KI RUKOM IAID BA U KHRISTAN U DEI BAN IAID

KI RUKOM IAID BA U KHRISTAN U DEI BAN IAID 

Haba ngi kren shaphang ka rukom iaid ha ka Bible, ka kren ïa ka rukom im.

Kumta ka long kaba donkam ba uwei pa uwei u bangeit ne Khristan un sngewthuh ba ka rukom iaid (rukom im) jong u Khristan ka iapher na ka rukom iaid jong ka pyrthei. 

Ka pyrthei ka don la ka jong ka rukom iaid, u Khristan u don la ka jong ka rukom iaid, ha kaba u Khristan um dei satia ban pynbud kumba iaid ka pyrthei.

Balei ba ngim dei ban iaid kumba iaid ka pyrthei?

Namar ba ka bakut (destination) ka iapher. Kata ka dei ka bneng bad ka dujok. U Jisu ruh u kren shaphang ar tylli ki khyrdop, kaba khim bad kaba kylluid. Kaba kren hi ia ki ar tylli ki destination (kiba kut).

Dei na kata ka daw u Apostle Paul u ong, ba phin ym iaid kumba iaid ki Jentil (ki bym pat tip ne ngeit ïa U Blei).

EPHESOS 4:17

Ïa kane, namar kata, nga ong, bad nga phla ha U Trai, ba phin ym ïaid shuh kumba ïaid ki Jentil, ha ka jingthala ka jingmut jong ki.

U Paul u ong, wat iaid kumba iaid ki Jentil, kaba mut, wat im kumba im ka pyrthei. Wat leh kumba leh ka pyrthei, ka dei ban don ka jingiapher. 

ROM 12:2

Bad to wat pynsyriem ryngkat ïa lade bad kane ka pyrthei; hynrei, to pynkylla dur noh ïa lade keiñ da ka jingpynthymmai ïa ka jingmut jong phi, khnang ba phin ïoh tip kaba kumno ka long ka mon ka jong U Blei, ka babha, bad kaba pynsngewbha eh, bad ka bajanai de.

Sngewsih ban ong ba ha kine ki sngi ngi iohi ba ka rukom iaid jong kiba bun ki Khristan kam long shuh kumba dei ban iaid, ka lah klumar, kam iadei shuh bad kata ka jingkhot ba U Trai u la khot.  

Ngin ia peit mynta ia ki katto katne ki rukom iaid ba ngi dei ban iaid kum ki Khristan ne bangeit.

1. Iaid da ka jingngeit

2 KORINTH 5:7 Namar ngi ïaid da ka jingngeit, ym da ka jingïohi.

U Blei haba u khot ia ngi, u kwah ba ngin iaid da ka jingngeit bad ka jingshaniah lut ha U Blei ia la ka jingim baroh. U Abraham u dei u briew uba la iaid da ka jingngeit haba U Blei u la khot ia u.

HEBRU 11:8

Da ka jingngeit, u Abraham haba la khot ïa u, u la kohnguh ban leit noh sha kata ka jaka ïa kaba un sa pdiang ïa ka ban long ka bynta; te u la leit noh, um da tip shaei u leit.

Haba u Abraham u la iaid da ka jingngeit, bad kata ka la pynsngewbha eh ia U Blei, haduh ba U Blei u la kyrkhu eh ia u Abraham ha kiei kiei baroh. 

Dei na kata ka daw ka Ktien jong U Blei na ka shithi sha ki HEBRU 11:6 ka ong, Khlem ka jingngeit, yn nym lah ban pynsngewbha ia U Blei.

Kumta ba ngin long kiba la shem sngewbha ha khmat U Blei, to ngin iaid da ka jingngeit bad ka jingshaniah lut ha U Blei.

2. Iaid ha ka jingieit

Kaba ar ka jingiaid lynti jong u Khristan ka long ban iaid ha ka jingieit.

EPHESOS 5:2

"...bad to phin ïaid ha ka jingieit, kumba U Khrist ruh u la ieit ïa phi, bad u la aiti noh ïa lade na ka bynta jong ngi, kum ka jingainguh bad ka jingkñia ha U Blei, ïa ka ban long ka jingiw ka baiwbih."

Haba ngi kren shaphang ka jingieit:

(1) Ka jingieit ia U Blei (2) Ka jingieit ia la u paramarjan (para briew). 

Kane ka jingieit kam dei satia ka jingieit ba kynja pyrthei, hynrei ka dei ka jingieit ba kynjablei, kaba ha ka ktien Hebru ki ong ka 'AGAPE'. Kata ka jingieit kaba kloi ban aiti noh ialade na ka bynta ka jingbha kiwei pat.

U Jisu namar ba u ieit ia ngi, u la aiti noh ia la ka jingim na ka bynta jong ngi, U kwah ruh ïa ngi ba ngin ieit ia U bad ba ngin aiti ïa la ka jingim na ka bynta jong U, U kwah ruh ba ngin ieit para bangeit, ieit ia u para marjan.

MARKOS 12:30‭-‬31

"....men ieit ruh ïa U Trai uba U Blei jong me da ka dohnud jong me baroh, bad da ka mynsiem jong me baroh, bad da ka jingmut jong me baroh, bad da ka bor jong me baroh: kane keiñ ka hukum ka bakongsan’: ka ba-ar ruh ka long kane: ‘Men ieit ïa la u paramarjan kumba ïa lade.’ Ym don ka hukum kawei pat kaba kham khraw ïa kine.”

3. Iaid ha ka jingkhuid 

1 PETROS 1:15‭-‬16

"....hynrei, kumba uta uba la khot ïa phi u long u bakhuid, to long ma phi ruh ki bakhuid ha ka jinglong jingim baroh; naba la thoh: “To long phi ki bakhuid namar ma nga, nga long u bakhuid.”

U Blei u long u Bakhuid, u kwah ruh ba ngin long kiba khuid, ngi iaid ha ka jingkhuid. Ka Bible ka ong, khlem ka jingkhuid ngim lah ban iohi ia U Blei. HEBRU 12:14

4. Iaid ha ka jingshisha

Ngi im ha ka pyrthei kaba dap da ki jingbym shisha (fake), hynrei la khot ïa ngi ba ngin iaid ha ka jingshisha.

U Apostol Ïoannis haba u iohsngew shaphang ki para bangeit ba ki iaid ha ka jingshisha, u da sngewkmen eh. Haduh ba u la hap ban thoh shithi khnang, ban iathuh ia ki ia kata ka jingkmen jong u.

3 ÏOANNIS 1:4

Ngam don ka jingkmen ba kham khraw ïa kane keiñ, ba ngan ïohsngew ba ki khun hep jong nga ki da ïaid ha ka jingshisha.

Ka jingshisha ka dei ka ktien U Blei. Haba ngi iaid katkum ka jinghikai ka ktien U Blei, kata kan pynkmen ia U Blei.

5. Iaid kum kiba stad

KOLOSSAI 4:5

To ïaid ha ka jingstad sha kita kiba long shabar, da kaba siewspah noh ïa ka por. 

EPHESOS 5:15

To khmih bha te kumno phi ïaid, ym kum ki bymstad, hynrei, kum ki bastad.

Ngi im ha ki sngi ha kaba kiei kiei baroh ki klumar, ki sngi ki long kiba sniew, kumta lada ngim iaid ha ka jingstad ngin shu ia klumar lang, ngin shu jynthut ngin shu kyllon. 

Ngi donkam ban duwai ba U Blei un ai ha ngi ka jingstad kumno ba ngi lah ban iaid bad ban im ha kiba kum kine ki sngi.

6. Iaid da leh don akor

Watla ngi im ha ka por kaba ka akor - burom ka la hiar shikatdei eh, pynban kum ki bangeit, ngi hap ban iaid da leh don akor shisha. Ngim dei ban iaid kumba iaid ka pyrthei.

ROM 13:13

To ngin ïa-ïaid da leh don akor, kumba ha pyrshah ka sngi; ym ha ki jingïadih kyiad khynwin bad ha ki jingïabuaid, ym ha ki jingïakai kynthei bad kiba ïanuti jakhlia, ym ha kaba ïamai bad kaba ïa-pihuiñ. 

7. Iaid ha ka jingshai

EPHESOS 5:8

Namar phi la ju long mynno mynno ka jingdum, hynrei, mynta, phi long ka jingshai ha U Trai: to ïaid te kum ki khun ka jingshai.

U apostle Paul u ong, mynshuwa phi long ha ka jingdum, phi iaid ha ka jingdum, phi leh ïa ki kam jong ka jingdum, hynrei mynta phi long ka jingshai ha U Trai, kumta to iaid kum ki khun ka jingshai.

Ma nga bad ma phi mynba ngim pat pdiang ïa U Trai, ngi dang don ha ka jingdum, ngi leh ïa ki kam jong ka jingdum, kam pop kam bymman laiphew jaid, hynrei haba ngi la pdiang ïa U Trai ngim long shuh ha ka jingdum, bad ngim dei shuh ban dang leh ïa ki kam jong ka jingdum, kam pop kam bymman. Hallelujah!

Jingpynkut: Nga ngeit kane ka jinghikai ka la long ka jingkyrkhu ïa phi iwei pa iwei, bad ka la iarap ruh kumno ba ngin iaid kum ki bangeit.

U Blei un kyrkhu, Amen.

Copyright © Jester Mawlong | April 6, 2026