U Blei uba pynkylla

U Blei uba pynkylla 

Haba ngi peit ha ka Bible naduh ka Testament Barim haduh ka Testament Bathymmai ngi iohi U Blei u dei U Blei uba pynkylla. 

EKSODOS 7:17 U la pynkylla snam ïa ki wah ka ri Ijipt, namar ka jingeh dohnud jong u syiem Pharaoh.

Nangta ha ka Gospel u ÏOANNIS 2:1-11 ngi iohi ia ka jingpynkylla waiñ ïa ka um. Kata ka bym don jingmad, ka don jingmad haba U Blei u pynkylla. 

Paralok baieit, lehse ka jingim jong phi, phi la long kum ka um kaba la shu blad, phim don jingbang shuh ban leh eiei…nga ong ïa phi phai sha U Blei, u ba lah ban pynkylla ïa ka jingim jong phi, u ba lah ban wanrah pat ïa kata ka jingbang ha ka jingim jong phi, uta u dei U Blei.

Bad dang bun kiwei pat ruh kiba pyni ba U Blei u dei U Blei uba lah ban pynkylla ïa kiei kiei baroh. 

Ha kane ka por ngin ïa peit ïa kiei kiei kiba iadei bad ka jingim jong ngi.

1. U pynkylla ïa ka jingsngewsih sha ka           jingkmen.

SALM 30:11 KHB

Me la pynkylla jingshad ïa ka jingsngewsih jong nga; me la loit noh ïa ka jaiñ khain jong nga, bad me la panpoh ïa nga da ka jingkmen:

JEREMAÏAH 31:13

Ynda kumta, ka theisotti kan sa kmen ha kaba shad, bad ki samla shynrang bad ki tymmen lang: namar ngan pynkylla ïa ka jingïam jong ki sha ka jingkmen bad ngan pyntngen ïa ki, bad ngan pynkmen ïa ki na ka jingsngewsih jong ki.

U Blei u lah ban pynkylla ïa ka jingsngewsih sha ka jingkmen, kumta wat nym sheptieng haba phi don hapdeng ki jingsngewsih, hynrei phai sha U Trai ha ki jingduwai, U Blei un pynkylla ïa ka jingsngewsih jong phi sha ka jingkmen.

2. U pynkylla ïa ka jingdum sha ka                   jingshai.

SALM 18:28 KHB

Naba men tbeh ïa ka sharak jong nga: U Trai U Blei jong nga un pynshai ïa ka jingdum jong nga.

Psalms 18:28 NIV

You, Lord, keep my lamp burning; my God turns my darkness into light.

Me, Trai, to pynmeh ia ka sharak jong nga; U Blei jong nga u pynkylla ia ka jingdum jong nga sha ka jingshai. NIV

Paralok baieit lada ïa ka jingim jong phi, la tap da ka jingdum, ha kaba phi la shaiong ngaiñ ka jingim, phim tip shuh kumno ban leh, nga ong ïa phi phai sha U Trai uba lah ban pynkylla ïa ka jingdum jong phi sha ka jingshai.

3. U pynkylla ïa ka jingtim sha ka                     jingkyrkhu.

NEHEMAÏAH 13:1-2 KHB

[1] Ha kata ka sngi, ki la pule ha Ka Kitab u Moses ha kaba ïohsngew u paidbah; bad la shem ba la thoh ha ka, ba ym bit ïa u nong Ammon bad u nong Moab ban rung hapoh ka jingïaseng U Blei lano lano ruh; [2] namar ba kim shym la leit tan ïa ki khun Israel bad u kpu bad ka um, hynrei, ki la wer nong ïa u Balaam ban ïaleh ïa ki, ban tim ïa ki: hynrei, U Blei jong ngi u la pynkylla ïa ka jingtim sha ka jingkyrkhu. 

Kynmaw haba U Blei u don bad ngi, yn nym don mano mano ba lah ban tim ïa ngi, la ka long u briew ne u ksuid u khrei. 

Ka Ktien jong U Blei ka ong JINGKHEIÑ 23:23 KHB, Namar shisha ym don kaba ai ksuid pyrshah ïa u Jakob, lymne ruh kaba leh byrtong pyrshah ïa u Israel: ha kane ka por yn ong shaphang u Jakob bad shaphang u Israel, ‘Katno u la leh U Blei!’ 

Kane ka kynthup ia kita kiba la ngeit ha U Jisu. Lehse phi ïa kynduh ia ki jingpang jingshitom ba bunjaid ha ka jingim, ka ïing ka sem jong phi, lehse ki briew kin ong, oh lah ai ksuid, ai taro, ai shwar ki briew, lane lah tim mano re mano. Nga ong ïa phi wat sheptieng, U Blei ba phi shakri u lah ban pynkylla khongpong ïa kita kiei kiei baroh, U lah ban pynkylla ïa ka jingtim sha ka jingkyrkhu. Hallelujah!

Kumta wat nym sheptieng, wat nym khynniuh. Ka Bible ka ong, ROM 8:31 KHB

Lada U Blei u long na ka bynta jong ngi, uei uta u ban ïaleh bad ngi? 

Ka jubab ka long ym don. Ïaroh ïa U Trai 

To U Blei un kyrkhu ïa phi baroh. Amen

© Jester L Mawlong | June 14, 2025