U Blei u donkam tang ka 'Hooid' na phi
Lehse don napdeng jong phi phi don ka jingkhot jong U Blei, hynrei haba phi sdang ban peit sha lade phi sngew ba phim long u babit (qualified), phi pyrkhat ngam long kumta kumta, ne ngam don kata kata. Hynrei nga ong ia phi, haba U Blei u khot U donkam tang ka ‘hooid’ na phi, um da donkam eiei shibun.
To ngin peit katto katne ki nuksa na ka Bible:
1. U Moses
Haba U Blei u khot ia U Moses, u Moses um don eiei ha u, u don tang u dieng duh, uba lah ban shu ioh ei na madan ne na khlaw. Bad haba U Blei u khot ia u, u Moses u la aidaw ba ngam don eiei, ngam nang, ngam lah etc etc, hynrei U Blei u ong kaei kato kaba ha ka kti jong me, u Moses u ong, ‘u diengduh’, kumta U Blei u la ong ia u khie leit tang bad uto ‘u diengduh', men iohi ia kiei kiei kiba khraw.
Text: Eksodos 3:1…
V.1-10 Ka jingkhot jong U Blei ia u Moses
V.11 U Moses u aidaw…1
Ch.4:1… U Moses u aidaw biang…2
V.10-13 U Moses i aidaw biang…3
V.14 Ka jingbitar U Trai ka la meh lep pyrshah ia u Moses…
N.B: Kynmaw haba ngi aidaw palat ia ka jingkhot U Trai lane ia ka jingshakri ka pynbitar ia U Trai.
Hangne ngi iohi U Blei um donkam eiei na u Moses, hynrei u donkam tang ka jinglong lakloi bad ban shu ong ‘hooid’. Bad haba U Moses u la kohnguh da shisha kiei kiei kiba khraw ki la jia, wat tang lyngba uta u diengduh. U Blei u lah ban leh kumta ruh na ka bynta jong phi, kaei ba phi donkam ka long tang ban ong, ‘hooid’ ia ka jingkhot jong U Blei.
2. U Gideon
Nangta ngi iohi ha ka por ba U Blei u leit ban paw ha U Gideon bad ban khot ia u, u Gideon ruh u la aidaw, ba nga long uba kumne uba kumtai, nga long uba duk, nga long uba rit, etc etc, hynrei U Blei u ong ia u Gideon ruh ba um donkam eiei na u, hynrei nga donkam tang ka ‘hooid’ na me, kumta haba u Gideon u long ong, ‘hooid’ ia ka jingkhot jong U Blei, U Blei u la pyndonkam borbah ia u.
Text: Nongbishar 6:1…
V.1-12 U Blei u wan paw ha U Gideon ha ka dur jong U Angel.
V.13… U Gideon u aidaw ia U Blei…
Para bangeit baieit, kynmaw ka jingduk, ka jingbeit, ka jingbym don eiei, kam lah ban khang lad ia ka jingpyndonkam jong U Blei haba ngi kloi ban ong, hooid ia ka jingkhot jong U. Hallelujah!
Nga ruh nga dei u briew u bym don eiei na lade, nga lah ban ong, nga long kham palat ban ia u Gideon ha ka jingdon jingem, ngam don eiei! Hynrei haba nga shu pynkohnguh bad nga ong ‘hooid’ ia ka jingkhot jong U Blei, U Blei hi u pyndonkam, u ai jinglah, u ai jingstad etc etc.
Kumta nga challenge ia phi, lada phi la sngew kumno re kumno ia ka jingkhot jong U Blei, wat nym peit sha lade, uei phi long, katno phi don, hynrei peit sha uta uba la khot ia phi, u long uba khraw uba lah ban leh palat ban ia ka bor jong ngi. Hallelujah!
3. U Jeremiah
U Jeremiah ruh u dei uwei na kita kiba U Blei u la khot ïa u, bad ngi iohi une ruh um dei uba lah biang lah bit lypa, u don la ki jong ki excuses, hynrei hangne ruh ngi iohi U Blei u donkam tang ka ‘hooid’ na u Jeremiah ruh. Hallelujah!
Text: Jeremiah 1:1…
U Blei u ong, ‘wat ong nga dang khynnah, wat ong ba ngam nang kren’, hynrei nga donkam tang ka ‘Hooid’ na me.
Bad haba U Jeremiah u la ong ‘hooid' ia ka jingkhot jong U Blei, U Blei u la pyndonkam ia u, u la kylla long U nongiathuhlypa uba khraw.
N.B: Haba ngi kohnguh ia ka jingkhot jong U Blei, ym don khynnah, ym don rangbah, kaba donkam eh ka long tang ka ‘hooid’. Hallelujah!
Para bangeit baieit, lehse U Blei u la khot iaphi, la ka long ha kano kano ka bynta, hynrei bunsien phi buh pud (under-estimate) ialade, phi pyrkhat, phi pynshongdor da kaba phi peit ba phim long uba bit, phim don eiei, etc etc, hynrei nga ong ia phi, lada phin shu pynkohnguh bad shu ong ‘Hooid’, U Blei un leh la ka jong ka bynta bad un da pyndonkam borbah ia phi ruh.
Sangeh ban peit sha lade, sangeh ban calculate ia ka jingdon jingem jong phi, hynrei shu ong ‘Hooid Trai ngan leh ia kaei ba me ong’ kumta phi iohi ia kiei kiei kiba khraw.
To U Blei un kyrkhu ia phi. Amen
La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.
© Jester Mawlong | Feb 28, 2026
Comments
Post a Comment