ngi dei ban leh kum ki bangeit.
1 ÏOANNIS 3:2-3
²Ko hep ba-ieit, mynta ngi long ki khun U Blei, bad ym pat la pynpaw ïa kaei ba ngin sa long; hynrei, ngi tip ba, ynda la pynpaw ïa u, ngin long kiba kum ma u; naba ngin ïohi ïa u kumba u long hi. ³Te uwei pa uwei baroh uba don kane ka jingkyrmen ha u, u pynkhuid ïa lade, kat kumba ma u, u long u bakhuid.
U Ïoannis u ong katba ngi dang ap kyrmen ïa kata ka jingwan jong U, ngin pynkhuid ïa lade.
Balei ngi hap ban pynkhuid ïa lade? Namar ka Bible ka ong, khlem ka jingkhuid ngin ym iohi ïa U Blei. Heb 12:14
Shuh shuh ka Bible ka ong ba kano kano ka bymkhuid kan ym ioh rung ha ka hima U Blei. Ka jingkhnang te ka plie rynghang, hynrei ka bym khuid kam lah ban rung! Jingpynpaw 21:25, 27
Na kata ka daw ngi hap ban iai pynkhuid ïa lade. Watla ngi im ha ka pyrthei kaba tngit, ka pyrthei kaba pynbor ia ngi ban im ka jingim laitlan, ka jingim bymkhuid, hynrei la kumno kumno, ngi hap ban ri ialade ha ka jingkhuid, khlem da pynsyriem ialade bad kane ka pyrthei. Rom 12:1-2
2. Pyndap da U Mynsiem.
Ki san ngut ki theisotti ba bieit, katba ki dang ap ïa u Nongleit-kurim, ka jingbakla ka long ba kim shym la pyndap lypa ïa ki khulpi jong ki da ka umphniang sharak, kumta haba u Nongleit-kurim u wan kyndit kyndit, bad haba ki la mut ban thang ïa ki sharak jong ki, hynrei kim shym la meh satia. Kumta kine ki san ngut ki theisotti ba bieit ki la duh ei ban iashem bad U Nongleit-kurim (ka dur U Jisu Khrist). MATHAÏOS 25:1-13
Ki don ka jinglong sotti (ba kren ïa ka jinglong khuid jinglong kyntang), ki don ruh ïa ki sharak, hynrei kawei kaba ki duna ka dei ka umphniang (kaba kren ïa U Mynsiem Bakhuid).
Paralok baieit, ngi la iohi ia ka nuksa na kine ki theisotti ba bieit, kumta to ngin long kiba stad da kaba iai pyndap ïa lade da U Mynsiem Bakhuid jong U Blei. U Paul u ong, To long kiba la dap da U Mynsiem. Eph 5:18
Wat nym ap ban leit wad umphniang ynda haba ki dukan ki la khang lut. Hynrei pyndap mynta. Hallelujah
Lada ka dei ba ngi iohthiah mynmiet, ngin thiah kum u briew uba la dap da U Mynsiem.
Namar ka jingdap Mynsiem, dei kata ka ban saiñdur ïa ngi, ka ban pynbit pynbiang ïa ngi ba ngin long kata ka Theisotti bad ka Nongleit-kurim ka bym don kano kano kaba thohbria lane kaba sti ha ka.
Kumno ngin long kiba la dap da U Mynsiem?
Ngi donkam ban thrang bad ban sliang: Thrang bad sliang ïa ka jingpyndap U Mynsiem Bakhuid, wat nym sngewhun tang ha ita i jingmad ba nyngkong, tang ban shu kren ha kiwei ki thylliej, hynrei sliang ïa ka jingpyndap jong U Mynsiem Bakhuid.
U Blei u ong, Ngan theh um ha uta uba sliang. Ym ha u bym sliang.
ISAIAH 44:3
Naba ngan theh um ha uta u basliang, bad ki wah duid ha ka khyndew barkhiang: ngan theh ïa la U Mynsiem halor u symbai jong me, bad ïa la ka jingkyrkhu halor ki khun ki ksiew jong me:
3. Beh sha ka jingiaseng lang.
Ka jingleit jingiaseng wan jingiaseng kam dei satia tang ka rukom ba dei ban leit, hynrei haba ngi pule ha ka Ktien jong U Blei, ngi shem ka dei kawei na ka jingpynkhreh jong ngi na ka bynta ka jingwan U Trai.
HEBRU 10:24-25
²⁴bad to ngin ïapyrkhat ban ïapynkhih paralok ïa ka jingïa-ieit bad ïa ka jingleh babha; ²⁵khlem da iehnoh ïa ka jingïaseng lang jong ngi hi, kumba long ka rukom kiwei, hynrei, da ïakyntu paralok hi; bad kata kham tam, katba phi ïohi ïa kata ka sngi (ka jingwan U Trai) ba ka nang jan.
U Paul u ong, “Kyntu paralok” - Da iohi uwei u leh tlot, kyntu - pynkhih, ka long kumba kyrsiew thiah! Hey! Ym long ho ban pep jingiaseng, hey ym long ho ban leh kumne, ïa ngin leit jingiaseng, ïa ngin shakri ïa U Trai. Kata ka dei ka jingkyntu paralok.
Phi lah ban ong o ngan shu sngap jingiaseng na YouTube, hynrei kaba iaseng da ka met ka iapher.
Haba ngi don ha ka jingiaseng lang, ngi don ïa ka jingiasyllok paralok, bad haba ngi don ha ka jingiasyllok paralok, ka snam U Jisu ka pynkhuid ïa ngi, ong ka Ktien jong U Blei.
1 ÏOANNIS 1:7
hynrei, lada ngi ïaid ha kata ka jingshai kumba u long ma u ha kata ka jingshai, ngi don ka jingïasyllok lem paralok hi, bad ka snam U Jisu U Khun jong u ka pynkhuid ïa ngi na ka pop baroh.
4. Ialap ia kiwei.
Pynkhreh ia lade - ïalap ruh ïa kiwei!
e.g: U Noah katba u dang pynkhreh ïa lade, u ïalap artad ïa kiwei. Um shym la ong satia, o namar ialade ngan ioh lait kumta kiwei kin mat ïa ïap shato! Hynrei u la ïalap ruh ïa kiwei.
La tip ïa u kum ‘U Nongialap ïa ka hok’. Um shym la thait, u la ïalap bad iai ïalap!
Um ong satia, o nga lah ïalap mynta lah shisnem, ar snem ym don ba ngeit, ngan sangeh noh! Hynrei em! Ngeit ne ym ngeit - u ïalap! Katba U Blei um pat ong lah biang, rung noh ha ka ïing-lieng, u ïalap beit.
Kumta ka jingkhot ïa ngi ruh ka long ba ngi hap ban pyndep beit ïa kata ka kam ïalap ba la aiti ha ngi ban pyndep.
U Paul u ong, haba ngi ïalap ïa kiwei, ïa lade ruh ngi im. Kaba mut im ka mynsiem.
1 TIMOTHI 4:16
To sumar shaphang ïa lade, bad ïa la ka jinghikai; to men ïaineh ha kine kiei kiei; namar haba leh ïa kane, men pynim ïa lade bad ïa kita kiba ïohsngew ïa me keiñ.
U Noah ruh haba u ïalap ïa kiwei, ïa u ruh la pynim. Hallelujah
2 PETROS 2:5
bad lada um shym la riej ïa ka pyrthei ba-mynbarim, hynrei, ïa u Noah, u nongïalap ïa ka hok, lem bad hynñiew ngut kiwei pat u la ri kyndong, mynba u la pynwan ïa ka jingshlei ha kata ka pyrthei ki bymriewblei;
Kumta to ngin nym sangeh ban ïalap, la ka long ïa kiba ha ïing, ki paralok, bad ïa ki briew baroh.
KOLOSSAI 1:28
U Paul u ong, ïa uba ngi ïalap, da kaba sneng ïa u briew baroh bad da kaba hikai ïa u briew baroh ha ka jingstad baroh, ba ngin ïoh pynïeng ïa u briew baroh uba janai ha U Khrist Jisu.
Ngi donkam ban don kata ka thong ban ong, ngan ïalap ïa une u khun jong nga, haduh ba un da ïeng kum uta uba janai ha U Khrist.
Ngan ïalap ïa une u lok jong nga, haduh ba un da ïeng kum uta uba janai ha U Khrist.
Ngan ïalap ïa une u para jong nga, haduh ba un da ïeng kum uta uba janai ha U Khrist. Etc, etc. Hallelujah!
5. Iai ap ha ka jingduwai.
MARKOS 13:32-33
³²“Hynrei, shaphang kata ka sngi bad kata ka por ruh ym don ba tip, em, wat ki angel kiba ha bneng, lymne U Khun, hynrei, tang U Kpa. ³³To sumar, to sharai, to duwai ruh; naba phim tip lano ka lmong kata ka sngi.
Hynrekut kiei kh keiñ; namar kata, to phin khan adkar, bad to phin sharai shaphang ki jingduwai.
Parabangeit baieit, kiei kiei kiba jia sawdong ki pyni ba U Trai u la jan… kumta to ngin pynkhreh ialade da kaba im ka jingim bakhuid ba kyntang, ngin long kiba la iai pyndap da U Mynsiem, ngin ïa beh sha ka jingiaseng lang, bad ngin ïalap ruh ïa kiwei ba kin ngeit bad pdiang ïa U Jisu, kaba khadduh ngin iai ap ïa U Trai ha ki jingduwai.
U Blei un kyrkhu, Amen
© Jester L Mawlong | Sept 15, 2025
Comments
Post a Comment