Ka jinghikai na briew u ba-dkoh
Ha ka kitab Ki Kam Ki Apostol 3:1-11 la iathuh ïa ngi shaphang uwei u briew uba dkoh naduh ka kpoh ka kmie (kaba mut naduh dang kha, la kha dkoh ïa u). Bad la ong ba une uba dkoh u ju shong khrong man la ka sngi ha khmat ka khyrdop jong ka temple kaba ki khot “Ka Baitynnad”.
Kumta ha kawei ka sngi, u Petros bad u Ïoannis ki la leit sha kata ka temple ban duwai, bad haba une u ba dkoh u la iohi ïa u Petros bad u Ïoannis, u la pan ban ioh jingisynei (pisa) na ki, kumta u Petros bad u Ïoannis haba ki la iohi ïa u, ki la ong ha u, ‘to khmih ha ngi’ bad une u briew da kata ka jingkhmih lynti ban ioh eiei na ki, u la khmih dngong ong ka Ktien jong U Blei. Hynrei u Petros u la ong pynban ha u, “Ka rupa bad ka ksiar ngam don, hynrei, ïa kaba nga don, nga ai ïa me. Ha ka kyrteng U Jisu Khrist uba na Nasaret, to ïaid.” KAM 3:6
Bad haba u Petros u la shim ïa ka kti jong u, bad u la pynieng ia une uba dkoh, ka Bible ka ong, u la kynrong joit, bad u la ieng, bad ki matsohlah jong u ki la khlaiñ, bad u la ioh khiah. Hallelujah!
(KI KAM 3:7
Bad u la shim ïa u na ka kti kamon, bad u la pynïeng ïa u; te kumne kumne ruh ki kjat bad ki matsohlah jong u ki la khlaiñ.)
Hadien ba une u briew u la ioh khiah, ngi iohi ka Bible ka ong, bad u la leit rung lem bad ki shapoh ka templ, u da ïaid, u da rynsied, bad u da ïaroh ïa U Blei.
KI KAM 3:8
Kaei kaba nga kwah ban shim hangne kum ka jinghikai ka long ha kane ka dkhot ba phra kaba ong, u la leit rung lem bad ki shapoh ka templ, u da ïaid, u da rynsied, bad u da ïaroh ïa U Blei.
Kaba sngewtynnad ka long, une u briew haba u la ioh khiah na kata ka jingshitom jong u, u la leit bud ïa ki shakri jong U Blei sha ka temple, bad u da ïaroh ïa U Blei.
Kane ka pyni ba une u briew um shym la kmen tang namar ba u la ioh khiah, hynrei u la leit bud ïa ki briew jong U Blei sha ka temple, ban leit ban ainguh bad ban shakri nyngkong ïa U Blei hangta, shuwa ba un leh ïa kiwei pat ki kam ha ka jingim jong u.
Kane ka long kaei kaei kaba sngewtynnad! Bad ka long ruh kaba ngi dei ban bud nuksa.
Hynrei sngewsih, don pat ki briew kiba la mad ïa ka jingpynkhiah jong U Trai, hynrei tang shu koit ki mareh wut sha ki kam ki duk jong ki, bad ki klet noh jlang ïa U Blei.
Ha ka jingiaid lynti jong nga, nga la iakynduh ïa kiba kum kine ki briew, kiba la pang sa ban iap, don kiba wat ki doctor ruh ki lah ai deadline ba kin im sa tang katto katne por, hynrei kumno hadien ka jingduwai ki briew jong U Blei, U Trai u pynkhiah ïa ki, pynban hadien ba ki la khiah kim shakri ïa U Trai bad ki da phet syndon lai-lum lai-wah na ki briew jong U Blei. Kane kam long kaba dei. Haba U Blei U la pynkhiah, u la leh bha ïa ngi, ngim dei ban klet ia U da lei lei.
Hooid don ruh kiba la mad ïa ka jingpynkhiah jong U Blei bad ki da shakri shitrhem shisha ïa U Trai, ki don kiba kum kita ruh. Ïaroh ïa U Trai!
U David u kyntu ïa la ka mynsiem ban ong, Ko mynsiem jong nga, to kyrkhu ïa U Trai, bad wat klet ïa ki jinglehbha jong u baroh: uba map ïa ki jingleh bymman jong pha baroh, uba shna ïa ki jingpang jong pha baroh. SALM 103:2-3
Paralok baieit, to ngin ioh ïa ka nuksa na une u briew uba dkoh, haba U Blei U la pynkhiah, u la kyrkhu bad u la pyllait ïa ngi na shibun ki jingma jingmynsaw, ngim dei ban klet ïa U, hynrei to ngin nang ban ainguh, ban bud bad ban shakri ïa U haduh kaba kut ka jingim jong ngi. Kane kan pynkmen ïa U Blei bad wat ïa ki briew jong U Blei.
Lehse phi dei uwei na kita kiba U Blei U la pynkhiah ïa phi, phi la lait na ka syrngiew ka jingiap, pynban haba phi la khiah phi la klet noh ïa U Blei, phi la phet jngai pynban na ka ïing jong U Blei, nga ong ïa phi, kylla kaba mut, wan phai pat sha U Trai da ka dohnud ba sngewnguh, bad sdang thymmai ban shakri ïa U Blei, wat nym pep ban leit sha ka temple (ïingmane) ban shakri ïa U Trai man ka taiew, ïoh ïa ka dohnud une uba dkoh.
U Blei un kyrkhu, Amen
© Jester Mawlong | April 11, 2026
Comments
Post a Comment