Ïaid ha ka jingshisha

Ïaid ha ka jingshisha 

Ïaid ha ka Bible ka mut ruh im. Haba ong, ïaid ha ka jingshisha ka mut im ha ka jingshisha.

Ïaid ka kren ruh ïa ka movement, ka progress. Kaba mut ba ngi hap ban ïai leh, ban ïai im, haduh kaba kut. Ym dei ban sangeh shiteng.

Ngi im ha ka por ha kaba sawdong jong ngi ka dap da kiei kiei ki bym shisha. Ka jingthok, ka jinglamler, etc. Kumta ka long kaba donkam ïa ngi ki bangeit ban ïaid ha ka jingshisha.

2 ÏOANNIS 1:4

Nga la kmen shibun eh naba nga la shem ba don na kita ki khun jong pha kiba ïaid ha ka jingshisha, kumba ngi la pdiang ruh ïa ka hukum na uta U Kpa. 

3 ÏOANNIS 1:2-4

²Ko hep ba-ieit, nga duwai ba ha kiei kiei baroh men roi bad ba men khiah khran, kat kumba ka roi ka mynsiem jong me. ³Namar nga la kmen shibun eh, haba ki parabangeit ki la wan bad ki la ïaphla babha shaphang kata ka jingshisha jong me, kat kumba me ïaid ha ka jingshisha. ⁴Ngam don ka jingkmen ba kham khraw ïa kane keiñ, ba ngan ïohsngew ba ki khun hep jong nga ki da ïaid ha ka jingshisha.

Hangne ngi ïohi ïa kata ka jingkmen jong u Apostol Ïoannis ban ïohi ba ki bangeit ki ïaid ha ka jingshisha.

Haba ki bangeit, samla ki ïoh bike, ïoh kali, ïoh kam ïoh jam, etc ki nongialam lane ki nongsharai ki kmen, ngam ong ba kim kmen, ki kmen. Hynrei kaba kham pynkmen eh ïa ki nongialam ka long haba ïohi ba ki samla/bangeit ki ïaid ha ka jingshisha. Hallelujah!

U Ïoannis u ong, Nga la kmen shibun… u ong shuh shuh, Ngam don ka jingkmen ba kham khraw…

Mutdur - Lada ki nongsharai ki kmen, katno tam lei U Blei! Un kmen haba u ïohi ba ngi ïaid, ngi im ha ka jingshisha.

Kaba pynsngewsih kthang ïa ki nongsharai dei haba ki bangeit ki ïaid kulmar ka jingim, tang ki jingbna basniew…shiphang oh kumta, sa shiphang oh kumta kumta, tang ki khubor basniew...kata ka dei kaei kaei ba ki nongsharai ki sngewsih.

Ïaid ha ka jingshisha 

Ba phin tip kumno ban ïaid ha ka jingshisha, phi donkam ban tip Kaei ka jingshisha?

Ha ka Bible don 3 tylli kita kiba la record kum Ka jingshisha.

1. Ka Ktien jong U Blei.

U Jisu u pynbna ba ka Ktien jong U Blei ka long ka jingshisha. ÏOANNIS 17:17 To pynkyntang ïa ki da ka jingshisha: ka ktien jong me ka long ka jingshisha. 

Cf. Salm 119:160

Ka jingkyllum ka ktien jong me ka long ka jingshisha; bad kawei pa kawei baroh na ki jingbishar hok jong me ka neh junom.

Kumta lyngba kane ngi sngewthuh haba ong ïaid ha ka jingshisha, ka mut ïaid/im katkum ka jinghikai ka ktien jong U Blei.

Kawei pa kawei kaba ngi leh, ngi hap ban peit ka ïahap ne em bad ka ktien jong U Blei. 

Kano kano ka bym long katkum ka ktien U Blei, kam long kaba shisha.

La ka long:

* Ki jinghikai 

* Ki jingkren 

* Jingleh 

* Ka rukom 

* Kano kano

* Hap ban bishar da ka ktien U Blei.

Kumta donkam ïa ki samla ban ieit ïa ka ktien U Blei kaba long ka jingshisha. Kane kan ïalam iaphi ha ka jingshisha. Khlem ka ktien jong U Blei, ngin nym lah!

Kan long long kum u briew u bym pat tip lynti…kumno un leit.

Kumta ngi donkam ban long kiba dap da ka ktien jong U Blei. Kol. 3:16

Cf. 1 Pet. 2:1-2, thrang bad sliang ïa ka ktien U Blei…

2 Tim. 3:16-17, ka long ba la pyrsad mynsiem da U Blei…

U Job u kynshew ïa ka ktien U Blei palat ban ïa ka jingbam. Job 23:12

U David u ieit ïa ka ktien U Blei palat ban ïa ka rewngap. Salm 119:103

2. U Jisu Khrist.

U Jisu u phla shai shaphang ïa lade ba u long ka jingshisha. Ïoannis 14:6, ka lynti, ka jingshisha, ka jingim…

Ngi donkam ka jingiadei kaba jan bha bad U Trai Jisu bad ban pyrthuhbud (imitate) ïa ka rukom im U Jisu, kane ka iarap ïa ngi ruh. 

U Jisu um ju leh ia kano kano ka bymshisha, um ju kren ïa kano kano ka bymshisha, hynrei u leh bad u kren tang ïa kiei kiei kiba shisha.

U Petros u ong, ym shym la shem kano kano ka jingarsap, ka jingbymshisha ha ka shyntur jong u. 1 Pet. 2:21-22

Wat u Pilat ruh haba la bishar ïa U Jisu, u ong, ngam shem kano kano ka jingpalat ha u. Ïoannis 18:37-38

Haba ngi ïaid bad uba kum une u briew bad U Blei, yn pynkylla dur (transform) ïa ka jingim jong ngi. Hallelujah!

3. U Mynsiem Bakhuid.

U Jisu u ong shaphang U Mynsiem Bakhuid ba u long U Mynsiem ka jingshisha.

ÏOANNIS 16:13

Hynrei, ynda u la wan ma u, U Mynsiem ka jingshisha keiñ, un ïalam ïa phi sha ka jingshisha baroh: namar un ym kren na lade, hynrei, ïa kiei kiei ruh katba un ïohsngew, un kren, bad un pynpaw ha phi ïa kiei kiei ruh ki ban sa wan. 

Nalor ka jingiadei ba jan bad ka ktien U Blei bad U Jisu Khrist, ngi donkam ruh ka jingiadei bajan bad U Mynsiem Bakhuid. 

Kumno phi lah ban ïaid ha ka jingshisha? Da lade phin nym lah. Hynrei haba phi long ba shah ïalam ha U Mynsiem, un ïalam ïa phi sha ka jingshisha baroh. Hallelujah!

Haba ong, baroh ka mut ha kano kano ka area jong ka jingim.

Shuh shuh ka jingai jingmut: 

Nalor ka ktien U Blei, U Jisu Khrist bad U Mynsiem Bakhuid, ngi donkam ruh ban duwai barobor ba U Blei un ïalam ïa ngi sha ka jingshisha.

Man ka sngi ngi hap ban duwai bad pan bor na U Blei ban ong, Trai ïarap ïa nga ban iaid ha ka jingshisha, la ka long ha ka jingim, jingkren bad jingleh, etc.

U nongrwai Salm u rwai ha ka SALM 25:5

To ïalam ïa nga ha ka jingshisha jong me, bad to hikai ïa nga; namar me long U Blei ka jingpynim jong nga; ha me nga ap kyrmen baroh shi sngi.

Ngi im ha ka por kaba la ker sawdong bad la pynthame ïa ngi da kiei kiei ki bym shisha, hynrei ngi hap ieng skhem bad ban ïai ïaid ha ka jingshisha. Amen 

Ka jingmih na ka jingiaid ha ka jingshisha:

1. Ka pynkmen ïa kita kiba sharai ïa ngi, 

    ka pynkmen ruh ïa U Blei.

 

Kumba ngi la ïa kren ha kaba sdang, kaba pynkmen eh ïa ki nongsharai bad ïa U Blei U kpa ka long haba ki samla ne bangeit ki ïaid ha ka jingshisha.

Haba ki bangeit, samla ki ïoh bike, kali, kam, etc ki nongialam/nongsharai ki kmen, hynrei kaba kham pynkmen eh ïa ki nongialam ka long haba ïohi ba ki samla ki iaid ha ka jingshisha. Kaba mut, ki im katkum ka Ktien jong U Blei. Amen

U Ïoannis u ong, ngam don ka jingkmen ba kham khraw… 2 Ïoannis 1:4; 3 Ïoannis 1:2-4

Mutdur - Lada ki nongsharai ki kmen, katno tam lei U Blei!

2. Ka pynkylla ïa ka rukom im.

* Pyrkhat ïa kiei kiei kiba shisha - Phil 4:8

* Leh ïa kiei kiei kiba shisha 

* Kren ïa kiei kiei kiba shisha - Eph 4:25; 

   Sekh 8:16

U Blei un kyrkhu, Amen 

© Jester Mawlong | Sept 13, 2026