Hato ym don Jingrongnoh, ym don sngi Bakhatduh?
Hato ym don Jingrongnoh, ym don sngi Bakhatduh?
Ha kine ki sngi la mih uwei u nongthoh kot Khasi uba la thoh ïa kawei ka kot kaba la ai kyrteng ‘Ym don Jingrongnoh, ym don sngi Bakhatduh’ uba la mih ruh ban ai jingpynshai lyngba ki media.
Te ha kane ka por nga kwah ban ïa peit na ka Bible, hato don ne ym don shisha kata ka jingrongnoh lane ki sngi khatduh.
Ym don jingrongnoh.
Ngin ïa peit halor katei ka jingong jong utei u bah, ba ym don jingrongnoh.
Ka jingkylli ka long, lada ym don jingrongnoh shisha, balei pat U Jisu u ong ba ngan sa leit noh ban khreh ka jaka ïa phi, bad u ong ba ynda nga la dep khreh ka jaka, ngan wan pat bad ngan shimti ïa phi ha lade hi, ba ha kaba nga long ma nga phi ruh phi lah ban long.
ÏOANNIS 14:1-3 KHB
¹“Wat khih khuslai na ka dohnud jong phi: to ngeit phi ha U Blei, to ngeit ha nga ruh. ²Ha ka ïing U Kpa jong nga don bun ki pulit shongneh; lymda kumta, nga la ïathuh ha phi; naba ngan sa leit noh ban khreh ka jaka ïa phi. ³Ynda nga la leit noh, bad ba nga la khreh ïa phi ka jaka, ngan wan pat, bad ngan shimti ïa phi ha lade hi, ba ha kaba nga long ma nga, phi ruh phi lah ban long.”
Nangta u Apostol Paul ruh u ong, ba U Khrist un sa wan rong noh ïa kiba la pynkhreh. Lada ki la ïap shuwa ba U Jisu un wan, yn sa pynmihpat ïa ki, bad lada ki dang im haduh ka jingwan U Trai yn sa pynkylla dur ha ka shikhyllipmat.
1 KORINTH 15:51-52 KHB
⁵¹“Ha khmih, nga ïathuh ha phi ïa ka jingmaïan: ngin ym ïohthiah baroh, hynrei, yn pynkylla ïa ngi baroh shisyndon, ha kaba shi khyllipmat keiñ, ha ka turoi ka bakhatduh. ⁵²Namar ka turoi kan sawa, ynda kumta, ïa ki baïap yn pynmih pat ki bympyut, bad ïa ngi yn pynkylla.”
1 THESSALONI 4:16-17 KHB
¹⁶“Naba U Trai hi un wan hiar na bneng bad ka jingrisa, da ka ktien sawa u angel rangbah, bad da ka turoi U Blei: bad kita kiba ïap ha U Khrist kin ïamihpat shuwa. ¹⁷Ynda kumta, ma ngi kiba dang im, ïa kiba la pynsah, yn rong noh ïa ngi lem bad ki ha ki lyoh, ïa ka ban ïashem ïa U Trai ha ka suiñbneng: te kumta, ngin ïailong junom junom lem bad U Trai.”
Lada U Trai Jisu hi u ong, ngan sa wan pat ban shimti ïa phi ha lade hi, ngi dei kiei ba ngin ong, ym don jingrongnoh. Lada u Apostol Paul u ong ba U Trai un sa wan hiar ban rong noh ïa ngi, ngi dei kiei ba ngin ong ym don jingrongnoh.
Sa bishar hi phi na ka ktien U Blei. Tang kawei nga kwah ban ong ba ngin nym sngewpher haba mih kiba kum kine ki nonghikai lane ki jinghikai, namar naduh ka por jong u Apostol Petros ruh ki la mih kiba kum kine.
2 PETROS 3:3-4 KHB
³“da kaba phi tip ïa kane nyngkong, ba ha ki sngi ki bakhatduh kin wan ki nongkrenbeiñ da ka jingkrenbeiñ, kiba ïaid katba kum ki jingkwah brai la ki jong hi, ⁴bad ki da ong, “Hangno kata ka jingkular ïa ka jingwan jong u? namar naduh kaba kita ki kpa tymmen ki la ïohthiah noh, kiei kiei baroh ki ïaisah kumba ki ju long naduh myndanglong ka pyrthei.”
Ha ka dkhot ba 5-7, u Petros u ong, ki klet khnang… ki klet ba U Blei u la pynjot thiaw ïa ka pyrthei bym riewblei ha ka por u Noah.
Ym don sngi khadduh.
Hato ka dei shisha ba ym don sngi khadduh? To ngin ïa peit na ka ktien jong U Blei.
1 ÏOANNIS 2:18 KHB
“Ko khun hep, ka long ka por bakhatduh: bad kumba phi la ïohsngew ba uta uba ïaleh pyrshah ïa U Khrist u wan, wat mynta ruh la mih noh shibun kiba ïaleh pyrshah ïa U Khrist; nangta keiñ ngi tip ba ka long ka por bakhatduh.”
KI KAM 2:16-18 KHB
¹⁶“Hynrei, kane ka long kata ba la ong da u Joel u nongïathuhlypa: ¹⁷“ ‘Kan jia ruh ha ki sngi ki bakhatduh,’ ong U Blei, ‘ba ngan theh noh na U Mynsiem jong nga halor ka doh baroh; te ki khun shynrang jong phi bad ki khun kynthei jong phi kin ïathuhlypa, bad ki samla jong phi kin ïohi ïa ki jingithuhpaw, bad ki tymmen jong phi ruh kin phohsniew ki jingphohsniew: ¹⁸bad halor ki shakri jong nga ruh shynrang bad kynthei ha kita ki sngi ngan theh noh na U Mynsiem jong nga, bad kin ïathuhlypa.”
2 TIMOTHI 3:1 KHB
“Hynrei, to tip ïa kane, ba ha ki sngi ki bakhatduh kin wan ki por bashitom.”
2 PETROS 3:3 KHB
“da kaba phi tip ïa kane nyngkong, ba ha ki sngi ki bakhatduh kin wan ki nongkrenbeiñ da ka jingkrenbeiñ, kiba ïaid katba kum ki jingkwah brai la ki jong hi.
HEBRU 1:1 KHB
“U Blei, haba u la lah kren mynhyndai ha ki kpa tymmen da ki bun bynta bad ha ki bun rukom ha ki nongïathuhlypa, ha kine ki sngi ki bakhatduh u la kren ha ngi ha U Khun”
Dang bun kiwei pat ki dkhot Bible kiba pyni ba ka don ka sngi bakhatduh, bad ba kine ki sngi ba ngi im mynta ki lah dei kita ki sngi ba khatduh.
Sngewsih ban ong ba uto u Bah u khlem pat da pule bad puson bha ïa ka Bible, u lah da kloi ban thoh kot bad mih ban pynshai paidbah ha ki media hana ba ym don jingrongnoh ym don sngi khatduh.
Kynmaw, lada ngi ong ba ym don jingrongnoh, ym don sngi bakhatduh, ngi lah dei ma ngi kita ki nongkren beiñ ba ong u Apostol Petros, ban kren beiñ ïa ka jingong U Jisu, ban kren beiñ ïa ka Bible ka ktien jong U Blei. Ngi lah dei kita ki nonghikai bashukor, ba lamler.
Jingpynkut:
To ngin sumar na ki nonghikai bashukor kiba mih bad ki ban nang iai mih ha kine ki sngi bakhatduh.
Lada ngi pynshahshkor, khlem artatien ngin hap noh na ka jingngeit.
1 TIMOTHI 4:1 KHB
“Hynrei, U Mynsiem u ong shai, ba ha ki Ïa ki bakhatduh, don ki ban hap noh na ka jingngeit; da kaba pynshahshkor ha ki mynsiem bashukor, bad ha ki jinghikai ki ksuid”
2 THESSALONI 2:3 KHB
“Wat ai ba uno uno ruh un shukor ïa phi da kaba kumno kumno ruh: naba kata kan ym wan, lymda jia shuwa kata ka jingphaidien, bad ba yn ïoh pynpaw noh ïa uta u briew jong ka pop, u khun jong ka jingjot”
Ka jingkyntu:
To ngin long kiba la dap da ka ktien U Blei, khnang ba ngin ym shah shukor noh ha kine ki sngi bakhatduh. Haba ka ktien U Blei ka dap ha ngi, dei hangta ngi lah ban sngewthuh la kane ka jinghikai ka long kaba shisha ne kaba lamler. Bad lada ngi shem ba kane kano ka jinghikai kam iadei bad ka ktien jong U Blei, ngi donkam ban nym pynshahshkor ïa ka, lada ngi pynshahshkor kan pynlong ba ngin hap noh na ka jingngeit bad ngin duh ïa ka bneng.
U Apostol Paul u ong lada uno uno u iathuhkhana ïa kawei pat ka Gospel (kaba mut ka bym ïahap bad ka jinghikai ka Bible), ai un long uba la tim.
GALATIA 1:8 KHB
“Hynrei, lada ma ngi, lane u angel na bneng, ngi ïathuhkhana ha phi ïa kano kano ka gospel ka bapher na kaba ngi la ïathuhkhana ha phi, to ai ba un long uba la tim noh.”
Nga ngeit kane ka la ai jingshai ïa phi ha kaba iadei bad kane ka jingkylli.
U Blei un kyrkhu ïa phi baroh, Amen.
© Jester Mawlong | Nov 5, 2026
Comments
Post a Comment