Balei ka dang tam sa 12 tukri?

Balei ka dang tam sa 12 tukri?

MATHAÏOS 14:13‭-‬21

¹³Haba U Jisu u la ïohsngew ruh, u la leit noh nangta ha ka lieng, sha ka jaka kynjah weibriew; te haba ki paidbah ki la ïohsngew, ki la ïabud ïa u da ki kjat na ki shnong. ¹⁴Haba U Jisu ruh u la mih noh, u la ïohi ïa u paidbah babun, bad u la sngewsynei ïa ki bad u la pynkhiah ïa ki bapang jong ki. ¹⁵Te haba ka la kham noh ka sngi, ki la ïawan ha u ki synran jong u, ki da ong, “Kane ka long ka jaka kynjah, ka por ruh ka la kham palat; to pyllait noh ïa ki paidbah, ba kin leit sha ki shnong ban thied jingbam ïa lade.” ¹⁶U Jisu te u la ong ha ki, “Kim donkam ban leit noh; to ai ma phi ha ki ban bam.” ¹⁷Ki te ki ong ha u, “Ngi don hangne sa tang san tylli ki kpu, bad ar tylli ki dohkha.” ¹⁸Te u la ong, “Wallam ïa ki hangne ha nga.” ¹⁹Te u la hukum ban pynshong shaniah ïa ki paidbah ha u phlang, bad u la shim ïa kita ki san tylli ki kpu bad ïa kita ki ar tylli ki dohkha, bad haba u la khmied sha bneng, u la nguh, bad u la kdiah, u la ai ïa ki kpu ha ki synran, bad kita ki synran ha ki paidbah. ²⁰Te ki la ïabam baroh, bad ki la kdang; bad ki la ïakhar na kiba lwet basah tam, dap khat-ar tukri. ²¹Kita kiba la ïabam te ki long kumba san hajar ki rangbah, nalor ki kynthei bad ki khynnah.

Ngi pule hangne ngi iohi shaphang ka jingbsa U Jisu ia ki san hajar ki briew tang da ki san tylli ki kpu bad ar tylli ki dohkha (5000 tang ki rangbah, khlem da khein ia ki kynthei bad khynnah bad lada khein lang ka lah ban poi sha ki phew hajar). Ka Bible ka iathuh ba kita baroh ki la ia bam ha ban da kdang, ym dei satia ba shu ia bam tang ban teh kpoh, hynrei haduh ban da kdang (dk.20). Bad ynda ki lah ia dep bam, U Jisu u la ong ha ki ba kin ia lum noh ia kaba lwet ba sah tam baroh, bad la ong ba kata kaba la lum ka dang tam sa 12 tukri (12 shang). Na san tylli ki kpu bad ar tylli ki dohkha dang tam 12 tukri.

Katno ngut ngi la ju pyrkhat, 'Balei ka dang tam 12 tukri? Kaei ka jinghikai ba ngi ioh nangne?

Don shibun ki nongbatai kiba batai ha la ka jong ka jong ka jingsngewthuh. Don kiba ong ba 12 tukri ka ieng na ka bynta ki 12 jaid ki khun Israel bad kumta ter ter. Hynrei kaei kaba U Blei u ai ha nga ka lesson ka long ba u leh ia kane ban pynshisha ia kaei ba u la kren bad hikai. 

Ngin ia peit ia ki katto katne ki dkhot kiba U Jisu u la kren kham sha shuwa kane.

1. MATHAÏOS 5:6 “Suk ki bathngan bad ki basliang ïa ka hok: naba yn pyndap ïa ki."

Ha kaba sdang jong ka jingialap bad jinghikai jong u u la ong ba kita kiba thngan bad sliang ia ka hok kin long kiba suk bad ba la kyrkhu. U Blei un pyndap ia ki jingdonkam jong ki bad un kyrkhu ia ki la ha ka mynsiem bad ka met kumjuh.

 

Kane ka Ktien ka dang long kaba shisha na ka bynta jong ngi ruh mynta. Haba ngi thngan bad ngi sliang ia ka hok jong U Blei, U Trai un pyndap ia ngi. Lada ngi leit sha u briew ban ong ai ja seh ia nga, nga thngan palat, teng teng dang don ba kin ong o ym don ja, ym don jingbam. Hynrei haba ngi leit sha U Trai da ka dohnud kaba thngan bad ba sliang, un nym phah thylli ia ngi.

2. MATHAÏOS 6:33 "Hynrei, phin ïawad shuwa ïa ka hima U Blei, bad ïa ka hok jong u: te ïa kine kiei kiei baroh, yn sa ai lang tam ha phi."

Kane ka dei ka jingkular jong U Trai, lada ngi wad shuwa ia ka hima U Blei, ngi wad shuwa ia ka hok jong U, te ia kiei kiei baroh un sa ai lang tam ha ngi.

Tang ha kine ki lynnong (5,6) ngi iohi U Jisu u iai ban ia ka jingdonkam ban thngan bad sliang ia ka hok, ban wad shuwa ia ka hima jong U Blei bad u ong ba ia kiei kiei baroh yn sa ai lang tam haphi, yn sa pyndap ia phi.

Kumta ngi iohi kane ka jingong U Jisu ka long kaba shisha. Lada ngi peit shaphang kine ki briew kiba la ia bud ia U Jisu, ki la ia bud ia U kat shaba U leit, haduh ba ki la klet lut ia kiei kiei baroh. Wat haba U Jisu u mut ban leit noh sha jaka ba kynjah wei briew, hynrei hangta ruh ki wad bad ki ia bud ia U. Ki don kata ka jingthngan bad jingsliang ba kynja mynsiem, ki wad ia ka hok jong U Trai. Kumta haba ki la thngan ha ka doh, U Trai u la leh kambah bad bsa ia ki haduh ba kin da ia kdang, bad ym tang ba ki shu ia kdang, hynrei la ai lang tam ia ki haduh 12 tukri. Hallelujah!

Ka kambah ka jia dei haba ngi wad shuwa ia ka hima jong U Blei.

Balei bun ki briew ki ioh katno katno ruh kim ju sngewdap, bam katno katno ruh kim ju sngewkdang, kam don kata ka jingsngewhun ha ki? Ka daw ka dei namar ba kim nang ban wad shuwa ia ka hima jong U Blei bad ia ka hok jong U ruh.

Kumta ka jinghikai ia ngi ruh ka long, To ngin thngan bad ngin sliang ia ka hok jong U Trai, bad to ngin ia wad shuwa ia ka hima jong U Blei, to ngin don kata ka jingsliang bad ka jingthrang ban ia syllok bad U Trai, to ngin leh eiei shuwa na ka bynta U Trai, te ngin shem ba ia kiei kiei baroh kiba ngi donkam, yn sa ai lang tam ha ngi ruh. Amen.

Copyright © Jester Mawlong | July 24, 2022

La shah laitluid ban SHARE ia kane ka post, hynrei yn nym shah ban print ne pynmih ha kino kino ki jingthoh khlem ka permission.